AZihova akạr ri angọ inyaạm bumor phọ abuẹn phọ omhoọgh bọ idiphọ oophugh ogbạ ikpo onhụ phọ. Lhạ phọ aḍiphẹ phọ, onhụ abạl abukọy eten phọ aḅuạ ni 225 aghị asi 350. Kụ epẹ kụ eḅẹl amem dị abukaaphọm dị opel li 8,000, ogẹ iiḍighi phọ abidị oghiọm emhụ agadạ phọ. Aḍisẹph phọ aZihova esi arukumuan phọ abidị, iḍigh ni ḍiigu esi abidị.

Ḍughul otu aMarch 21, 1920, epẹ New York City, aJoseph F. Rutherford, opọ aḍiemhiom bọ Nmụny Askul ABaibul phọ mem mọ opọ phọ, aḅilhẹ ni angọ oghaạph phọ aḅẹm bọ mọ “Millions Now Living Will Never Die.” Anmụny Askul ABaibul phọ ulhọgh ni inyaạm dị emhanhạm omhiịn mọ bidị oomhaghạgh ni we oru onhaghạn aani oghaạph phọ. Kụ bidị usighẹ ni ikpoki oghị okpẹ ilọ osighẹ ogbogh otu areephegh phọ epẹ New York, ophamhạm ookpomhoghan phọ ophọn phọ, kụ oḅilhẹ odiighi rinyạ aḍimhạgh dị remạn ni 320,000.

Awe phọ umhegheron ni ḍimhạgh phọ eten dị olhoghi u/seere. Awe dị oḍigh olhoghi esi phọ bịn omuza umhạn 5,000, kụ 7,000 oghelheghu loor iduọn esi phọ i/ḍigh bọ. AWatch Tower phọ aḅẹm mọ “ophọn phọ oniin esi ikạr igbogh arookpomhoghan dị Anmụny Askul ABaibul phọ mophạm ghan dị amhoọgh ekol.”

Bịn Anmụny Askul ABaibul phọ oolheghaany idiphọ awe dị rogbeelhom ghan emhuoghaạph phọ eḅẹm bọ mọ, “millions now living will never die.” Mem mọ amuphẹ phọ, bidị ko/nhaghanhạn mọ kokaạph ni dom Omhạr phọ oleenye elheeny. Ghalhamọ r’iduọn phọ ni, oophugh phọ abidị aḍighan ni elhegh. Onyọ umarani dị oghol mọ Ida Olmstead, dị amhiigh aani ituughạ lhạ phọ 1902, aḅẹm mọ, “Yoor ulhegheri ni mọ aḍigbogh aḍisẹph edi ni rekori oomo omhạr awe, kụ yoor u/bilhẹ oghaạph ghan iiḅi iinhaghạn phọ oḅenhị abuphẹ yoor oteẹny ghan bọ epẹ erugh phọ.”

Omhiịn mọ awe obạl ghan ni Ekpo Onhụ phọ Enhaạn, abumor r’abumarani phọ okumuan ghan bọ Betẹl umhiigh ni olhẹm aani arinyạ phọ ayira. Bidị ughooghi ni simasịn olhemhọm okpamhaghị otu dị bidị okpẹ ni ikpoki dị arọl epẹ 35 Myrtle Avenue, Brooklyn, New York, esi phọ i/kạr ikelhạn Betẹl.

ALeo Pelle r’aWalter Kessler umhiigh aani rukumuan aBetẹl unwanyụ aJanuary 1920. AWalter aḅẹm mọ “mem mọ yoor osi bọ, onyọ umor phọ rapogh bọ esi phọ rolẹm ghan bọ rinyạ phọ uḅenhị  iyoor mọ, ‘Nyinha emoọgh oniin awạ r’egbem okumuan kụ egbi oteẹny amem dị kole eḍien ootaany.’ Kụ uḅenhị iyoor ophoopheyogh asikatọn arinyạ phọ ediighi bọ ephẹn ude otu phọ oghimọm epẹ anyụ phọ.”

ALeo aḅẹm mọ ḍieriphọ aḍio phọ: “Oḍighi ayoor aḍighi ootol ghan iikpe otu ude phọ. Kekulha mị ko/ḍighi ghan oḍighi dị aḍigh idiphọ eenịr. Kuolọ aḍighi oḍighi Omoọgh–we phọ, kụ iḍighi kụ amhạn maạr agey.”

Esi iyạl ikpo asiwiki, Abumor dị omhoọgh oophugh ulhẹm ni Watch Tower phọ omiteom. Bidị umiteom odiiny-dị oonịr aWatch Tower aFebruary 1, 1920 dị eego esi amasịn phọ ragẹ ghan bọ rinyạ phọ, arọl bọ epẹ eedaneẹn otu anyụ phọ. Kụ ephẹn ude phọ, kụ edị abumor phọ okpamaghị bọ amasịn olhemọm arinyạ phọ. Bidị umhiighom olhẹm aani kẹn Golden Age opọ April 14, 1920. Iikia i/lo, aZihova asẹph ni ikuph phọ abumor phọ abuẹn phọ olhọgh bọ r’ophooph olhoghi.

