Бу, мараглы ајәдир. Ајәдә јазылыб: «Әҝәр ҝөрсән ки, јашадығын вилајәтдә мәзлума зүлм едилир, һагг-әдаләт тапдаланыр, тәәҹҹүб етмә. Һәр мәнсәб саһибинә ондан бөјүјү нәзарәт едир, онларын да башында онлардан бөјүкләр вар» (Ваиз 5:8).

Инсан нәзәри илә баханда бу ајәдә һакимијјәт саһиби олан инсанлардан данышылыр. Амма даһа ҝениш дүшүнәндә ајәдән Јеһова һаггында ваҹиб бир шеј өјрәнирик вә бу бизә тәсәлли, архајынлыг верир.

Ваиз 5:8 ајәсиндә дејилир ки, һакимијјәт саһиби мәзлума зүлм едир, һагг-әдаләти тапдалајыр. О унудур ки, ондан јухары вәзифәдә олан, ондан даһа бөјүк сәлаһијјәтә саһиб олан кимсә она нәзарәт едир. Һәтта бу сәлаһијјәтли кәсдән дә сәлаһијјәтли оланлар вар. Тәәссүф ки, инсан һакимијјәтиндә бу сәлаһијјәтли шәхсләрин һамысынын әдаләтсиз олмасы мүмкүндүр вә халг онларын һамысынын һагсыз рәфтарындан әзијјәт чәкмәли олур.

Вәзијјәт нә гәдәр үмидсиз ҝөрүнсә дә, бүтүн мәнсәб саһибләриндән бөјүк олан Јеһованын онлара нәзарәт етмәси бизә тәсәлли верир. Биз Аллаһа сығыныб, гајғы јүкүмүзү Она верә биләрик (Зәб. 55:22; Филип. 4:6, 7). Билирик ки, «Јеһова бүтүн јер үзүнү нәзәрдән кечирир ки, сидги-үрәкдән Она бағлы оланларын рифаһы үчүн ҝүҹүнү ҝөстәрсин» (2 Салн. 16:9).

Демәли, Ваиз 5:8 ајәсиндә инсан һакимијјәтләри илә бағлы бир ҝерчәклик јазылыб: онлардан үстүн һакимијјәтә саһиб һәмишә кимсә вар. Ән әсасы исә бу ајә бизә хатырладыр ки, Јеһова ән үстүн, Али Һакимдир. Һал-һазырда О, Падшаһлығынын Падшаһы олан Иса Мәсиһин васитәсилә идарә едир. Һәр шејә нәзарәт едән Гадир Аллаһ, еләҹә дә Оғлу Иса Мәсиһ тамамилә әдаләтлидир.