Iren Paipelo mahsanih: “Ma ke kilang kaunen omw wehio eh kahpwalihala me semwehmwe kan oh sohte mweidohng irail arail pwung, dehr pwuriamweiki ire wet. Pwe kaun lapalapo mie me mi pohnangi me kin tetehk ih, oh pil mie meteikan me pil lapalapasang ira.”​—Ekl. 5:8, NW.

Ma kitail sohte medewe dahme Siohwa ketin medewehki ire wet, iren Paipel wet pahn mwomwen ndinda kaun kan nan palien koperment. Ahpw ma kitail medewe laudsang met, e pahn pil kasalehda ire mehlel ehu duwen Siohwa, oh met pahn kangoange oh kamweitkitailla.

Eklesiasdes 5:8 kin dokedoke kaun emen me kin kahpwalihala me semwehmwe kan oh sohte mweidohng irail arail pwung. Kaun menet anahne tamataman me mie emen me kin tetehk ih me lapalapasang oh ahneki manaman laudsang ih nan koperment. Ni mehlel, ele mie meteikan me pil lapalapasang. E kansensuwed me nan koperment en aramas akan, kaun akan koaros mwersuwed, oh aramas akan kin wie lokolongki arail kaunda mwersuwed oh sohte pahrek.

Ahpw mendahki ma soahng koaros mwomwen solahr mie koapworopwor, kitail kak ahneki nsenamwahu ni atail ese me Siohwa kin ketin ‘tetehk pil kaun lapalap kan’ nan palien koperment. Kitail kak peki sawas sang rehn Koht oh mweidohng ih atail kahpwal kan. (Mel. 55:22; Pil. 4:6, 7) Kitail ese me Siohwa “kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.”​—2 Kron. 16:9.

Eri, Eklesiasdes 5:8 kin katamankihong kitail duwen irair en sampah wet oh me ahnsou koaros mie emen me ahneki manaman me laudsang meteikan. Kesempwal sang met, iren Paipelo kak sewese kitail en medemedewe ire mehlelo me Siohwa iei me keieu ketin ileile, me sapwellimanki manaman me keieu lapalap. Met e ketin wie kakaun sang ni eh ketin doadoahngki sapwellime Ohlo, Sises Krais, Nanmwarki en Wehio. Me Keieu Manamano, Siohwa, me kin ketin tetehk soahng koaros oh pil aramas koaros, kin sapwellimanki pwung pahrek ni unsek, pil duwehte sapwellime Ohlo.