Imnis wos anna, Yahwe syambraḇser manbaryas ḇeryaḇ ansine. Ro swaf taun anya, barbor ro perintis nek syadi wer, ro 225 nek ḇe 350. Ine iso randak kaku manbaryas sisyadi ro 8.000 sikofenḇair fararur ḇaḇebaryas sena ḇe kantor pusat. Yahwe ḇyebarakas si kuker byuk roi ḇepyum nabore.

Ro tanggal 21 Maret 1920, Naek Joseph F. Rutherford, fafisu ya iso ḇefarkin fararur ro Siswa-Siswa Alkitab, dawos faya oso judul ḇyeja ”Snonggaku Riyuta Ḇekenem ro Fafisu Ine Nari Sipok Simar Ḇa”. Siswa-Siswa Alkitab ansine sisewar kaku sor snonggaku sibor syadi fa sakrama srower faya ḇepyum ine. Sḇak aidoram ḇeba kaku ro New York City ma sirwas undangan ri 320.000.

Skandor kaku kukro ḇerama sya sisyadi ro rosai skara na. Aidoram ani isrow faro snonggaku ri 5.000 monda ma snonggaku ri 7.000 wer jadi fa sisun mundum ḇa. Syap The Watch Tower doḇe ”Siswa-Siswa Alkitab Internasional sifrur sarawrow ker, mboi ine iso sarawrow ḇembran kuker payamyum syadi”.

Sifawi Siswa-Siswa Alkitab sya ḇe snonggaku ḇeyoḇe ”snonggaku riyuta ḇekenem ro fafisu ine nari sipok simar ḇa”. Fafisu anya, sifawi mnis ḇaim fararur ḇaḇebaryas ine nari nambran ro swaf kawan syadi ma sifrur na ro moḇ ḇebor. Rarirya mboi, siryaḇ pdef. Imbesrar oso ḇenir ḇe Ida Olmstead, dakso randak fananjur ro taun 1920. Fyar radine, ”Nggofawi snonggaku syakam nari sismai barakas nabor ro rasras naiwama. Inja, nggokofenḇair abar ḇepyum ine faro snonggaku nggosrow ro ḇaḇebaryas sya.”

Insama sismai ker anan rur ya, naek srar ḇefararur ro Betel sifrur syap-syap na ro manggunsi. Skowes mesin cetak ma sḇein na ro aidoram sesewa kwar ro 35 Myrtle Avenue, ro Brooklyn New York. Moḇ ine kyain fanam ro Betel.

Naek Leo Pelle ma Walter Kessler suyakfarmyan ro Betel paik Januari 1920. Naek Walter fyar ḇo doḇe, ”Fyor nurama, ḇemamwarek fararur percetakan myam nu bo doḇe, ’Oras rioser syadi insape konan ro arkok.’ Mura dor nu fa nukanow pyan karton ḇeḇeso ro sim ḇero sop ya.”

Naek Leo fyar roi sufrur ro ras meser ya ḇo doḇe, ”Ras anya, sor nu fa nuḇan sren tembok sim ḇero sop aidoram ani. Yakfrur  fararur ḇeradine ro ras oso ḇaim. Imboi, yakara samswen oḇa kukro yafawi inema kofararur faro Yahwe I.”

Swaf minggu riḇeso monda, bar naek ḇeryaḇ ansine sifrur syap The Watch Tower ro manggunsi. Syap ḇesae ro tanggal 1 Februari 1920, barbor ya syaran utin riwonem. Sifrur syap nane kuker sbuk mesin cetak ro sim ḇero aidoram anya bori. Ma ro sim ḇero sop kaku, naek sya sifrur mesin cetak sap ḇe ”wai mamun”. Ḇarpur ya, sifrur syap The Golden Age, ḇesasyar randak ro tanggal 14 April 1920. Nasnaibos kaku, Yahwe ḇyebarakas kaku fararur marḇak ro naek ansine.

Ro fafisu anya, Yahwe kawasa Ḇyesi ḇesouser sya bisa simkei fa sifrur fararur sena ma siryur kayame. Imbape, ro fafisu ḇesamswen ro taun 1917 isof ro 1919, Siswa-Siswa Alkitab sino sisya sibur organisasi ine. Inja moḇsa sismai fafnoḇek fa skaḇer wer?

Syap The Watch Tower tanggal 1 April 1920, naser fawar judul ḇyeja ”Mgorama Koḇarek Pyum Kayam”. Awawos ani doḇe, ”Nggokyar kaku . . . mansei monda ḇeso farkankin ro rur ḇesren . . . simarisen sḇefnder sasar sifrur kwar ro ḇepondi . . . nari sḇeoser kuker Allah kawasa Ḇyesi fa sifrur Allah marisen Ḇyena.”

Snonggaku ḇebor sya simarisen ma skaḇer fa sfarmyan ḇe Allah. Imbeswa oso sufas radine, ”Nufawi taun ḇeḇeso ine, nusasar kwar kukro nuso ḇaḇebaryas kuker naek srar ḇesesya ḇa. . . . Kirine ḇe bo numarisen nuryaḇ pdef fa nubaryas.” Fararur nabor naisya naek srar ḇekaḇer ansine nari sifrur na.

Ro tanggal 21 Juni 1920, Siswa-Siswa Alkitab sirwas syap The Finished Mystery ḇena sampul kertas. Sap syap-syap anine ḇe ”ZG”. * Rofyor sidwarek syap ine ro taun 1918, syap ine naisya nabor kaker.

