Questo versìcolo tanto interessante el dise: “No stà spaventarte se quel che el ga autorità nela to region l’è drio far el poareto sofrir, o se no l’è drio dar ale persone el dirito de esser giulgade con giustìssia. Parché qualchedun che el ga ancora de pi autorità che lu, l’è drio vardarlo, e sora questi ghen’è anca altri che i ga ancora de pi autorità.” — Ecl. 5:8.

Quando noantri ledemo queste parole, la prima roba che pensemo l’è la autorità dei governi umani. Ma quando pensemo un pochetin de pi sora questo testo, noantri capimo che lu l’è anca drio mostrar una verità sora Geovà, che la ne dà consolo e la ne assa pi contenti.

Eclesiasti 5:8 el parla de un governante che el fà i poareti sofrir e che no’l trata le persone con giustìssia. Questo governante el ga de ricordarse che qualchedun che el ga de pi autorità che lu, l’è drio vardarlo e sora questi ghen’è anca altri che i ga ancora de pi autorità. Ma l’è vera che tuti questi governanti fursi i fae robe ingiuste e sbaliade e le persone le sofre.

Ancora che la situassion la sìpia tanto bruta, noantri restemo contenti de saver che Geovà el vede tuto quel che sucede. Noantri restemo anca contenti parché savemo che Geovà el pol giutarne a infrontar le nostre dificoltà. (Sal. 55:22; Fil. 4:6, 7) Noantri savemo che Geovà el varda tuto quel che sucede qua nela Tera e lu el giuta quei che i lo serve de tuto el so cuor. — 2 Cró. 16:9.

Alora, ghemo capio in Eclesiasti 5:8 che intrà i governanti umani, un sempre el gavarà de pi autorità che quelaltro. Ma noantri ghemo imparà una roba ancora pi importante. Cossa? Che Geovà l’è la pi granda autorità che ghen’è. Geovà l’è drio doperar el so Fiol, Gesù Cristo, par governar el so Regno. L’è bel saver che Geovà e Gesù, che i ze quei che i varda pròpio tuto, i fà tute le robe con giustìssia.