Sue ras ayat e, ipegegehi Jahwe perberita-perberita si semangat enda. Bas tahun e, jumlah perintis reh teremna, arah 225 dungna jadi 350. Janah eme tangtangna lebih 8.000 perberita si mereken laporen dinas ku kantor pusat. Ipasu-pasu Jahwe kalak e alu asil si luar biasa.

Bas tanggal 21 Maret 1920, Joseph F. Rutherford, si paksa si e minpin pendahin Ajar-Ajar Pustaka, mpeseh khotbah si erjudul, “Jutan Kalak si Nggeluh Gundari Labo Pagi Banci Mate.” Iusahaken kalak e kel ngundang enterem jelma reh ku acara e. Isewa kalak e salah sada gedung si galangna i kota New York janah lit 320.000 undangen si ibagikenna.

Kepeken kalak si reh lebihen asangken si iarapken kalak e. Si siat bas gedung e 5.000 kalak ngenca, emaka lit kira-kira 7.000 kalak la banci masuk. Ikataken The Watch Tower maka acara e “salah sada perpulungen si berhasilna kel si pernah iban Ajar-Ajar Pustaka Internasional.”

Terkenal me Ajar-Ajar Pustaka perban mberitaken kerna “jutan kalak si nggeluh gundari labo pagi banci mate.” Paksa si e, lenga iangkai kalak e maka pendahin erberita arus denga ilakoken bas ingan-ingan si deban janah ndekah ka maka dung. Amin gia bage, tetap luar biasa semangat kalak e. Ida Olmstead, si mulai reh ku perpulungen tahun 1902, ngataken, “Iteh kami maka kerina kalak pasti ndatken pasu-pasu si luar biasa pagi, emaka ipeseh kami berita e man kerina kalak si ijumpai kami sanga erberita.”

Gelah banci terus lit pangan rohani, turang seninata si lit bas Betel mulai ncetak piga-piga publikasi. Itukur kalak e mesin-mesin cetak janah ipasangna bas sada bangunen si isewa kalak e bas 35 Myrtle Avenue, Brooklyn, New York, la ndauh arah rumah Betel nari.

Leo Pelle ras Walter Kessler mulai ngelayani i Betel bas bulan Januari 1920. Nina Walter, “Seh kenca kami, bagenda nina pengawas percetaken man kami, ‘Sada setengah jam nari maka man ciger.’ Kenca si e, isuruhna kami maba piga-piga kotak buku arah ruangen teruh taneh.”

 Iceritaken Leo kai si ilakoken kalak e paginna, “Isuruh kami mbersihken tembok i lantai sada bangunen e. Dungna seh kel aku melketna. Tapi tetap meriah ukurku perban si e kerina kulakoken man Jahwe.”

Bas piga-piga minggu saja, turang senina si semangat enda berhasil ncetak The Watch Tower. Enem puluh ribu majalah The Watch Tower edisi 1 Februari 1920 icetak alu nggunaken mesin si lit i lante dua. Bas ruangen teruh taneh, ipasang turang senina mesin cetak si igelari “kapal perang.” Bas pudi wari icetak kalak e ka The Golden Age mulai arah edisi 14 April 1920. Jelas me, ipasu-pasu Jahwe kerja keras turang seninata e.

Paksa si e, umat Jahwe terus semangat erberita janah tetap ersada. Tapi bas tahun 1917 seh ngasa 1919, lit piga-piga Ajar-Ajar Pustaka si nadingken organisasi perban lit tentangen. Uga carana nampati kalak e gelah mulihken ku organisasi?

Bas The Watch Tower 1 April 1920, lit artikel si erjudul “Mari Kita Tading Ras-Ras alu Dame.” Nina artikel e, “Tek kami maka ise pe si patuh man Jahwe, banci ilupakenna kesalahenna si mbarenda janah ersada ras umat Dibata guna ngelakoken peraten Dibata.”

Enterem kalak si tanggapenna mehuli janah mulihken ku organisasi. Bas sada surat, nina sekalak perbulangen ras ndeharana, “Sadar kami maka piga-piga tahun enda enggo salah kel kami perban la ikut erberita ras turang senina si deban.” Ikatakenna ka maka ertekad kalak e erberita alu semangat. Gundari, melala pendahin si banci ilakoken turang senina si mulihken ku organisasi.

Bas 21 Juni 1920, iban Ajar-Ajar Pustaka kegiaten khusus guna mbagiken buku The Finished Mystery * edisi sampul kertas. Edisi e igelari “ZG.” Sanga ilarang buku e bas tahun 1918, buku e melala denga.