Awe phọ oḅạr bọ aZihova uḅilhẹ ni omhiigh oḍighi iphelhegbeel phọ r’oophugh ḅilhẹ r’amuḅọph. Kuolọ abuniin Anmụny Askul ABaibul phọ uwilhẹ ni ookpomhoghan phọ mem mọ iiḅaghamhị phọ emheel bọ lhạ phọ 1917 kụ eghị esi 1919. Koḍighi ika kụ ologhonhaạn buẹn phọ ḍighaạgh?

AWatch Tower April 1, 1920, aphạm ni emhuoghaạph dị eḅẹm mọ “Oḅophoghạn Orọl R’eephọ.” Kụ siphẹ phọ ilọm irọl li dị elhọm buẹn momheel bọ oḍuạ mọ: “Yoor okuphom ni owol mọ . . . torobọ oye dị amhoọgh aani uwaloor Omoọgh-we phọ . . . aakolhobian ni owulha ipẹ meten bọ, . . . orue oḅophoghạn orọl r’amuḅọph kụ oghiọm aghisigh idiphọ aḍiniin aloor.”

Ibadị abuẹn phọ umhegheron ni agey oghị esi ilọm mọ ipẹ phọ. Oniin olom r’anhịr uḅẹm mọ: “Yoor uru ni olhegheri mọ eḍighi ni opiomạn iduọn yoor u/pinom aani bọ bin oḍighi oghaạph iiḅi iinhaghạn phọ nana phọ r’asiạ phọ ipẹ meten bọ, mem dị abunhọn rokumuan. . . . Yoor oḍuom ni olhoghi mọ r’amem r’amem yoor ko/meel mun oḍuạ.” Abumor phọ abuẹn phọ oḅilhẹ bọ oomhanham umhoọgh ni oboom oḍighi dị rakori bidị.

Unwanyụ aJune 21, 1920, Anmụny Askul ABaibul phọ umhiigh ni odiighi “ZG,” phọ,  The Finished Mystery phọ dị oḍighinhọm oyoghoyoghọ okpogho. * Ukpolhoghi ni iboom kụ oseere mem mọ abuọ itooghị phọ osophoghom bọ ḍinyạ phọ lhạ phọ 1918.

Umhạgh ni oomo abukaaphọm, ko/gina abukọy eten bịn, mọ ophinom aani bin odiighi aḍinyạ phọ aḍiẹn phọ. “Torobọ oye siphẹ ookpomhoghan phọ dị maḅọgh loor angọ aḅilhẹ aḍiiny muụm kụ katue ni apinom aani bin, aḍighi iduọn phọ r’ophalhabaạl olhoghi. Torobọ oye aḅẹm ghan mọ: ‘kụ eniin iyaạr dị mị raḍighi,’—pọ odi ZG phọ.” Edmund Hooper aḅẹm mọ oḍighi odiighi ZG phọ kụ okạr oḅẹl oḍuạ otu ogbạ otu dị bidị oḍighi. Odị aḅarạm mọ, “Yoor umhiigh ni onhaghanhạn okạr ipẹ eḅaramaạm bọ orue oḍighi oḍighi phọ ophọn phọ eten dị katarạ apu ipẹ yoor ootughiạn bọ.”

Eḍighi bọ edị ekpạr bọ oghaaphạn Anmụny Askul ABaibul phọ odi bọ inhọn areelhe phọ mem Eḅẹl Eghạm Oomo Aḅirinhi phọ, Umor phọ Rutherford awạ ni okparamhị abumor phọ r’oḅilhẹ omhiigh arukumuan iphelhegbeel phọ reelhe phọ ipẹ phọ. Esi iduọn phọ, unwanyụ August 12, 1920, odị r’abunhọn inya abumor unyeenhe ni oghị, oḍuạ ekpisi ogbạ ekpisi oomo phọ epẹ Britain, Europe, r’aMiddle East.

Mem mọ aRutherford asi bọ Britain, Anmụny Askul ABaibul phọ uphạm ni iraạr arookpomhoghan eephugh r’12 ituughạ dị ophạm esi ogbo. Oomo awe phọ osoor bọ umhạn 50,000. Rakaạph bọ ilọ erelhe phọ ephẹn phọ, AWatch Tower phọ aḅẹm mọ: “Arighirị phọ uumhanham ni oḅilhẹ okpạr. Ikạr kụ ekparamhị ephomhoghiạn phọ abidị, kụ oḅophoghạn esi iiḍighi, kụ ibadị dị arokpom mọ m’eeph oḅilhẹ omhoọgh oḅaạl olhoghi.” Kụ epẹ Paris, Umor phọ Rutherford aḅilhẹ ni angọ emhuoghaạph phọ eḅẹm bọ mọ “Millions Now Living Will Never Die.” Tutụ oghaạph phọ ramiigh bọ, awe mophạgh esi phọ ophạm bọ oghaạph phọ. Iraạr arukuron awe ulhọm ni mọ bunọ rowạ oḅilhẹ olhegheri opuemhi ipẹ bidị monhaghạn bọ.

