Ko téxto iñinteresantetéva heʼi: “Ani reñesorprende rehecháramo peteĩ governánte otrata vaiha umi imboriahúvape, ndojapóirõ hustísia ni mbaʼeve iporãva ipuévlo rehehápe. Nemanduʼákena upe governántepe okontrolaha peteĩ ikárgo yvatevéva. Ha umi autorida oreko jey la okontroláva chupekuéra” (Ecl. 5:8).

Ndajarekóiramo enkuénta mbaʼépa Jehová opensa ko mbaʼére, ko versíkulo haʼetévaicha oñeʼẽva umi governantekuéra rehe añónte. Péro ñapensa porãramo hese, omyesakã avei ñandéve peteĩ mbaʼe siertoguáva Jehovágui, ha upéva ñanembopyʼaguapy ha ñanemoñeñandu segúro porã.

Eclesiastés 5:8-pe oñeñeʼẽ peteĩ governánte otrata vaívare umi imboriahúvape ha ndojapóivare chupekuéra hustísia. Upe governánte imanduʼa vaʼerã ikatuha oĩ peteĩ ikárgo yvatevéva, térã ótro omanda guasuvéva chugui pe goviérnope okontroláva hína chupe. Ha ikatu voi oĩ umi ikárgo yvateve jeýva umi ótrogui. Péro ñambyasýramo jepe, umi goviérno umánope, enterove umi omandáva ikatu hína ikorrúpto, ha umi hénte oiko vaʼerã osufri upéva káusare.

Péro haʼetéramo jepe ndaipóriva esperánsa, tuicha ñanembopyʼaguapy jaikuaávo Jehová ‘okontrolaha hína umi ikárgo yvatevévape’ jepe oĩva umi goviérnope. Ñande ikatu jajerure Ñandejárape tañanepytyvõ ha ñamoĩ ipópe umi mbaʼe ñandepyʼapýva (Sal. 55:22; Filip. 4:6, 7). Ñande ningo jaikuaa ‘Jehová omaña porãha hína opa mbaʼe oikóvare ko yvy ape ári, ohechauka hag̃ua ipodér umi ojeroviávape hese ikorasõ mbytete guive’ (2 Crón. 16:9).

Upéicharõ Eclesiastés 5:8 ñanemomanduʼa mbaʼe situasiónpepa oĩ umi goviérno: Siémpre oĩha peteĩ ikárgo yvatevéva. Péro iñimportanteveha, ko versíkulo ñanepytyvõ ñanemanduʼa hag̃ua Jehová haʼeha pe Governánte Tuichavéva ha Ijojahaʼỹva. Koʼág̃a haʼe ogoverna hína Itaʼýra Jesucristo rupive, haʼéva pe Rréi ogovernáva hína pe Rréinope. Pe Todopoderóso ohecháva opa mbaʼe ihustoiterei ha Itaʼýra upéichante avei.