 Kerina perberita, la soal perintis ntah lang, iundang gelah ikut mbagiken buku e. Ibereken organisasi penginget enda: “Kerina kalak si lit bas runggun si enggo iperidiken janah ikut atena bas pendahin enda arus ikut alu ermeriah ukur. Sanga mbagiken ZG arus iinget perberita kata-kata enda: ‘Enda kap tugasku si pentingna.’” Iceritaken Edmund Hooper maka enda me tangtangna man enterem turang senina erberita arah rumah ku rumah. Nina ka, “Reh tambahna pengangkan kami kerna pendahin si terus reh majuna enda janah lebihen asangken si ibayangken kami.”

Sedekah Perang Doni I, mesera kel ngubungi Ajar-Ajar Pustaka si lit bas negeri-negeri si deban. Emaka ipegegehi Turang Senina Rutherford atena turang senina si lit bas negeri-negeri e janah iaturkenna ka mulihi pendahin erberita i je. Emaka bas tanggal 12 Agustus 1920, ia ras empat turang senina lawes ku Inggris, ku piga-piga negara i Eropa, bage pe ku Timur Tengah.

Sanga Turang Senina Rutherford i Inggris, iban Ajar-Ajar Pustaka telu kebaktin bage pe 12 perpulungen man jelma si enterem. Jumlah si reh ku acara e lit kira-kira 50.000 kalak. Nina The Watch Tower, “Terpegegehi kel turang senina. Banci kalak e jumpa ras turang senina si deban janah kerja sama, meriah kel ukur kalak e.” Bas Paris, ipeseh Turang Senina Rutherford sekali nari khotbah si erjudul, “Jutan Kalak si Nggeluh Gundari Labo Pagi Banci Mate.” Enterem kel kalak si reh ku acara e, emaka dem kel gedung e. Kenca khotbah, lit telu ratus kalak si merhat meteh terbuen.

Piga-piga minggu kenca si e, lawes piga-piga turang senina ndai ku Athena, Kairo, ras Jerusalem. Guna nampati kalak si berminat bas daerah e, ibangun Turang Senina Rutherford gudang buku i Ramallah eme sada kota bas Jerusalem. Kenca si e, mulih ia ku Eropa, ibanna Kantor Cabang i Eropa Tengah janah iaturkenna ka gelah publikasita pe icetak i je.

Bas bulan September 1920, iterbitken Ajar-Ajar Pustaka The Golden Age nomor 27. Majalah enda eme edisi khusus si mpebetehken kerna penganiayan man Ajar-Ajar Pustaka bas tahun 1918. Mesin cetak “kapal perang” si enggo ituriken ndai, terus ncetak  majalah enda suari ras berngi gelah banci icetak lebih empat juta majalah.

Iteh kalak si mbaca majalah enda me kai si terjadi man Emma Martin. Turang Senina Emma eme sekalak perintis i San Bernardino, Kalifornia. Bas tanggal 17 Maret 1918, ia ras telu turang senina si deban eme, E. Hamm, E. J. Sonnenburg, ras E. A. Stevens, reh ku perpulungen si iban Ajar-Ajar Pustaka.

Lit sekalak dilaki reh ku perpulungen e janah tujunna labo erlajar Pustaka. Bas pudi wari bagenda nina, “Reh aku ku perpulungen enda . . . perban perentah arah kantor kejaksan, ndarami bukti ateku.” Idatna me “bukti” si idaramina eme buku The Finished Mystery. Piga-piga wari kenca si e, itangkap me Turang Senina Emma bage pe telu turang senina si deban. Ituduh kalak e ngelanggar undang-undang perban ibagikenna buku si ilarang.

Emma ras telu turang senina ndai ikataken ersalah janah arus ipenjaraken telu tahun. Iusahaken kalak e piga-piga kali naik banding tapi la berhasil. Dungna, bas tanggal 17 Mei 1920, ipenjaraken me kalak e. Tapi, la ndekah kenca si e berubah me keadanna.

Bas tanggal 20 Juni 1920, iceritaken Turang Senina Rutherford me pengalamen kalak e bas kebaktin i San Fransisco. Sanga ibegi hadirin kerna si e, la iakap kalak e cocok kai si terjadi man turang senina e, emaka setuju kalak e ngirim sada telegram man presiden Amerika Serikat. Bas telegram e nina, “Menurut kami . . . la adil kai si terjadi man Emma Martin. . . . Igunaken pemerentah kuasana guna . . . njebak . . . Emma Martin. . . . Ituduh ia ngelanggar hukum janah ipenjaraken ka . . . e kelewatsa kel iakap kami.”

Paginna, mis ibebasken Presiden Woodrow Wilson Turang Senina Emma, Hamm, Sonnenburg, ras Stevens. Lanai kalak e ipenjaraken.

Bas pendungi tahun 1920, melala kel si erban meriah ukur Ajar-Ajar Pustaka. Pendahin bas kantor pusat terus reh buena janah la pernah bage buena. Terus semangat Ajar-Ajar Pustaka mberitaken maka Kerajan Dibata ngenca si banci ndungi kerina masalah manusia. (Mat. 24:14) Bas tahun 1921, pendahin erberita terus reh belinna.