A tekisi e taki: ‘Yu á mu foondoo te i si taki sama e pina den pootiman. Yu á mu dyombo tu te i si sama nai koti kuutu a wan letifasi. Bika wan sama de di hei moo den bigiman fu kondee, ai si ala san e pasa. Sama de di hei moo den man ya.’​—Peleik. 5:8.

Efu u luku a tekisi ya wawan, da kande a gei enke a den bigiman fu kondee namo ai taki. Ma te u luku en moo fini, ai leli u wan sani fu Yehofa tu di e toosutu u.

Peleikiman 5:8 e taki fu wan tiiman di e pina den pootiman. A tiiman ya nai du sani a wan letifasi. A taki a tiiman ya á mu feegete taki wan sama di abi makiti moo en e luku san ai du. Kande a omen taa bigiman de di abi makiti moo en. A tyali taki gaanse fu den heiheiman di e tii libisama nai du sani a wan letifasi. A den sama di den e tii e fii den takuu bakapisi fu a sani ya.

Kande yu e fii enke a sani ya ná o kengi noiti. Ma u sabi taki Yehofa e si ala san den tiiman e du. A sani ya e toosutu u. U sa begi Yehofa fu a yeepi u, da u fika ala den booko-ede fu u gi en (Ps. 55:22; Filip. 4:6, 7). U sabi taki ‘Yehofa e luku lontu a hii goontapu fu si san e pasa, fu a sa koboloiki en kaakiti fu yeepi den sama di e dini en anga den hii ati’.​—2 Kolon. 16:9.

A tekisi fu Peleikiman 5:8 e membee u taki winsi sama e tii a goontapu ya, efuso sowtu posisi a abi, ala yuu wan sama de di abi makiti moo en. Ai membee u tu taki a Yehofa na a Moo Hei Tiiman di de. Nownow Yehofa poti en Manpikin Yesesi Kelestesi fu tii enke Kownu fu a Kownukondee fi en. Yehofa, a Moo Taanga Gadu e si ala sani. Ala yuu en anga en Manpikin e du sani a wan letifasi.