ပှၤဖးလံာ်ဖိတဖၣ် အတၢ်သံကွၢ်
စံၣ်တဲၤတဲလီၤတၢ် ၅:၈ န့ၣ် အဲၣ်ဒိးတဲဝဲ ပှၤဟီၣ်ခိၣ်ဖိအတၢ်ပၢတၢ်ပြးဧါ မ့တမ့ၢ် ကစၢ်ယွၤအတၢ်ပၢတၢ်ပြးဧါ
လံာ်စီဆှံတဆၢအံၤ တဲဝဲလၢ “နမ့ၢ်ထံၣ်တၢ်မၤအၢ ပှၤဖှီၣ်ဖိယာ်ဖိ, ဒီးတၢ်မၤကဒံကဒါ တၢ်စံၣ်ညီၣ်ကွီၢ် ဒီးတၢ်တီတၢ်လိၤလၢ ကီၢ်တဘ့ၣ်ဘ့ၣ်အပူၤဒီး, ကမၢကမၣ်လၢ တၢ်န့ၣ်အဃိတဂ့ၤ. အဂ့ၢ်ဒ်အံၤ, လၢတၢ်ထီန့ၣ်အဖီခိၣ် တၢ်ထီတက့ၢ် အိၣ်တဂၤလၢအကွၢ်ဝဲလီၤ. ဒီးတၢ်ထီန့ၢ် အဝဲသ့ၣ်အိၣ်ဝဲလီၤ.”—စံၣ်တဲၤတဲလီၤတၢ် ၅:၈.
မ့မ့ၢ်လၢ ပှၤဟီၣ်ခိၣ်ဖိ အတၢ်ထံၣ်န့ၣ် လံာ်စီဆှံတဆၢအံၤ အဲၣ်ဒိးတဲဝဲ ပှၤဟီၣ်ခိၣ်ဖိ အပဒိၣ်ပပှၢ်တဖၣ်လီၤ. ဘၣ်ဆၣ် ပမ့ၢ်ဆိကမိၣ်အါထီၣ် ဘၣ်ဃးဒီ တၢ်ဂ့ၢ်အံၤန့ၣ် ပာ်ဖျါထီၣ်စ့ၢ်ကီး တၢ်မ့ၢ်တၢ်တီ ဘၣ်ဃးဒီး ယဟိဝၤယွၤအဂ့ၢ်လၢ အမၤမုာ်ထီၣ်ပသးဒီး ဟ့ၣ်ပှၤတၢ်မုၢ်လၢ်န့ၣ်လီၤ.
စံၣ်တဲၤတဲလီၤတၢ် ၅:၈ န့ၣ် တဲဝဲဘၣ်ဃးဒီး ပှၤပၢတၢ်တဂၤလၢ အမၤနးမၤဖှီၣ် ပှၤဖှီၣ်ဖိယာ်ဖိ ဒီးရ့ဒီးအဝဲသ့ၣ် တတီတလိၤဘၣ်. ပှၤပၢတၢ်တဂၤန့ၣ် အကဘၣ်သ့ၣ်ညါဝဲလၢ ပှၤလၢအလီၢ်အလၤ ဒိၣ်န့ၢ်အီၤန့ၣ် အိၣ်ခိးကွၢ်ဝဲ အတၢ်ဖံးတၢ်မၤတဖၣ်လီၤ. ဒီးပှၤအဂၤလၢ အလီၢ်အလၤ ဒိၣ်န့ၢ်အီၤန့ၣ် အိၣ်ဒံးဝဲလီၤ. ဘၣ်ဆၣ် လီၤသးအုးဒိၣ်မးလၢ ဟီၣ်ခိၣ်ပဒိၣ်ပပှၢ်တဖၣ်န့ၣ် ပၢတၢ်တတီတလိၤဘၣ်လီၤ. ခီဖျိလၢ အဝဲသ့ၣ်ပၢတၢ် တတီတလိၤဘၣ်အဃိ ပှၤဟီၣ်ခိၣ်ဖိတဖၣ် ထံၣ်ဘၣ်တၢ်နးတၢ်ဖှီၣ်လီၤ.
ပသ့ၣ်ညါလၢ ယဟိဝၤယွၤမ့ၢ် တၢ်ထီကတၢၢ်တဂၤလၢ အကွၢ်ဝဲ ဟီၣ်ခိၣ်ပဒိၣ်ပပှၢ်တဖၣ် အတၢ်ဖံးတၢ်မၤအဃိ ဖဲပထံၣ်ဘၣ်လၢ တၢ်အိၣ်သးဂ့ၤထီၣ် တသ့လၢၤဘၣ်အခါဒၣ်လဲာ် ပသးမုာ်ထီၣ်က့ၤဝဲသ့လီၤ. အဃိ ပဃ့ယဟိဝၤယွၤ အတၢ်မၤစၢၤ ဒီးပပာ်ထီၣ် ပတၢ်ဘၣ်ယိၣ်ဘၣ်ဘှီလၢ အလိၤသ့ဝဲလီၤ. (စံးထီၣ်ပတြၢၤ ၅၅:၂၂; ဖံလံးပံၤ ၄:၆, ၇) ပသ့ၣ်ညါလၢ “ယွၤအမဲာ်ဟးဝ့ၤဝီၤတၢ်လၢ ဟီၣ်ခိၣ်ချၢဒီဘ့ၣ်ညါ, ဒ်သိးအကပာ်ဆူၣ်ထီၣ်အသးလၢ ပှၤလၢအအိၣ်ဒီး အသးဒီဖျၢၣ်ဒီးအီၤတဖၣ်အဂီၢ်န့ၣ်လီၤ.”—၂ ကွဲးနီၣ်တၢ် ၁၆:၉.
အဃိ စံၣ်တဲၤတဲလီၤတၢ် ၅:၈ ဒုးသ့ၣ်နီၣ်ထီၣ်ပှၤလၢ ဟီၣ်ခိၣ်ပဒိၣ်ပပှၢ်တဖၣ်န့ၣ် အိၣ်ဒီးတၢ်စိတၢ်ကမီၤလီၤ. တၢ်လၢအရ့ဒိၣ်ကတၢၢ်န့ၣ် လံာ်စီဆှံတဆၢအံၤ မၤစၢၤပှၤလၢ ပသ့ၣ်ညါထီၣ်လၢ ယဟိဝၤယွၤမ့ၢ်ပှၤလၢ အထီကတၢၢ်ဒီး အတၢ်စိတၢ်ကမီၤ အိၣ်အါကတၢၢ်လီၤ. ခဲအံၤ အဝဲဟ့ၣ်လီၤဝဲအဖိခွါ ယ့ၣ်ၡူးခရံာ်လၢကပၢတၢ် ဒ်စီၤပၤတဂၤလၢ အဘီအမုၢ်အပူၤလီၤ. သ့တၢ်လၢာ်ကစၢ်န့ၣ် ထံၣ်တၢ်ခဲလၢာ်ဒီး လၢဝဲပှဲၤဝဲဒီးတၢ်တီတၢ်လိၤ ဒီးတၢ်စံၣ်ညီၣ်တီ အဃိ အဖိခွါစ့ၢ်ကီး လီၤဂာ်ဒ်သိးဒီးအီၤလီၤ.