Siwiki phọ edaphạn bọ siphẹ, bidị ughị ni Athens, Cairo, r’aJeruselem. Orue olhoghonhaạn aḍighaạgh budị oḍeenhaan ḍiḅeraạn rikpisi phọ iphẹn phọ, Umor phọ Rutherford aphighi ni olạ agadạ egbogh emhạ dị oghol mọ Ramallah, etuman bọ Jeruselem. Ipẹ reten kụ odị aḅilhẹ aḅula epẹ Europe kụ aphighi Olạ agadạ phọ aCentral European dị kolẹm ghan rinyạ phọ ayira.

Alhạ phọ 1920 rekị bọ omhuuneen, Anmụny Askul ABaibul phọ umiteom ni The Golden Age opọ amhunhehiom bọ 27, odị agbatanhaạn ni, idị eḍighi bọ ayegherọn ikpuuroghọm mọ Anmụny Askul ABaibul phọ osoman bọ lhạ phọ 1918. Amasịn olhemọm arinyạ phọ, aḍighi ghan oḍighi ḍughul r’ootaany olhẹm ghan arinyạ dị repel li inya ariisi erubal.

Abuẹn aạl ghan bọ amagazin phọ, aạl li omhiịn ilọ aḍighiton pho Emma Martin. Umarani phọ Martin aḍighi ghan okọy eten epẹ San Bernardino, California. Kụ ḍughul otu aMarch 17, 1918, odị r’iraạr abumor, E. Hamm, E. J. Sonnenburg, r’E. A. Stevens, ughị aani obạm ookpomhoghan dị Anmụny Askul ABaibul phọ ophạm.

Oniin oye dị aghị aani ituughạ phọ, o/ghị otuughạ aBaibul. Oye phọ ophọn phọ aḅẹm mọ “Abugboom iiruẹn phọ kụ urom imhị . . . oghị ituughạ phọ. Mị ughị owạ iyaạr osiphom abidị olhogh.” Odị ateẹny ni “iyaạr” otuạn osiphom abidị olhogh phọ, ateẹny ḍinhiin aḍinyạ The Finished Mystery phọ. Iyạl asiḍughul otu reten, usiph ni Umarani phọ Martin r’iraạr phọ abumor phọ. Usiph bidị olhogh odi arinyạ dị itooghị phọ mosophoghom.

Usoph ni ophumhe Emma r’iraạr phọ arighirị phọ odị, kụ osophonhaan bidị ikoli iraạr asiạ. Bidị ugbo ni ogbo ikika amem ilọ ooruẹn phọ ophọn kuolọ i/ḅọph, tutụ eteẹny bọ ḍughul otu aMay 17, 1920, bịn bidị u/moọgh mun elhiom oḅilhẹ ogbo ogbo phọ. Kụ bidị ogboton oghị ikoli phọ. Kuolọ i/bia bịn araraạr enhighẹ.

Unwanyụ aJune 20, 1920, Umor phọ Rutherford aghaạph ni ilọ iphẹn emitenhaan bọ bumor phọ abuẹn phọ siphẹ ookpomhoghan eephugh phọ ophạm bọ epẹ San Francisco. Olhoghi aḍita phọ osoor bọ o/ḅaạl esi eten phọ epẹ ozoọm bọ bumor phọ abuẹn phọ, kụ bidị ogẹ ḍinyạ oghiọm otooghiạ phọ United States. Bidị ugẹ mọ: “Yoor omiịn mọ ooruẹn phọ osophonhaan bọ . . . Anhịr aMartin . . . odaphạn olhogh phọ, eḍighi ekeeny ooruẹn . . . Abuọ itooghị phọ oḍighinhom iikpọ phọ abidị eten dị i/kpeanhaạn esi . . . oḅian . . . osophonhaan Anhịr aMartin . . . ekeeny ooruẹn bịn olhọgh odị ikoli, . . . yoor omiịn mọ ebeeph ni iboom.”

Ḍieriphọ aḍio phọ, bịn Otooghiạ phọ Woodrow Wilson, atọ mọ ooruẹn phọ osophonhaan bọ Umarani phọ Martin r’aBumor phọ Hamm, Sonnenburg, r’aStevens o/mheerạ esi. Bịn osereghi bidị ikoli phọ.

1920 r’asi bọ eekunha, Anmụny Askul ABaibul phọ umhoọgh ni ibadị araraạr otuạn omhoọgh oḅaạl olhoghi. Arukumuan emhụ agadạ phọ eghiọm ghisigh bịn erarạ ghan. Dị epu ni ilọ inhọn amem abugey aKristẹn ugbeelhom ni ilọ Omhạr phọ k’Enhaạn idiphọ eekonhom iiḅaghamhị omhạr awe. (Mat. 24:14) Kụ lhạ phọ etum bọ siphẹ, 1921, ikạr kụ emhoghi iboom ikuph ogbeelhom igey Omhạr phọ.