Orukarra runu orurukuhuniriza nirugamba ngu: “Obworaba norora okwenderezebwa kwabanaku, nokucwere’ra emisango okwokunyaga nokuhende’ra ebyobulyo omu masaza, otahuni’ra eki: baitu ogu arukukira abakuru obukuru aroleriire; kandi haroho abakira bo obukuru.”​—Mug. 5:8.

Kakuba tutatekerezaaho omulingo Yahwe aroramu ensonga enu, orukarra runu nirusobora kusisana nk’orurukubazaaho abantu abaine obusobozi omu gavumenti bonka. Baitu kakuba turwecumitirizaaho, nitukyetegereza ngu nirubazaaho n’amananu agarukukwata hali Yahwe, kandi kinu kisemeriire kutuhuumuza n’okutugarramu amaani.

Omugambizi 5:8 nirubazaaho omulemi ow’arubatirra abanaku kandi ow’abatwaza omu mulingo ogutali gw’obwinganiza. Omulemi ogu asemeriire kukiijuka ngu nikisoboka kuba ngu haroho omuntu arukumurora ow’aine ekiikaro rundi obusobozi omu gavumenti oburukukira obwe. Kandi, nikisoboka kuba ngu haliyo n’abandi abaine ebiikaro ebirukukirra kimu ekye. Eky’obusaasi, omu gavumenti ez’abantu, n’abalemi banu nibasobora kuba balibenguzi, kandi abantu ababuli kiro nibasobora kubonabona habw’obutali bwinganiza bunu.

Baitu, n’obukiraaba ngu omu nyikara ezimu kizooka ngu busaho ah’okwirukira, nikituhuumuza kukimanya ngu Yahwe ‘arora n’abalemi abakuru’ abali omu gavumenti ez’abantu. Nitusobora kwesengereza Ruhanga atukonyere kandi tumunagira omugugu gwaitu. (Zab. 55:22; Baf. 4:6, 7) Tukimanyire ngu “amaiso ga Mukama nigagendagenda hona omu nsi yona, ayeyoleke wamani habwabo omutima gwabu oguli guhikiriire namberali.”​—2 Byom. 16:9.

Nahabweki, Omugambizi 5:8 nirutwijukya ensi eiturumu, kandi nk’oku hakira kubaho omuntu arukukira abandi obusobozi. Baitu ekikuru, orukarra runu nirusobora kutwijukya nk’oku Yahwe nuwe arukukirrayo kimu obukuru, ego nuwe Ow’obusobozi bwona. Hati nalema kurabira omu Mwana we, Yesu Kristo, Omukama ow’Obukama bwe. Ow’obusobozi bwona, arukurora buli kimu na buli omu wena, Uwe w’obwinganiza kandi n’Omwana we nukwo ali.