Ipargogohi Jahowa do ganup parbarita na ringgas ai. Sadokah tahun ai, martambah do bilangan ni perintis, humbani 225 gabe 350 halak. Bani tahun ai ma parlobei sahali dong 8.000 parbarita na mambere laporan dinas hu kantor pusat. Tangkas ma ipasu-pasu Jahowa do haringgason ni sidea.

Ijia, Sanina Joseph F. Rutherford do na mambobahon Siswa-Siswa Alkitab. Bani tanggal 21 Maret 1920, ipadas ia ma sada ambilan na marjudul “Marjuta Halak na Manggoluh Sonari Lang Ongga be Matei”. Paima acara ai, ringgas do Siswa-Siswa Alkitab mambagihon hira-hira 320.000 ontangan hubani na legan. Isewa sidea do sada gedung na banggal i New York City.

Lang isangka sidea bahat tumang do na roh hu acara ai. Hape, pitah 5.000 halak do na siat ibagas gedung. Tarpaksa ma maningon mulak na 7.000 halak nari. The Watch Tower mangkatahon, “On ma sada humbani piga-piga kebaktian na sukses ibahen Siswa-Siswa Alkitab.”

Gabe lambin itanda buei halak ma Siswa-Siswa Alkitab halani mambaritahon “marjuta halak na manggoluh sonari lang ongga be matei”. Tapi sanggah ai, lape iarusi sidea anggo barita Harajaon ai maningon ibaritahon hu buei ianan. Hassi pe sonai, bahat do sidea na ringgas marbarita. Si Ida Olmstead na domma martumpu humbani tahun 1902 mangkatahon, “Ibotoh hanami bahat do pasu-pasu na laho ibere Jahowa bani buei jolma. Halani ai sanggah mangidangi hanami, ipatugah hanami ma ai bani ganup halak.”

Ase totap adong publikasi na igunahon ibagas pangidangion, ibahen ma rencana ase Betel sandiri na mansetak piga-piga publikasi. Jadi, iboli sidea ma peralatan na ihaporluhon, janah inahkon ma ai i 35 Myrtle Avenue, Brooklyn, New York, dohor hun Betel.

Bani Januari 1920 mulai ma Sanina Leo Pelle pakon Sanina Walter Kessler mangidangi i Betel. Si Walter mangkatahon, “Sanggah baru das ope hanami i Betel, mintor ihatahon pengawas percetakan ma bannami, ‘Dong sada satongah jam nari ase hita mangan siang.’ Jadi isuruh ma hanami mamindahkon kardus buku hun ruang bawah tanah.”

Isaritahon Sanina Leo ma aha na masa bani patarni ai. Nini do, “Isuruh ma hanami  paborsihkon dingding lantai sada bangunan ai na kotor tumang. Lape ongga huhorjahon na sisonai. Tapi malas tumang do uhurhu halani bani Tuhan do na huhorjahon ai.”

Dob piga-piga minggu, isetak ma majallah The Watch Tower ijai. Bani 1 Februari 1920, dong 60.000 majallah na isetak i lantai dua. Dobkonsi ai, ipasang ma use i ruang bawah tanah mesin cetak na legan na isobut Battleship. Bani 14 April 1920, isetak ma homa majallah The Golden Age ijai. Tangkas ma ipasu-pasu Jahowa do haringgason ni sidea ai.

Halani rup marhorja Siswa-Siswa Alkitab, ipargogohi Jahowa ma sidea. Tapi bani tahun 1917 ronsi 1919, dong piga-piga Siswa-Siswa Alkitab na manadingkon organisasi halani sunsah situasini sanggah ai. Sonaha sidea boi iurupi?

Bani The Watch Tower 1 April 1920 dong artikel na marjudul “Marsada anjaha Rup Marhorja ma Hita”. Ijai ihatahon, “Porsaya do hanami anggo ra halak mangihutkon panogu-noguon ni tonduy na pansing . . . boi do sidea manlupahon hasalahanni, . . . boi do sidea marsada anjaha rup marhorja.”

Dear do ijalo buei halak ojuran ai. Umpamani, dong sapasang suami istri na mangkatahon, “Salah do hanami halani domma sompat lang be marbarita. . . . Jadi sonari marusaha do hanami ase lambin ringgas marbarita.” Halani ai, mintor ringgas ma sidea ibagas pangidangion.

Bani tahun 1918, ilarang pamarentah ma Siswa-Siswa Alkitab mambagihon “ZG” ai ma buku The Finished Mystery. * Tapi domma bahat buku ai isimpan Siswa-Siswa Alkitab. Jadi, bani tanggal 21 Juni 1920, ibagihon Siswa-Siswa Alkitab ma use buku ai.

 Lang pitah perintis na dihut bani horja ai. Tapi dihut do homa parbarita. Ganup do marmalas ni uhur mangkorjahon ai. Ninuhur ni sidea ma, “Pitah on do na laho huhorjahon, ai ma mambagihon buku ZG.” Ihatahon si Edmund Hooper ma, “On ma parlobei sahali hanami marbarita hun rumah hu rumah.” Nini use, “Dobkonsi on ma gabe huarusi sonaha do na marbarita hun rumah hu rumah ai.”

