وقىرمان ساۋالدارى
ۋاعىزداۋشى 5:8 دەگى سوزدەر تەك ادامي بيلەۋشىلەرگە قاتىستى ايتىلعان با، الدە ەحوباعا دا ما؟
▪ بۇل تارماقتا بىلاي دەلىنگەن: «ەگەر ٶز ايماعىڭدا كەدەيلەردىڭ قانالىپ جاتقانىن، ادىلەت پەن ادىلدىكتىڭ تاپتالىپ جاتقانىن كورسەڭ، بۇعان تاڭعالما. قولىندا بيلىگى باردىڭ ۇستىنەن قارايتىن باسقا بىرەۋ بار. اركىمنەن جوعارى تۇرعان بىرەۋلەر بار» (ۋاع. 5:8).
ادامي تۇرعىدان قاراعاندا، بۇل سوزدەر جاي عانا ۇكىمەت باسىندا وتىرعان ادامداردىڭ بيلىگىن سيپاتتاپ جاتقانداي كورىنەدى. ٴبىراق تەرەڭىرەك ۇڭىلسەك، بۇل تارماق ەحوبا جايلى جۇبانىش پەن سەنىمدىلىك بەرەتىن ماڭىزدى ٴبىر شىندىقتى دا اڭعارتادى.
ۋاعىزداۋشى 5:8 دەگى سوزدەر كەدەيلەردى قاناپ، ولارعا ادىلەتسىزدىك تانىتاتىن بيلەۋشىگە قاتىستى ايتىلعان. ٴبىراق مۇنداي بيلەۋشى مىنانى ۇمىتپاۋ كەرەك: ونىڭ ۇستىنەن قارايتىن نەمەسە بيلىك باسىندا ونىكىنەن جوعارى دارەجەگە يە بىرەۋ بار بولۋى مۇمكىن. ٴتىپتى ولاردىكىنەن دە جوعارى دارەجەلى بيلىك يەلەرى بولۋى مۇمكىن. وكىنىشكە قاراي، بۇل ادامي بيلەۋشىلەردىڭ ٴبارى پاراقور بولۋى مۇمكىن. وسىنداي ادىلەتسىزدىكتىڭ كەسىرىنەن قاراپايىم حالىق جاپا شەگەدى.
جاعداي قانشالىقتى ٷمىتسىز كورىنبەسىن، ەحوبانىڭ ٴتىپتى جوعارى تۇرعان ادامي ۇكىمەتتەردىڭ «ۇستىنەن قارايتىنىن» بىلگەنىمىز بىزگە جۇبانىش بەرەدى. ٴبىز ەحوبادان كومەك سۇراپ، بار اۋىرتپالىعىمىزدى وعان ارتا الامىز (ٴزاب. 55:22؛ ٴفىلىپ. 4:6، 7). ول «وزىنە بار جۇرەگىمەن بەرىلگەندەردى قولداۋ ٷشىن، بۇكىل جەر بەتىن مۇقيات باقىلاپ وتىرادى» (شەج. 2-ج. 16:9).
سونىمەن، ۋاعىزداۋشى 5:8 دەگى سوزدەر ادامي ۇكىمەتتەرگە قاتىستى مىنا ٴبىر شىندىقتى ايان ەتەدى: ۇنەمى ٴبىر بيلىكتەن جوعارى تۇراتىن بيلىك بولادى. ەڭ ماڭىزدىسى، بۇل تارماقتان ەحوبانىڭ بارىنەن جوعارى تۇرعان، ياعني ەڭ جوعارعى بيلىككە يە ەكەنىن بىلەمىز. قازىر ول ٶز ۇلى ارقىلى، ياعني پاتشالىقتىڭ پاتشاسى يسا ٴماسىح ارقىلى، بيلىك ەتىپ جاتىر. بارلىعىن مۇقيات باقىلاپ وتىرعان قۇدىرەتى شەكسىز قۇدايدىڭ ٶزى دە، ونىڭ ۇلى دا تولىقتاي ٵدىل.