Pama mayaɣ kɩbaŋa ŋga ka-taa se: “Ye ŋna tanɩm tɩnaa yɔɔ tɔm cɛtʋʋ nɛ nɔɔkuye nɛ siɣsiɣ tɔm nuutuu tɛtʋ taa kɔyɔ, pɩtaacɔzɩ-ŋ kiii nɛ lakasɩ nzɩ yɔ, mbʋ pʋyɔɔ yɔ Kɩlɩm cɔŋnɩ sɔsɔ yɔɔ, nɛ kɩkpaɖaa nabɛyɛ wɛ ɖɔɖɔ paba ñʋʋ yɔɔ.”—Ekl. 5:7.

Ɛyaa ɛsɩndaa lɛ, mayaɣ ŋga kɔyɔɔdʋʋ ɛyaa mba pɛwɛnɩ lone naɖɩyɛ komina taa yɔ pɔ-tɔm na. Ɛlɛ ye ɖɩɖaɣnɩ maɣzʋʋ mayaɣ ŋga kɔ-yɔɔ camɩyɛ yɔ, ɖɩnaɣ se kɔyɔɔdʋʋ ɖɔɖɔ Yehowa yɔɔ toovenim tɔm, nɛ pɩwɛɛ se tɔm ndʋ tɩhɛzɩ ɖa-laŋa nɛ tɩkpazɩ-ɖʋ ɖoŋ.

Eklesɩyastɩ 5:7 yɔɔdʋʋ wiyaʋ nɔɔyʋ tɔm se ɛnazɩɣ tanɩm tɩnaa nɛ ɛlakɩ-wɛ mbʋ pɩfɛyɩ siɣsiɣ yɔ. Wiyaʋ ɛnʋ, pɩwɛɛ se ɛtɔzɩ se pɩtʋʋ fɛyɩ se nɔɔyʋ wɛɛ nɛ ɛcɔŋnɩ-ɩ, nɛ ɛlɛ wɛnɩ lone nɖɩ ɖɩkpaɖɩ ɛ-ñɩnɖɛ yɔ komina taa. Nɛ pɩtɩla, lalaa wɛnɩ lona wena akpaɖaa yɔ. Pɩlabɩ pʋtɔdɩyɛ se ɛyaa kominawaa taa lɛ, awiya tɩŋa pɩzɩɣ nɛ akɛ muluyaa, nɛ a-mulum lakasɩ nzɩ siyeki nɛ ɛyaa tɔkɩ kʋñɔŋ.

Ɛlɛ, halɩ alɩwaatʋ ndʋ pɩwɛ ɛzɩ lidaʋ nakʋyʋ fɛyɩ paa ññɩɩ yɔ, ye ɖɩnawa se Yehowa wɛɛ nɛ ɛcɔŋnɩ ɛyaa kominawaa taa ñɩma mba pɛkɛ sɔsaa yɔ, pɩpɩzɩɣ nɛ pɩhɛzɩ ɖa-laŋa. Ðɩpɩzɩɣ nɛ ɖɩpɔzɩ Ɛsɔ se ɛsɩnɩ-ɖʋ nɛ ɖɩsʋʋ-ɩ ɖa-sʋʋtʋ. (Keɣa 54:23; Fil. 4:6, 7) Ðɩnawa se “[Yehowa] ɛsa lesiɣ tɛtʋ tɩŋa nɛ ɛhaɣ ɖoŋ mba petisiɣ ɛ-yɔɔ nɛ pɛtɛŋ pa-taa yɔ.”—4 Aw. 16:9.

Ye mbʋ, Eklesɩyastɩ 5:7 tɔzʋʋ-ɖʋ wɛtʋ ndʋ tɩwɛ ɛyaa kominawaa taa yɔ tɩ-yɔɔ; ndʋ lɛ se paa ɛzɩmtaa lɛ, nɔɔyʋ wɛɛ nɛ ɛnʋ kpaɖɩnɩ ɖoŋ. Kɔzɩ kɔzɩ lɛ, mayaɣ ŋga kapɩzɩɣ nɛ kɔtɔzɩ-ɖʋ se Yehowa kpaɖɩna, ɛnʋ kɛnɩ Kɩlɩm. Lɛɛlɛɛyɔ, ɛwɛɛ nɛ ɛtɩŋɩɣnɩ ɛ-Pɩyalʋ Yesu Krɩstʋ weyi ɛkɛ Kewiyaɣ Wiyaʋ yɔ ɛ-yɔɔ nɛ ɛtɔkɩ kewiyitu. Kɩlɩm weyi ɛwɛɛ nɛ ɛcɔŋnɩ pɩtɩŋa payɩ yɔ, ɛwɛ siɣsiɣ hɔɔlɩŋ tɩŋa taa, nɛ mbʋ ɖɔɖɔ ɛ-Pɩyalʋ wɛɛ.