Ndɛ mma sɔ’n se kɛ: “Sɛ a wun kɛ be kle yalɛfuɛ’n i ɲrɛnnɛn naan be yoman sa i nuan su’n, naan be yoman sa kpa ɔ asa’n su’n, nán maan i sɔ’n bo ɔ nuan. Afin kɛ sran dan kun o lɛ’n, sran uflɛ o lɛ mɔ i dan trɛ i m’ɔ niɛn i su-ɔ, yɛ sran uflɛ wie’m be o lɛ mɔ be o be ti su-ɔ.”—Aku. 5:8, NWT.

Kɛ e kanngan ndɛ mma sɔ’n nun’n, e kwla bu i kɛ klɔ sran’m be awa’m be janunfuɛ wie’m be ndɛ yɛ ɔ kan-ɔn. Sanngɛ sɛ e bu ndɛ mma sɔ’n i su akunndan kpa’n, é wún i kɛ ɔ kan Zoova i su ndɛ nanwlɛ kun m’ɔ kwla gua e awlɛn su nzue-ɔ.

Akunndanfuɛ’n ndɛ tre 5 i mma 8 kan mɛn siefuɛ kun m’ɔ kle yalɛfuɛ’m be ɲrɛnnɛn kpɛkun ɔ di be ndrunmun’n, i ndɛ. Ɔ fataman kɛ mɛn siefuɛ sɔ’n i wla fi su kɛ sran uflɛ mɔ i dan trɛ i’n ɔ niɛn i su. I kpa bɔbɔ’n, sran uflɛ wie mun ekun be o lɛ mɔ be o i ti su-ɔ. Ng’ɔ yo ɲrɛnnɛn’n, yɛle kɛ mɛn siefuɛ’m be kwlaa be kwla di ndrunmun. Ɔ maan be nga be sie be’n be kwla wun be ɲrun.

Kannzɛ mɛn siefuɛ’m be yo ninnge tɛtɛ mun’n, sanngɛ kɛ e bu i kɛ Zoova i ɲin ta mɛn siefuɛ nga be le kwlalɛ kpa bɔbɔ’n, i sɔ’n gua e awlɛn su nzue. Ɔ maan e kwla srɛ Ɲanmiɛn kɛ ɔ uka e. Kpɛkun e kwla fa sa kwlaa ng’ɔ o e su’n e wlɛ i sa nun. (Jue. 55:23; Fp. 4:6, 7) E si kɛ Zoova “niannian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.”—2 Nyo. 16:9.

Ɔ maan Akunndanfuɛ’n 5:8 kan sa ng’ɔ ju mɛn nun andɛ’n, i ndɛ. Yɛle kɛ kɛ sran dan kun o sa’n, ɔ le sran kun mɔ i dan tra sran dan sɔ’n niɔn. Asa ekun’n, ndɛ mma sɔ’n ti’n, e wun i kɛ Zoova ti dan tra sran dan kwlaa naan ɔ o like kwlaa ti su yɛ ɔ le kwlalɛ dan. Zoova maan i Wa Zezi Klisi ti i Famiɛn diwlɛ nun famiɛn. Ɔ maan junman kwlaa nga Zezi di’n, ɔ ti kɛ Zoova bɔbɔ yɛ ɔ su di junman sɔ’n sa. Ɲanmiɛn m’ɔ kwla like kwlaa yo’n, m’ɔ wun sa kwlaa’n, yɛ ɔ wun like kwlaa nga sran’m be yo’n, ɔ yo sa i nuan su sɛsɛsɛ. Kɛ i Wa’n kusu ti sɔ wie-ɔ.