Sa vèrsé-a entérésan toubonnman. Men sa nou ka li : « Si to ka wè ki, koté to ka rété-a, yé ka malmennen maléré-a é yé pa ka fè sa ki drèt ké sa ki jis, a pa pou to rété èstébékwé. Paské lò roun moun chèf, i gen roun moun ki pi rot pasé li ka véyé sa i ka fè, é i gen ròt ankò ki pi rot pasé sa dé-ya » (Eccl. 5:8).

Nou té ké pouvé krè ki sa vèrsé-a ka palé sèlman di sa-ya ki ka dirijé annan roun péyi. Mé si nou ka pran tan byen réfléchi, nou ka wè ki sa vèrsé-a ka fè nou sonjé roun bagaj asou Jéova ki ka konsolé ké ankourajé nou.

Annan Ecclésiaste 5:8, yé ka palé di roun chèf ki ka malmennen maléré-ya é ki pa jis ké yé. Sa chèf-a té ké gen entérè sonjé ki sopa chèf pitèt la ka gadé sa i ka fè. É pitèt menm i gen sa ankò ki pi rot pasé yé. Malérèzman, annan sèrten koté, roun pa vo ròt annan gouvèrnman-an é pèp-a ka soufri.

Détan, a kousidiré i pa gen pyès èspwar, mé sa ka ankourajé nou lò nou savé ki Jéova ka « véyé » menm sa ki chèf. É nou pouvé doumandé li idé nou é ‘jité tout nou traka asou li’ (Ps. 55:22 ; Phil. 4:6, 7). Nou savé ki « wéy Jéova ka gadé toupatou asou tout latè-a, paské i lé montré so fòrs pou tout sa ki ka adoré li ké tout yé tchò » (2 Chron. 16:9).

Atò, Ecclésiaste 5:8 ka di nou annan ki sitiasyon sa-ya ka dirijé annan roun péyi fika : i toujou gen roun moun ki gen plis pouvwar pasé yé. Mé sa ki pi enpòrtan, a ki sa vèrsé-a ka fè nou réfléchi asou sa lidé-a : a Jéova ki pi rot pasé pyès chèf, i pa gen pyès moun pi rot pasé li. Jòdla i ka sèrvi so Pitit, Jézi Kris, ki rwa Rwayonm-an, pou dirijé. Bondjé Tou-pwisan-an, ki ka gadé tout moun, toujou ka fè tout bagaj ké jistis, é so Pitit osi.