Oniya iraay ko tatodongay a sinael sanay: Ano maˈaraw i kitiraan a niyaroˈ iso iraay ko miroeroay to pakoyoc a tamdaw, misafelit to masadafdafay ato moecelay, hamaan macekid. I fafekang no tapang iraay ko mikikakaay ko takaraw ko saaroˈan minengnengay cingranan. Itini fafekang noniya tamdaw, iraayho ko mikikakaay ko takaraw.”—Patnakay 5:8.

Mikitini pinengneng no kalo a tamdaw, o misowalan noniya sinael o cifadangalay i sifo a tamdaw. Kawra ano pakalingaden ita a miharateng, mamahapinang o misowalan itini iraay ko milingatay to Kawas ci Yihofaan a kimad, oniya soˈlinay kimad papaira to taˈangayay sahinom kitaanan.

Sowal i Patnakay 5:8 sanay, iraay ko cecay tapang cowa ka sadafdaf ko demak, miroeroay to manikaway tamdaw. Kawra o mamiharateng cingra, itini fafekang ningra iraayho ko takaraway ko saaroˈan, fadangalan mikantokay cingranan, hanaca itini fafekang nangra iraayho ko mikikakaay ko takaraw ko saaroˈan. Ka adayayan i, o cifadangalay no sifo ano samaanto ko ˈakawang no saaroˈan o mamanahol alatek, tangongolay ko pidokaˈ to finawlan.

Kawra, ano samaanto a tatiih ko pakayraan, wa ngaˈay rihaday ko falocoˈ ita, samanen mikantokan ni Yihofa ko tapang no sifo, ano samaanto ko malifaay a pasangaray, ngaˈayay pasayra kita i Kawas micangacang to sadama, mihepol to ˈinorong Cingranan. (ˈOlic 55:22; Filipi 4:6, 7) Mafanaˈay kita, ‘misongilaˈay ci Yihofa mihapinang to polong no hekal, sapidemakaw to ˈicel padama to misarocoday madimadi Cingranan a tamdaw.’—2 Rayray 16:9.

Mihaenay, o Patnakay 5:8 mitadtaday to soˈlinay a pakayraan no sifo no tamdaw: I fafekang no tapang iraayho ko mikikakaay ko takaraw ko saaroˈan mikantokay cingranan. Kalimlaan i, patalipaˈelalay koniya sinael kitaanan, o saˈakawangay ko saaroˈan ni Yihofa, iraay ko saˈakawangay a fadangalan Ningra. Nohatini, pakaynian ni Yihofa i Wawa Ningra ci Yis Kristoan, oya Hongti no Hongti Kitakit no Kawas a mikowan. O malefotay ko ˈicel no Kawas, mihapinangay to polong no hekal. Malefotay a masadafdaf Cingra, cowa pisateked, malecaday ko Wawa Ningra.