Atuartartut apeqqutaat
Oqaluussisartup oqaasii 5:7-imi inuit aqutsinerat pineqarpa, imaluunniit Jehovap aqutsinera pineqarpa?
Versimi soqutiginartumi tamatumani ima allassimasoqarpoq: “Takugukku piitsut qunutitaasut nunamilu iluarneq naapertuilluarnerlu unioqqutinneqartut tamanna tupigusuutigissanngilat, pissaaneqartormi pissaaneqarnerusumit nakkutigineqartarpoq, sulilu pissaaneqarnerusumik taakkua qulaanniittoqartarpoq.” – Oqal 5:7.
Oqaatsini taakkunani inuit naalakkersuinerat taamaallaat pineqarsorinarsinnaavoq. Eqqarsaatigilluarutsiguli versimi Jehova pillugu ilumoortoq aamma pineqarpoq, tamannalu tuppallersaatigalugulu toqqissiallaatigissavarput.
Aqutsisoq naapertuilluanngitsoq piitsunut qunutitsisoq Oqaluussisartup oqaasii 5:7-imi allaatigineqarpoq. Aqutsisup imminerminit qaffasinnerusumik atorfilimmit naalakkersuisuniluunniit oqartussaassuseqarnerusumit nakkutigineqarunarluni eqqaamasariaqarpaa. Allaallumi taakkunannga qaffasinnerusumik inissisimaffeqartoqarsinnaavoq. Ajoraluartumilli inuit naalakkersuisuini qaffasissumik inissisimaffeqartut tamarmik peqquserluttuliortartuusinnaapput, tamannalu inuppassuit naalliuutigisarpaat.
Pissutsilli qanorluunniit ilungersunartigigaluarpata nalunngilarput Jehovap inuit naalakkersuisuisa akornanni allaat ‘pissaaneqarnerusut nakkutigigai’, tamannalu tuppallersaatigisinnaavarput. Guutimut ikioqqulluta kimigiisersinnaavugut nanertuutigisavullu tunniullugit. (Tuss 55:23; Fil 4:6, 7) Nalunngilarput ‘Jehovap nunarsuarmiittut tamaasa takusinnaagai uummatimikkut iluunngarlutik imminik tunaarinnittut pissaanermigut ikiorsinnaallugit’. – 2 Nal 16:9.
Taamaattumik Oqaluussisartup oqaasii 5:7-imi allassimasut tunngavigalugit ima inerniliisinnaavugut: Inuk kinaluunniit oqartussaassuseqaraangat tamatigut suli qaffasinnerusumik oqartussaassuseqartoqartarpoq. Pingaarnertulli Jehovap pissaaneqarnerpaajuneranik, tassa oqartussaanerpaajuneranik, versimi eqqaasinneqarpugut. Maanna ernini Jiisusi Kristusi, naalagaaffimmini kunnginngortitani, aqqutigalugu naalakkersuivoq. Ajugaqanngitsoq tamanik nakkutiginnittoq sutigut tamatigut naapertuilluartuuvoq, aamma ernera taamaappoq.