En disen intressaunten Varsch sajcht daut: “Wan du sitst daut de oame em Launt utjenuzt woaren, un daut see nich to äa rajcht komen, dan lot die daut nich wundren, wiels een Aunjestalda paust opp äwa dän näakjsten, un eena, waut noch hecha steit, es äwa beid” (Liera 5:7).

Fa Menschen to beseenen hieet sikj daut soo, aus wan daut hia von de Rejierungsmana rät. Oba dis Varsch lieet ons uk waut von Jehova un daut kaun ons Troost un Moot jäwen.

Liera 5:7 rät von eenen Harscha, waut de Oame utnuzt un an ojjerajcht behaundelt. Dee wudd sellen doaraun denkjen, daut doa woomäajlich een hechra Rejierungsmaun es, waut am beoobacht. Un daut kaun, daut et doa en de Rejierunk noch aundre jeft, waut noch hecha stonen. Oba bie de menschelje Rejierungen kaun daut sennen, daut aul dise Rejierungsmana onopprechtich sent un daut de Menschen dan doarunja lieden motten.

Veleicht späat sikj de Loag sea schlemm. Dan kaun ons daut treesten, wan wie doaraun denkjen, daut Jehova mau rajcht de huage Aunjestalde beoobacht. Wie kjennen Gott no Help froagen un onse Laust opp am lajen (Psa. 55:23; Filip. 4:6-7). Wie weeten je: “De HAR helt de gaunze Ieed em Uag, om dee bietostonen, waut am met een onjedeeldet Hoat vetruen” (2. Chr. 16:9).

Liera 5:7 rät aulsoo doavon, woo daut vondoag dän Dach oppe Welt toojeit un daut doa emma wäa es, waut noch mea Macht haft. Oba noch wichtja es, daut dis Varsch ons halpen kaun, doaraun to denkjen, daut Jehova de aulahechsta es. Hee harscht nu aul derch sienen Sän Jesus Christus, waut de Kjennich es von Gott sien Rikj. De aulmajchtja Gott beoobacht aules un es gaunz un goa jerajcht, un sien Sän es krakjt soo aus hee.