Da vas de se: “Nɔ sɔprayz we yu go ɛnisay ɛn si se dɛn de buli poman ɛn nɔ gi am in rayt; bikɔs di bigman dɛnsɛf gɛt dɛn yon bigman dɛn, ɛn dɛn wan dɛn de sɛf gɛt dɛn yon bigman dɛn we pas dɛn.”—Ɛkli. 5:​8.

If wi nɔ de si tin di we aw Jiova de si am, i go tan lɛk se na di bigman dɛn we de rul nɔmɔ dis vas de tɔk bɔt. Bɔt if wi tink bɔt am gud wan, wi go si se dis vas de tɔk bɔt Jiova, ɛn dat fɔ mek wi gɛt kɔrej.

Ɛkliziastis 5:​8 de tɔk bɔt bigman we de tek advantej pan poman ɛn nɔ de gi am in rayt. Di bigman fɔ mɛmba se ɔda pɔsin de we gɛt pawa pas am na gɔvmɛnt we go mɔs de wach am. Ɛn i go mɔs bi se ɔda pɔsin de we gɛt pawa pas da bigman de in bɔsman. Bɔt i go bi se ɔl di bigman dɛn we de na mɔtalman gɔvmɛnt kɔrɔpt, ɛn di pipul dɛn kin rili sɔfa bikɔs ɔf di kɔrɔpt tin dɛn we di gɔvmɛnt dɛn de du.

Bɔt ilɛksɛf op nɔ de, wi kin stil luk to Jiova bikɔs wi no se i de ‘wach di bigman dɛn’ we de na mɔtalman gɔvmɛnt. Wi kin beg Gɔd ɛn lɛf wi prɔblɛm dɛn na in an. (Sam 55:​22; Fil. 4:​6, 7) Wi no se “PAPA GƆD [“Jiova,” NWT] in yay de . . . ɔlsay na di wanol wɔl, fɔ sho in pawa fɔseka di wan dɛn we dɛn at klin [“we lɛk am wit ɔl dɛn at,” NWT].”—2 Kro. 16:​9.

So Ɛkliziastis 5:​8 de mɛmba wi se ɛni aw i bi, pɔsin mɔs de we gɛt pawa pas in kɔmpin. Di tin we impɔtant pas ɔl na dat di vas de ɛp wi fɔ mɛmba se Jiova gɛt pawa pas ɔlman. I de yuz in Pikin, Jizɔs Krays fɔ rul as di Kiŋ na di Kiŋdɔm. Jiova we na di Ɔlmayti de wach ɔltin, ɛn i de du tin tret, ɛn in Pikin sɛf de du tin tret.