Mstari huo unaochochea fikira unasema: “Ukiona maskini wakikandamizwa kwa njia yoyote ile na haki na uadilifu zikikiukwa katika wilaya yenu, usishangazwe na jambo hilo. Kwa maana ofisa huyo mkuu anatazamwa na yule aliye juu zaidi yake, na kuna wengine walio juu zaidi yao.”​—Mhu. 5:8.

Kwa mtazamo wa kibinadamu, andiko hilo linafafanua vizuri wale wenye mamlaka katika serikali. Lakini zaidi ya hilo, mstari huo unafunua kweli fulani kumhusu Yehova, ambayo inapaswa kutufariji na kutuimarisha imani.

Andiko la Mhubiri 5:8 linarejelea mtawala ambaye anawakandamiza maskini na kuwanyima haki zao. Mtawala huyo kukumbuka kwamba anatazamwa na mtu mwingine aliye juu zaidi yake au aliye na mamlaka kubwa zaidi kuliko yeye katika serikali. Isitoshe, huenda kuna wengine walio katika cheo cha juu hata zaidi ya hao. Inasikitisha kwamba katika serikali za kibinadamu, huenda watawala hao wote ni wafisadi na ni lazima watu wa kawaida wakabiliane na hali ya kwa haki na viongozi hao wenye vyeo mbalimbali.

Hata hivyo, haidhuru hali zinavunja moyo kadiri gani, tunaweza kufarijika kwa kujua kwamba Yehova ‘anawatazama hata maofisa hao wakuu’ katika serikali za wanadamu. Tunaweza kumwomba Mungu atusaidie na tunaweza kumtupia mizigo yetu. (Zab. 55:22; Flp. 4:6, 7) Tunajua kwamba “macho ya Yehova yanaenda huku na huku duniani kote ili adhihirishe nguvu zake kwa niaba ya wale ambao moyo wao ni kamili kumwelekea yeye.”—2 Nya. 16:9.

Hivyo, Mhubiri 5:8 inatukumbusha hali halisi kuhusu viongozi katika serikali; sikuzote kuna aliye na mamlaka kubwa zaidi kuliko mwingine. Jambo la muhimu hata zaidi, mstari huo unaweza kutusaidia kukumbuka kwamba Yehova ndiye aliye juu zaidi, naam, mwenye Mamlaka Kuu Zaidi. Sasa anatawala kupitia Yesu Kristo, Mwana wake, Mfalme wa Ufalme. Mweza-Yote anayeona mambo yote, ndiye mwenye haki kamili na hana upendeleo, na ndivyo Mwana wake alivyo pia.