O Micekiway to Fangcalay Cudad fanekfekay a mitosil, soˈlinay pafelien ni Yihofa cangra to ˈicel. Toya mihecaan, o ˈaloman no misakafahay mikitini 225 tamdaw matongalay tangasa 350 a tamdaw. Roma i, o mihokokay mitosil a tamdaw sakinacecay mataˈlif ko 8,000 tamdaw. Palemedan ni Yihofa cangra, mansa ira ko adihay ko micadaay a tamdaw.

Itini lalomaˈ no Micekiway to Fangcalay Cudad o salikaka ci Yosif Rosofo, itini 1920 miheca 3 folad 21 romiˈad wa mihadak cingra to kimad, lalangian i “O Maˈoripay Anini Masacaˈolay Simoˈot Efan a Tamdaw Tahadaˈoc Cowa ko Mamapatay.” Misarocoday ko Micekiway to Fangcalay Cudad a mitahidang to tamdaw mitengil toniya kimad, miesoyay cangra to taˈangayay pisacohiyan, hanaca palilamay to 32 efan a satahidang.

Kafahkaan ko harateng no mitengilay. Pikimadan a romiˈad, matomesay to 5,000 tamdaw ko kamaroˈan, iraayho ko 7,000 tamdaw awaay ko kamaroˈan cowato ka ngaˈay micomod. Sowal no Mikecolay, itini taykay no Micekiway to Fangcalay Cudad, o samalaˈosiyay konini!

Itiya ˈalomanay tamdaw tahatengilay to salasil no micekiway to Fangcalay Cudad: “O Maˈoripay Anini Masacaˈolay Simoˈot Efan a Tamdaw Tahadaˈoc Cowa ko Mamapatay.” Itiya, soˈlin cowa ka fanaˈ ko Micekiway to Fangcalay Cudad to adihayayho ko dademaken a mitosilay tayal, kawra ora fanekfekay a harateng nangra masakasemeran. Ci Ayta, Awmoste fafahiyan salikaka itiniho 1902 miheca misatapangayto mirienang to saˈopo, sanay milomal cingra: “Mafanaˈay kako, adihayay ko misadayan ni Yihofa i tamdaw a sapalemed, mansa misarocod kita itini pitosil a mifanaˈ to ngaˈayay lihaf i tamdaw.”

Pakayni sapakaenaw to salikaka to sapahaled to pakasoˈlinay falocoˈ a ‘kakaenen,’ itiniay Pitil a salikaka misatapangay miinsac to cudad. Itini Niwyok Prokelin Motee 35 fanko miesoyay to cecay lomaˈ, misaday to sapiinsac a kikay.

Riaw Pile salikaka aci Woete. Kaysele salikaka itiniay 1920 miheca 1 folad tayra i Pitil. Sanay ko sowal ni Woete: “Tahira aca kami, minengnengay ko kantok no piinsacan pasowal tamiyanan: “ˈAyaw no malahok iraayho ko cecay irako kalitos a toki namo.” Ikor, miocoray cingra tamiyanan tayra laenoay a lomaˈ micoloˈ to masahakoay a cudad.”

 Milomal ko salikaka ci Riaw to mifekaday a demak i saka tosa romiˈad, sanay: “Miocoran kami misawsaw to cafiˈ no saka cecay tingloh, o sacikaditay a tayal ako konini. Kawra o tayal no tatapangan konini, malikoay ko harateng ako.”

Lalomaˈ no pina lipay, misatapangayto ko fanekfekay a salikaka miinsac to Mikecolay casi. Saka dademakan nangra ko kikay isaka tosa tingloh miinsac to 6 efan 1920 miheca 2 folad 1 romiˈad a Mikecolay. Toniya tatokiyan, patirengan no salikaka i laenoay lomaˈ ko roma sapiinsac a kikay, panganganan nangra to ‘Sapilood a Tamina.’ Mikitini 1920 miheca 4 folad 14 romiˈad misatapang, Ekim a Lalintadan o salikaka ko miinsacay. Mahapinangay, padamaan ni Yihofa ko fanekfekay matayal a salikaka.

Miliyaway talifak ko finawlan ni Yihofa fanekfek a matayal. Kawra, itini 1917 tangasa 1919 miheca, o roma Micekiway to Fangcalay Cudad miliyasay to likakawa. Samanay ko likakawa padama cangranan hani?

Mikecolay 1920 miheca 4 folad 1 romiˈad (Padaka) pasadakan ko “Padama Kitanan Makelec Malacecay” a lalakaw. Mihadakay to satahidang ko lalakaw: “Pakasoˈlinay kita . . . iraay ko fangcalay saocor no Tapang a tamdaw . . . makahiyay mipawan to mafekaday a demak i salakat . . . malacafay to finawlan no Kawas makelec, matayal saki Kawas.”

Oniya sowal mitemeray to ˈalomanay tamdaw. Cecay mararamoday sanay, oniya sowal padamaay cangranan cipinang, itini pina miheca eca pirienang cangra to mitosilay tayal cowa ka tatodong, orato, misetekay cangra to falocoˈ fanekfek a mitosil noikor. Soˈlinayto, pakaynien i miliyaway mirienang mitosil a tamdaw, adihayayho ko hatayal i kaˈayaw.

1920 miheca 6 folad 21 romiˈad, satapangay ko Micekiway to Fangcalay Cudad to mikiriwiˈay a tayal, palilam to “ZG” a cudad, oya miinsacan a Malaˈosiay a Mahimeday. * Iˈayaw, oniya  cudad itini 1918 miheca makecengay no mirikecay, mansa adihayay ko cowa ka mapalilam.

