▪ Lo dɔ a dana taɛ ama buū kɔ: “Lo a le o muɛ̄ ziī barasī alu ebii pya kporo kuma kɛ̄ sa lɛɛ kaāna biaɛ le kaāna nu tɛ̄maloo eagabah dogo; o a ɛrɛ mma dɛɛ̄ loo nu a; nyɔnɛbee nɛɛ a kii nyɔɔ ɛrɛ nɛɛ a ye ee lo a ye ɛp, e pya a wa ee lena wa ge nyɔɔ.”—Eklis 5:8.

Aāloo kɛ̄ nɛɛ ɛp nu doo, bee kɔ ue ama kiiloo pya nɛɛ a le dɔ ekpo bu bɛbɛɛ. Mɛ a eenyɔɔ kunɛ wo, a gaa kɔnage kaka ue akiiloo Jɛhova lo a i dap gbɔ̄ sa i nɛnage e’agaloo.

Eklisiastis 5:8 kɔ nu akiiloo nɛɛ a gaa bɛɛ lo a bii nɛɛ kporo kuma kɛ̄ sa lɛɛ kaāna biaɛ yɛɛ pya ye nɛɛ. Nɛɛ a gaa bɛɛ a ɛrɛ enyɛŋiabu kɔ a ɛrɛ nɛɛ a gaa ye ɛp lo a ɛrɛ dɔ le ekpo ye ee bu bɛbɛɛ. Bu kaka, ɛrɛ pya dɔɔ̄na a ɛrɛ dɔ a ee alɛ. Alu ekiɛ̄nu kɔ dɛ̄dɛɛ̄ pya a gaa bɛɛ bu bɛbɛɛ miɔŋɔ nɛɛ dap gbe, sa su pya kunɛ nɛɛ bie bu keekee sīdee tɔga a aaloo wa pɔrɔ bɛbɛɛ.

Kerewo, kaɛlɛɛ kɛ̄ a dap bee kɔ lɔgɔ bɛābu naale loo lo kɛ̄tɔɔ̄ doo, i dap ɛrɛ egbɔ̄nyiɛ tɛ̄maloo esuā kɔ Jɛhova gaa ‘ɛp kere pya gbɛnɛ nɛɛ ba le dɔ ekpo’ bu bɛbɛɛ pya miɔŋɔ nɛɛ. I dap bara kɔ Bari a yerebah i nɛ sa i kɔ dɛ̄dɛɛ̄ i taāŋa ye nɛ. (Yɔɔ 55:22; Fil 4:6, 7) I suā kɔ “baɛ dɛɛ̄ Jɛhova [gaa] teera kiisī kii dumɛ tɛɛ̄ bu dɛ̄dɛɛ̄ nyɔuwe, lo etɔgɛ ye ekpo nyɔɔbee pya wa beenyiɛ naa ɛrɛ beebee kɛ̄ a le.”—2 Edoo 16:9.

Aāloo wo, Eklisiastis 5:8 doo kɔ i suā taɛ kɛ̄tɔɔ̄ pya nɛɛ bu bɛbɛɛ; lo a le kɔ ekpo ziī nɛɛ bu bɛbɛɛ wee ee lo dɔɔ̄na nɛɛ. Eetɔɔ̄ na bee, lo barakpaɛ̄ tɔgɛ kɔ Jɛhova na nɛɛ a ɛrɛ Ekpo A Eenyɔɔ dɛ̄dɛɛ̄ ekpo a. A gaa bɛɛ anyaawo tɛ̄maloo ye Nwiī Jizɔs Kraist alu Mɛnɛ loo ye Buɛ̄-mɛnɛ. Nɛɛ A Eenyɔɔ Dɛ̄dɛɛ̄ Nu sa gaa ɛp dɛ̄dɛɛ̄ nu lu nɛɛ a kaāna sa biaɛ leere, e kɛ̄ ye Nwiīnɛɛdam lenage doo lo.