 Sor perintis sya monda ḇa mboi manbaryas syakam saksowarpu fa sirwas syap ani. Organisasi byuk swarapepen ine, ”Ro sidang oser-oser, ḇebaptis kwar ma sna swaf fa siso fararur ine ido, fandun fa sifrur na kuker sne ḇemarisen. Fafisu sirwas ZG, fandun fa manbaryas oser-oser sna kakara ine: ’Ine iso fararur ḇepon kaku ayedirya.’” Edmund Hooper fyar ḇo doḇe naek srar sya soḇe ine iso randak kaku sbaryas ro rum ḇe rum. Ikofen wer, ”Insape nggofawi mnis kaku, fararur ine nari imbran pdef isof nasyadi ro rosai nggokara na.”

Ro fafisu Mamun Dunya l, samswen kaku fa sawos kuker Siswa-Siswa Alkitab ḇero sup ḇese. Imbape, Naek Rutherford imarisen syambraḇser naek srar sya insama siryaḇ kaḇer fa sbaryas. Inja ro tanggal 12 Agustus 1920, Naek Rurherford ma naek rifyak sifrur marandan ḇe sup Inggris, sup ḇeḇeso ḇero Eropa, ma Timur Tengah.

Ro fafisu Naek Rutherford ryama ro Inggris anya, Siswa-Siswa Alkitab sifrur munara sarawrow rikyor ma sarawrow ri 12 faro kawasa kam. Ḇeso munara ansya kam sfanam 50.000. Syap The Watch Tower ikofenḇair roi ḇepyum sismai ro raramuma ani: ”Nane nasambraḇser kaku naek srar sya. Sebati si ma sfararur kayam ro ḇaḇebaryas, ma simarisen kaku.” Ro sup Paris, Naek Rutherford dawos wer faya ”Snonggaku Riyuta Ḇekenem ro Fafisu Ine Nari Sipok Simar Ḇa”. Ḇerama sya sibor kaku isof aidoram ani ifyos. Srower faya raposa, snonggaku ri 300 simarisen sifawi nabor syadi wer.

Minggu ḇeḇeso mura, naek sia sra ḇe Athena, Kairo, ma Yerusalem. Sra fa sifnoḇek ḇemarisen ḇerower abar ḇepyum ro moḇ ani. Naek Rutherford ḇyawes aidoram oso fa sbukikram syap-syap ro mnu oso ḇefanam Yerusalem ḇenir ḇe Ramallah. Mura kyaḇer ḇe Eropa ma ḇye fa sḇawes Kantor Eropa Tengah. Fyasos kako insama sifrur syap-syap na ro diwa.

Ro paik September 1920, Siswa-Siswa Alkitab sisasyar syap The Golden Age No. 27. Iso syap sfasos ḇese fa sfasnaiḇair wayam sifrur faro Siswa-Siswa Alkitab ro taun 1918. Mesin cetak sor ḇe ”wai mamun”, ḇeyap ḇepon anya, imbran ker ro meser ma roḇ fa ifrur syap ani barbor ya yuta rifyak syadi.

 Snonggaku ḇewasya syap ine insape sifawi mnis roi ḇekur Srar Emma Martin. Imbesrar ine ima perintis ḇeraker San Bernardino, Kalifornia, AS. Ro tanggal 17 Maret 1918 imbesrar ine warpu naek rikyor, isoine Naek E. Hamm, Naek E.J. Sonnenburg, ma Naek E.A. Stevens, sakso sarawrow kasun Siswa-Siswa Alkitab sifrur na.

Snon oso dakso sarawrow anya kukro imarisen fyarkor Refo ḇa. Ḇarpur mura insape ikofen kaku, ”Yarama fa yakso sarawrow ine . . . kukro kantor jaksa penuntut siso ḇewan aya. Yarama fa yasewar bukti monda.” Ro dia isrow ”bukti” isewar ani, isoine syap The Finished Mystery. Ras ḇeḇeso mura, sfor Srar Martin ma naek rikyor anskoya. Soḇe sisouser sasoser pamarenta ḇa kukro sirwas kaker syap sidwarek kwar anya.

Semankara Srar Emma ma naek anskoya ma soḇe sisasar kwar, inja sisun si ro bui swaf taun rikyor. Sor fa sek banding rarwan riḇeso kwar, mboi spampum fararyor sena. Inja, sisun ro bui tanggal 17 Mei 1920. Mboi samswen ḇekur si nane nakain kawan ḇa.

Ro tanggal 20 Juni 1920, Naek Rutherford fyar farfyar ḇepyum sena ro munara sarawrow ro San Francisco. Rofyor ḇerama sya srower farfyar ani, simarisen ḇa kaku faro roi ḇemnis ḇa ḇekur naek srar ansi. Sna wos oser fa sfarem telegram faro Presiden Amerika Serikat. Sfas ḇo soḇe, ”Nggokara mboi safsof . . . ḇekur Awin Martin . . . ḇeyoḇe ima isouser sasoser pamarenta ḇa nama roi ḇemnis ḇa kaku . . . Ḇebarara ro Federal sbuk papoik sena fa . . . sfor . . . Awin Martin . . . ramnai sḇe i fa semankara i ma sisun i ro bui, nggokara roi sifrur nane . . . naḇye ḇa kaku.”

Meser arwo ya, Presiden Woodrow Wilson iwan fa sisasyar fasaw Srar Emma, Naek Hamm, Sonnenburg, ma Stevens. Inja, sisasyar skokam ro bui ya.

Ro papupes taun 1920, Siswa-Siswa Alkitab sismai roi ḇepyum nabor ḇefrur fa simarisen. Fararur ro kantor pusat nabor syadi wer, ma Siswa-Siswa Alkitab simyaren syadi fa sbaryas Allah Karajan Ḇyedi iso nari ḇepyos kandera ḇekur snonggaku sya. (Mat. 24:14) Taun oser ḇerama ya, isoine taun 1921, siryaḇ syadi fa sbaryas kakaku ḇekur Allah Karajan Ḇyedi.