Itiya, cowa ko misakafahay aca, polong a matayalay matahidangay mirienang toniya mikiriwiˈay a tayal. O cecay lalakaw no likakawa pakalalokay to polong micadaay to paputisem i kasakopang, ngaˈayay mirienang toniya tayal, hanaca mihadakay to cecay sowal: ‘Cecayay aca ko dademaken ako, papalilam to ZG!’ Sanay milomal ci Aytemong Hopo: “ˈAlomanay tamdaw mirienang toniya mikiriwiˈay a tayal o sakinacecay pakalomaˈ a mitosil.” Sanayho cingra: “Misatapangay cipinang kako, o kataˈangay no mitosilay a tayal mataˈlifay ko maharatengay niyam.”

Itini Saka Cecay Lalood no Hekal, itiniay congpo a salikaka pasangaray milinak to roma kitakit a Micekiway to Fangcalay Cudad, mansa makalim ko salikaka ci Rosofo sapakalalokaw to salikaka, sapiliyawaw milimasmas to mitosilay a tayal. Orato, itini 1920 miheca 8 folad 12 romiˈad, cingra ato sepat salikaka misatapangay miliwko, tayra i Ikok, Iwropa ato roma kitakit ato taliyok no Israil.

Milisoˈ ko salikaka ci Rosofo to Ikok i, misikayay ko Micekiway to Fangcalay Cudad to tolo taykay ato 12 pakapapotalay a saˈopo, maedeng 5 efan ko mirienangay a tamdaw. Milomal ko Mikecolay to pakayraan itiya sanay, tada mahinomay ko salikaka, miliyaway a talifak, masasipakalalok, malacafay matayal, tada lipahakay cangra. Itini Paris, miliyaway ko salikaka ci Rosofo mikimad to “O Maˈoripay Anini Masacaˈolay Simoˈot Efan a Tamdaw Tahadaˈoc Cowa ko Mamapatay” a kimad. ˈAyaw no misatapang ko kimad, matomesayto ko tamdaw i pitaykayan, ikor no mahererek, iraay ko 300 a tamdaw misaaliay to roma a lalakaw.

Dotoc pina lipay, tayraay ko salikaka i Atin, Kaylo ato Yirusalim. Pakayni sapadamaaw to maolahay to Fangcalay Cudad a tamdaw, patirengay ko salikaka ci Rosofo i ngata no Yirusalim to cecay pitepengan to cudad a soko. Ikor patikor cingra i Iwropa, patireng to katayalan i Iwropa, halo pilimasmas to piinsacan to cudad no Fangcalay Cudad itira.

Itini 1920 miheca kafarawfawan, mitepangay ko Micekiway to Fangcalay Cudad to saka 27 liyad a Ekim a Lalintadan, oniya liyad a lalakaw mitihedakay to micadaay to sapalak ko Micekiway  to Fangcalay Cudad i 1918 miheca. O masowlay i fafekang “Sapilood a Tamina” a sapiinsac a kikay salafiifii sanay a matayal, 400 efan ko miinsacan a casi.

Mifanaˈay koniya casi to malifaay no salikaka ci Ayma Mating. O misakafahay cingra, itiniay Padaka Kalifoniya a Senpinatino. 1918 miheca 3 folad 17 romiˈad, salikaka ci Mating aci Hanmo, Sangnipaw, Setiwens malacafayay mirienang to saˈopo no Micekiway to Fangcalay Cudad.

Itiya, iraayho ko roma tamdaw mirienangay to saˈopo, kawra cowa ko maminanam to Fangcalay Cudad cingra. Ikor misawacayay cingra a pasowal saan, o hankang ko miocoray cingranan mirienang toya saˈopo, araaw i mikilim to hawacay. Mahelaay ningra a wacay a cudad “Malaˈosiay a Mahimeday.” Ikor no pina romiˈad, fafahiyan salikaka ci Mating ato tatoloay salikaka macepetayto, o raraw i, palilamay to mikecengan a cudad.

Misawkitan no hoing ko salikaka ci Mating atoya tatoloay salikaka 3 miheca mapalit.1920 miheca 5 folad 17 romiˈad, cowato ka ngaˈay cangra miliyang, orato misatapangay mapalit. Kawra kalikiay mafalic ko demak.

1920 miheca 6 folad 20 romiˈad, salikaka ci Rosofo itini Ciwcinsan a taykay milengoay to nalifetan noniya salikaka, macekiday ko mitengilay. Patingwaan nangra ko congtong no Padaka. Itini tingwa masowalay, patelasay ko mirikecay no Padaka misaka dademak to fadangalan, paolaf to salikaka ci Matingan, mipalit cingranan, tada maketeray ko salikaka toniya demak.

Saka tosa romiˈad, o congtong no Padaka ci Oterlo Wieson patadoay to salikaka ci Mating, Hanmo, Sangnipaw, Setiwens miˈesal to raraw, orato matedalayto cangra i kapalitan.

1920 miheca adihayay ko kahemekan a demak mifekad. Tikolen miharateng koniya mihecaan, tada mahemekay ko Micekiway to Fangcalay Cudad. Padotocay macowat ko tayal i congpo, matongalay ko fanekfek no salikaka a mitosil, mifanaˈ to tamdaw edengan ko Hongti Kitakit no Kawas ko ngangaˈay misaysay to kihcod a pasangaray no tamdaw. (Matay 24:14) Itini dotoc a miheca, wa tano mikikakaay ko taˈangay a pakayraan milasil to Hongti Kitakit no Kawas.