Otesitu oyo yati: “Ine umona omuhepi mepunda-umbo liove utekulwa onya novanthu vonya vehevaviuki, vana vahalingi etyi tyaviuka, wahahuve. Mokonda una ukahi nokutumina umonwa na umwe omunene vali kwe, iya kombanda yavo kuna vali ovakuavo ovanene vali.” — Ecl. 5:8.

Mokusoka kuovanthu, otesitu ei ipopia outumini wovanthu. Mahi hatyoko vala. Otesitu ei tupu itupopila onondaka mbutupameka konthele ya Siovaa.

Eclesiastes 5:8, ipopia ovatumini valinga onya ovahepi, vevekuluminya okulinga ovipuka vehevili okulinga. Omunthu utumina, una okuhinangela okuti tupu pena ou umutumina, iya omunthu oo, weete etyi ena nokulinga. Mahi no ngotyo ovatumini ovo aveho vapondola okulinga vakuavo emphinia, vana vokuahepa ngavo vala vamona emone.

Atee umwe tyina tyimoneka ngoti tutupu vali apa tuakuatelela, okunoñgonoka okuti Siovaa weete ovatumini vatyo aveho, tyitupameka unene. Ngotyo, tupondola okuita ku Siovaa etukuateseko. (Sal. 55:22; Fili. 4:6, 7) Onthue tutyii okuti “omaiho a Siovaa ekahi nokutala kombanda yohi, opo aamene vana vemuumbila nomutima auho.” — 2 Crô. 16:9.

Tupu, Eclesiastes 5:8 itupopila etyi outumini vovanthu ukahi. Tyina ovanthu vatumina, apeho kuna umwe omunene vali ku vakuavo. Mahi otyipuka otyikuavo tyesukisa otesitu ei itulongesa, okuti Siovaa omukulami. Oe Omutumini omunene vali. Ukahi-ale nokutumina pokuatuma omona wae Sesusi Kilisitu, Ohamba Youhamba wae. Siovaa omukulami, weete ovanthu aveho iya utulinga nawa. Nomona wae, otyo ekahi ngotyo.