Tsalwa leri, leri tlakusaka swivutiso swo tala ri hlayeka hi ndlela leyi: “Loko u vona swisiwana swi tshikileriwa naswona vanhu va nga avanyisiwi hi ndlela leyinene emugangeni lowu u tshamaka eka wona, swi nga ku hlamarisi. Hikuva ndhuna yoleyo yi vekiwe tihlo hi loyi a nga ehenhla ka yona naswona ku ni van’wana lava nga ehenhla ka volavo.”—Ekl. 5:8.

Tsalwa leri, swi ti komba onge ri vulavula hi vanhu lava nga ni vulawuri eka mfumo. Kambe ri tlhela ri vula ntiyiso wun’wana lowu hi chavelelaka ni ku hi tiyisa nhlana mayelana na Yehovha.

Eklesiasta 5:8 yi vulavula hi mufumi loyi a tshikilelaka swisiwana naswona a nga ni mona. Mufumi yoloye u fanele a tsundzuka leswaku ku na un’wana loyi a nga ni vulawuri ku n’wi tlula loyi a n’wi tlhomeke tihlo. Swi nga endleka leswaku ku ri na van’wana lava nga ni vulawuri lebyi tlakukeke. Kambe lexi twisaka ku vava, swi nga endleka vafumi hinkwavo va ri ni vukungundzwana naswona sweswo swi endla leswaku vanhu va xaniseka.

Hambiloko swi vonaka onge a ku na laha hi nga rilelaka kona, swa chavelela ku tiva leswaku Yehovha u va langutile vafumi volavo. Hi nga kombela ku pfuniwa eka Xikwembu hi tlhela hi lahlela mindzhwalo ya hina eka xona. (Ps. 55:22; Filp. 4:6, 7) Ha swi tiva leswaku “matihlo ya Yehovha ma fambafamba emisaveni hinkwayo leswaku a pfuna lava n’wi tshembaka hi mbilu hinkwayo.”—2 Tikr. 16:9.

Eklesiasta 5:8, yi tsundzuxa vafumi leswaku va tshama va swi tiva leswaku mikarhi hinkwayo ku na un’wana loyi a nga ni vulawuri lebyi tlakukeke ku tlula bya vona. Xa nkoka swinene, tsalwa leri ri hi tsundzuxa leswaku Yehovha hi yena Mufumi Lonkulu. Sweswi wa fuma hi ku tirhisa N’wana wakwe Yesu Kreste, loyi a nga Hosi ya Mfumo wa Xikwembu. Lowa Matimba Hinkwawo, loyi a vonaka swilo hinkwaswo, u fuma hi ndlela leyinene swin’we ni N’wana wa yena.