Sadokah Porang Dunia I, sunsah tumang do manghubungi Siswa-Siswa Alkitab na dong i nagori na legan. Jadi, sihol ma Sanina Rutherford patoguhkon sanina botou ijai. Halani ai, iaturhon ia ma use horja parambilanon. Dob ai, bani tanggal 12 Agustus 1920, laho ma ia pakon ompat sanina na legan hu Inggris, Benua Eropa, ampa Timur Tengah.

Sanggah roh si Rutherford hu Inggris, ibahen Siswa-Siswa Alkitab ma tolu kebaktian ampa 12 partumpuan. Adong ma hira-hira 50.000 halak na roh hu acara ai. Sanggah roh si Rutherford hujai, ihatahon The Watch Tower ma, “Gabe ipatoguh do use uhur ni sanina botou ijai. Lambin marsihaholongan ma sidea anjaha marsada ibagas pangidangion. Gabe tarapoh do homa uhur ni sidea.” Sanggah i Paris ipadas Sanina Rutherford ma use ambilan na marjudul “Marjuta Halak na Manggoluh Sonari Lang Ongga be Matei”. Bani acara ai mintor gok ma hadirin ibagas gedung ai. Anjaha dong 300 halak na manungkun pasal isi ni Bibel.

Piga-piga minggu dobkonsi ai, roh ma piga-piga sanina hu Athena, Kairo, ampa Jerusalem. Ase adong publikasi ibagihon hubani halak na rosuh manangar hasintongan, iaturhon si Rutherford ma ase adong ianan panimpanan publikasinta i kota Ramallah dohor ni Jerusalem. Dobkonsi ai, laho ma use si Rutherford hu Eropa, janah ipajongjong ma ijai Kantor Cabang Eropa Tengah. Ibahen do homa percetakan ijai ase boi mansetak publikasinta.

Bani bulan September 1920, ibahen Siswa-Siswa Alkitab ma majallah The Golden Age No. 27 edisi khusus. Bani majallah ai iulas sidea do pasal parburuon na ibahen hubani Siswa-Siswa Alkitab sadokah tahun 1918. Igunahon sidea ma masin cetak Battleship laho mansetak ompat juta lobih majallah ai. Arian pakon borngin do sidea mangkorjahon ai.

 Dong pambasa majallah ai manonggor kasus ni Botou Emma Martin, sahalak perintis i San Bernardino, Kalifornia. Bani tanggal 17 Maret 1918, ia pakon tolu sanina na legan, ai ma si E. Hamm, si E. J. Sonnenburg, pakon si E. A. Stevens, roh hu partumpuan Siswa-Siswa Alkitab.

Bani partumpuan ai, roh ma sada dalahi tapi sedo na laho marlajar Bibel ia. Nini dalahi ai ma, “Ahu roh hujon halani isuruh kantor pengadilan.” Nini use, “Ahu sihol manorihi bukti anggo nasiam marsalah.” Dob ai, dapotsi ma sada buku The Finished Mystery. Dob piga-piga ari, itangkap ma Botou Martin ampa tolu sanina ai. Ihatahon do sidea “marsalah” halani domma mambagihon buku na dob ilarang pamarentah.

Iuhum ma si Emma pakon hasomanni ai tolu tahun penjara. Tapi mangindo naik banding ma sidea. Bani tanggal 17 Mei 1920, kalah do sidea, anjaha ujungni ipenjarahon ma sidea. Tapi mubah ma situasini dobkonsi ai.

Bani tanggal 20 Juni 1920, sanggah kebaktian i San Fransisco, isaritahon Sanina Rutherford ma pasal sidea na ipenjarahon ai. Tarsonggot tumang ma sanina botou manangar ai. Jadi ikirim sidea ma telegram hubani presiden Amerika Serikat. Sidea mangkatahon, ‘Pangahapnami lang adil na ibahen sidea hubani Botou Martin. Domma isalah gunahon pengadilan kuasani laho mansalahkon Botou Martin. Jahat tumang do pambahenan ni sidea ai.’

Patarni, iubah Presiden Woodrow Wilson ma uhuman ni Botou Martin ampa Sanina Hamm, Sonnenburg, pakon Sanina Stevens. Jadi ibebaskon ma sidea hun penjara.

Bani ujung tahun 1920, malas tumang do uhur ni Siswa-Siswa Alkitab sanggah irimangi sidea ganup pasu-pasu ni Jahowa sadokah tahun ai. Umpamani, lambin bahat do horja i kantor pusat, janah lambin ringgas do sidea mambaritahon pitah Harajaon ni Naibata do na boi pasaloseihon ganup parsoalan. (Mat. 24:14) Anjaha bani tahun 1921, lambin ringgas ma sidea mambaritahon hasintongan pasal Harajaon.