A tekst disi e taki: „No skreki te yu si taki sma e pina den wan di pôti. Iya, no skreki te sma no e koti krutu na wan reti fasi noso te den no e du san reti na ini a kontren pe wan granman e tiri, bika wan sma di hei moro den heihei man disi e si san e pasa èn yu abi tra sma di hei moro den heihei man disi.”​—Preik. 5:8.

Te yu e luku a tekst disi libisma fasi, dan a gersi leki a e taki soso fu libisma tiriman. Ma te yu luku en moro fini, dan yu o si taki a e taki wan sani fu Yehovah tu. A sani disi e gi wi trowstu nanga howpu.

Preikiman 5:8 e taki fu wan tiriman di e pina pôtisma èn di no wani du san reti gi den. So wan tiriman musu hori na prakseri taki wan sma di abi wan moro hei posisi e si san a e du. Sobun, wan moro hei tiriman de. Fu taki en leti, moro sma de kande di hei moro en. A sari fu si taki furu libisma tiriman kruka èn taki na a pipel e firi den bakapisi fu den kruka èn ogri sani di den e du.

Ma awinsi a gersi leki na so a libi de kaba, toku wi e kisi trowstu fu di wi sabi taki Yehovah e si san den heihei man na ini den regering e du. Wi kan begi Gado èn wi kan fruteri en ala san e moro wi (Ps. 55:22; Fil. 4:6, 7). Wi sabi taki „den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati”.​—2 Kron. 16:9.

Sobun, Preikiman 5:8 e memre wi san na a trutru situwâsi fu den tiriman fu den kondre: Ala ten wan sma de di hei moro den. Ma san moro prenspari, na taki a tekst disi kan yepi wi fu hori na prakseri taki Yehovah hei moro den alamala. Iya, en na a Moro Hei Tiriman. Now a poti en Manpikin Yesus Krestes leki Kownu fu en Kownukondre. Na Almaktiwan Yehovah e si ala san e pasa, ala ten a e du sani na wan reti fasi, èn na so en Manpikin de tu.