Nita ñäke Eclesiastés 5:8 yebätä ngwane tä ni mike töbikebätä, ñobätä ñan aune texto ye tä niere: “Mä käite kukwe käme nuainta ni bobre yebätä, kukwe ñaka ükateta kwin nitre kräke aune nitre kukwei mikata ngwarbe jai tuin mäi ngwane, ye ñaka mä töi mika niä. Ñobätä ñan aune ni ütiäte sribikä gobranbe ye ni bäri kri kräke tä mike ñärärä aune niaratre yebiti ta nitre mada bäri kri kräketre tä mike ñärärä”.

Kenanbe, blitata gobrantre kä nebätä ye aibebätä raba tuin nie. Akwa nikwe töbikaitari kwinbätä ngwane tä kukwe metre Jehovabätä mike gare nie käta ni töi mike jäme aune kwekebe.

Eclesiastés 5:8 tä blite ni iti sribikä gobranbe tä kukwe käme nuainne nitre bobre yebätä aune ñaka tä kukwe kwin ükete kräke yebätä. Ni bäri kri tärä ni sribikä gobranbe yebiti ta ngwandre törö kwe jai näre. Aune ni bäri kri niaratre yebiti ta tärä ye ngwandre törö kwe jai arato. Gobrantre kä nebätä ngätäite, gobrantre jökrä bäsi tä ja ngwen käme aune kukwe ye köböite nitre bobre bobre tä ja tare nike krubäte.

Gobrantre tä dre dre nuainne yebätä nikwe ja nuaindre ñan rabadre gare nie, akwa Jehovata niaratre mike ñärärä nüke gare nie ngwane ye tä ni töi mike jäme. Jehovakwe ni dimikadre ye ni raba ribere kisere ie aune ni raba tribe nikwe kite niara kötärä (Sal. 55:22; Filip. 4:6, 7). Aune “Jehová okwäta kä tibien ne jökräbiti ja die mikakäre tuare nitre tä niara mike täte ja brukwä tätebiti ye ütiäre” ye gare nie (2 Crón. 16:9).

Ne meden kisete Eclesiastés 5:8 ye köböire tä nemen gare nie, gobrantre kä nebätä ngätäite nitre ruäre ye bäri kri mada yebiti ta. Akwa kukwe bäri ütiäte mikata gare kwe nie ye abokän Jehová ye bäri kri aune gobranka kä jökräbätä tä ngwen törö nie. Gwä ngwane Gobran Ngöbökwe yete Jehovata Monso kwe Jesukristo yebiti gobrane. Ngöbö bäri dite krubäte ie jondron jökrä tuin, yebätä niara kukwe ükatekä metre aune Monso kwe tä ja ngwen niara erere arato.