Sa verse interesan la dir: “Si to trouve ki, dan to rezion, ena enn gran fonksioner ki pe fer dominer ar bann dimounn mizer ek ki li pa pe respekte seki drwat ek seki zis, fode pa to etone. Parski ena enn kikenn avek enn pli gran lotorite ki pe get sa gran fonksioner-la, ek ena lezot osi ki ena pli boukou lotorite ki sa bann-la.”​—Ekle. 5:8.

Nou kapav panse ki sa verse-la koz zis lor bann dimounn ki ena enn sertenn lotorite dan enn gouvernman. Me si nou reflesi bien lor la, nou konpran ki sa ansegn nou enn verite lor Zeova, enn verite ki rekonfort nou ek rasir nou.

Ekleziast 5:8 koz lor enn dirizan ki inzis ek ki fer dominer ar bann dimounn mizer. Sa dirizan-la bizin rapel ki kitfwa ena enn kikenn ki pe get li, enn kikenn ki ena enn pli gran pozision ouswa lotorite ki li dan gouvernman. Avredir, kitfwa ena lezot osi ki ena enn pli gran pozision ki zot. Me malerezman, dan bann gouvernman imin, tou sa bann dirizan-la kitfwa zot malonet, ek lepep soufer akoz sa.

Me mem si sertin sitiasion paret pena okenn lespwar, nou kapav gagn rekonfor parski nou kone ki Zeova ‘pe get bann ki ena lotorite’ dan bann gouvernman imin. Ek nou kapav priye Zeova pou gagn so led ek zet nou fardo lor Li. (Ps. 55:22; Fil. 4:6, 7) Nou kone ki “lizie Zeova pe get partou lor later pou montre so lafors an faver bann dimounn ki ena enn leker konple anver Li.”​—2 Kro. 16:9.

Alor, Ekleziast 5:8 rapel nou ki, dan lemond ki nou pe viv, pou touletan ena enn kikenn ki ena plis lotorite ki lezot. Me pli inportan, sa verse-la rapel nou ki Zeova ena Pli Gran Lotorite ki ena. Azordi, Li pe servi so Garson pou regne dan So Rwayom. Bondie Tou-Pwisan, ki pe get tou kitsoz ek tou dimounn, Li zis ek drwat, ek so Garson osi parey.