Te ʼu Fehuʼi ʼa Te Kau Lautohi
ʼE palalau pe koa ia Ekelesiasi 5:8 ki te ʼu pule fakatagata, peʼe toe palalau ai ʼo ʼuhiga mo Sehova?
ʼE lelei ke tou fakakaukauʼi te vaega ʼaia. ʼE tou lau fenei ai: “ ʼAua naʼa ke punamaʼuli mo kapau ʼe ke sio ʼi tou potu fenua, ʼe gaohi koviʼi te kau masiva pea ʼe mole fakahoko te faitotonu. Koteʼuhi ʼe sioʼi te tagata takitaki ʼaia e he tahi ʼe maʼoluga age ia ia, pea ʼe ʼi ai ʼihi ʼe natou maʼoluga age ia naua ʼaia.”—Ekl. 5:8, NWT.
ʼE feala pe ke tou ui ʼe talanoa te vaega ʼaia ki te ʼu pule taki ʼo he puleʼaga. Kae kapau ʼe tou vakavakaʼi lelei te vaega ʼaia, ʼe toe fakaha ai he manatu fakalotofimalie ʼo ʼuhiga mo Sehova.
Ia Ekelesiasi 5:8, ʼe talanoa ai ki he pule taki ʼe ina gaohi koviʼi te kau masiva pea ʼe heʼe faitotonu. Kae ʼe lelei ke ina manatuʼi ʼe lagi sioʼi ia ia e tona pule. Pea ʼe lagi ʼi ai ʼihi ʼe natou maʼoluga age ia naua ʼaia. Kae meʼa fakaʼofaʼofa, koteʼuhi ʼi ʼihi fenua, ko natou fuli ʼae ʼe maʼu tuʼulaga ʼi te puleʼaga ʼe natou agakaka, pea ʼe mamahi te hahaʼi ʼuhi ko tanatou aga heʼe faitotonu ʼaia.
Logo la ʼe hage ʼe mole he puleʼaki ki te faʼahi ʼaia, kae ʼe fakalotofimalie tatatou iloʼi ʼae ʼe toe “sioʼi” e Sehova ia te kau takitaki ʼo te ʼu puleʼaga. ʼE feala ke tou kole ki te ʼAtua ke tokoni mai pea ke tou tuku kia te ia ʼatatou kavega. (Pes. 55:23; Flp. 4:6, 7) ʼE tou iloʼi “e taka te u mata o [“Sehova,” NWT] i te kele katoa, o tupu ke tokoni kia natou ae e tuku katoa onatou loto kia ia.”—2 Klk. 16:9.
Koia, ʼe fakamanatu mai ia Ekelesiasi 5:8, ʼi te ʼu puleʼaga fuli ʼo te temi nei, ʼe ʼi ai tuʼumaʼu pe he tahi ʼe maʼoluga age ʼi he tahi. Kae ko te manatu maʼuhiga ʼae ʼe fakaha mai ʼi te vaega ʼaia, ʼe ko Sehova ʼae ʼe ina maʼu te Pule Maʼoluga. Pea ko tona ʼAlo, ia Sesu Kilisito, ʼae ko te Hau ʼo te Puleʼaga, ʼe ina fakafofoga te pule ʼo tana Tamai ia ʼaho nei. Ko te ʼAtua maʼoluga, ʼae ʼe ina sioʼi te hahaʼi fuli, ʼe faitotonu ʼo toe feia mo tona ʼAlo.