Kining makapainteres nga teksto nag-ingon: “Kon makita nimo nga ang kabos gidaogdaog ug ang hustisya ug pagkamatarong gilapas diha sa imong distrito, ayawg katingala niana. Kay ang maong taas nga opisyal ginabantayan sa usa nga mas taas kay kaniya, ug duna pay uban nga mas taas kay kanila.”​—Eccl. 5:8.

Sa tawhanong panglantaw, kini nga teksto morag nagtumong lang sa mga tawo nga may awtoridad diha sa gobyerno. Pero kon hunahunaon nato ni pag-ayo, kini naghisgot sab ug kamatuoran bahin kang Jehova, nga angayng maghupay ug magdasig kanato.

Ang Ecclesiastes 5:8 nagtumong sa magmamando nga nagdaogdaog sa mga kabos ug wala maghatag kanilag hustisya. Angayng hinumdoman sa magmamando nga posibleng gibantayan siya sa usa nga mas taas niyag posisyon o awtoridad sa gobyerno. Ug tingali duna pay uban nga mas taas ug posisyon. Ikasubo, sa gobyerno sa tawo, kining tanang magmamando tingali korap, ug ang ordinaryong mga tawo nag-antos tungod sa korapsiyon.

Pero bisag daw wala nay paglaom ang situwasyon, mahupayan ta sa pagkahibalo nga si Jehova ‘nagbantay bisan sa taas nga mga opisyal’ sa gobyerno. Makapangayo tag tabang sa Diyos ug mahimong itugyan nato kaniya ang atong mga palas-anon. (Sal. 55:22; Filip. 4:6, 7) Nahibalo ta nga “ang mga mata ni Jehova nagalibotlibot sa tibuok yuta aron ipakita ang iyang kusog alang niadtong kansang kasingkasing bug-os alang kaniya.”​—2 Cron. 16:9.

Busa ang Ecclesiastes 5:8 nagpahinumdom kanato sa tinuod nga kahimtang sa mga tawo diha sa gobyerno; duna gyoy mas taas ug awtoridad. Labaw sa tanan, ang teksto nagpahinumdom kanato nga si Jehova ang kinalabwan, oo, ang Supremong Awtoridad. Siya nagmando karon pinaagi sa iyang Anak, si Jesu-Kristo, ang Hari sa Gingharian. Ang Labing Gamhanan, kinsa nakakita sa tanan, magpakita gyod ug hustisya, ug ingon sab niana ang iyang Anak.