Ih klyaa fi si dat Jehoava mi schrentn dehnya bradaz ahn sistaz weh mi eega fi preech di gud nyooz. Kaaz joorin da yaa, di amonk a painyaaz mi gaan op fahn 225 tu 350. Ahn fi di fers taim, moa dan 8,000 poblishaz mi ripoat aal weh dehn du eena feel servis tu hedkwaataz. Jehoava mi poar owt blesinz pahn dehn.

Pahn Maach 21, 1920, Joseph F. Rutherford, hoo mi-di tek di leed monks di Baibl Styoodents, mi gi wahn taak weh mi naym “Milyanz a Peepl Weh Di Liv Now Wahn Neva Ded.” Di Baibl Styoodents mi du evriting weh dehn kud fi invait peepl fi goh hyaa dis taak. Dehn mi rent wan a di bigis tayta eena New York City, ahn dehn mi giv owt bowt 320,000 invitayshan.

Di Baibl Styoodents neva ekspek soh moch peepl fi goh hyaa di taak. Ahn sins di plays mi onli ga spays fi 5,000 peepl, 7,000 peepl kudn goh een fi hyaa di taak. The Watch Tower mi seh dat da mi “wan a di bes meetin weh di Intanashanal Baibl Styoodents mi eva gat.”

Evribadi mi kohn fi noa di Baibl Styoodents sayka di mesij weh dehn mi preech dat “milyanz a peepl weh di liv now wahn neva ded.” Joorin da taim, dehn neva andastan dat dehn mi haftu goh eevn ferda fi preech di Kingdom mesij. Bot eevn soh, dehn lov fi di minischri mi schrang. Ida Olmstead, wahn sista weh mi staat tu goh da di meetin dehn eena 1902, mi seh: “Wee mi noa dat aal hyoomanz ku get lata blesinz eena di fyoocha, ahn wee neva mek eniting stap wi fahn tel dis gud nyooz tu evribadi weh wi mi meet eena di minischri.”

Fi mek shoar dat evribadi mi ga spirichwal food, di bradaz da Betel mi staat tu print som a di lichricha dehnself. Dehn mi bai di ikwipment ahn set it op eena wahn bildin weh dehn mi rent da 35 Myrtle Avenue, Brooklyn, New York, weh neva deh tu faar fahn di Betel hoam.

Leo Pelle ahn Walter Kessler mi staat tu serv da Betel eena Janiweri 1920. Walter seh: “Wen wi reech, di oavaseeya a di printin fakchri luk pahn wi ahn tel wi dat wi mi ga wahn owa an a haaf fi werk bifoa lonch. Ih aks wi fi bring sohn baks a buk fahn dongstayz.”

Leo memba weh mi hapm di day afta dat; hihn seh: “Da mi fi wee jab fi wash di waal dehn pahn di fers floa a di bildin. Dat da-mi di  moas disgostin jab Ah mi eva gat. Bot wi mi-di werk fi Jehoava, soh ih mi wert it.”

Eena jos wahn fyoo weeks, sohn wilin valantyaa mi-di print The Watch Tower. Dehn mi print 60,000 kapi a di Febiweri 1, 1920, ishu a The Watch Tower pahn di printin masheen weh mi deh pahn di sekant floa. Wail dat mi-di hapm, di bradaz mi set op wahn printin masheen dongstayz, ahn dehn yoostu kaal di masheen di Battleship. Dehn mi aalso staat tu print The Golden Age, staatin wid di Aypril 14, 1920 ishu. Ih mi klyaa fi si dat Jehoava mi-di bles di werk weh dehn wilin werkaz mi-di du.

Jehoava laayal peepl staat tu geh bizi eena di preechin werk agen ahn dehn staat tu kip kompni wid wan anada agen. Bot som a di Baibl Styoodents mi lef di aaganaizayshan sayka di haad taimz weh dehn mi fays fahn 1917 tu 1919. Wat kuda mi help dehn?

The Watch Tower a Aypril 1, 1920, mi gat een wahn aatikl weh naym “Mek Wi Liv Tugeda Eena Pees.” Di aatikl mi seh: “Wee shoar . . . dat evribadi weh waahn obay Jehoava . . . wahn wilin fi ferget di mistayk dehn weh dehn mi mek eena di paas, . . . ahn jain Gaad peepl fi du fi hihn werk.”

Wahn lata di Baibl Styoodents weh mi lef Gaad aaganaizayshan mi rispan tu dis lovin inkorijment. Wan marid kopl mi rait: “Di aatikl mi help wi fi andastan dat ih mi rang fi mek wi di aidl rong fi di paas yaa ahn moa wail adaz du di werk. . . . Wi hoap dat notn noh wahn kaaz wi fi schray weh fahn di aaganaizayshan agen.” Dehndeh Baibl Styoodents weh mi staat tu preech agen mi ga lata werk heda dehn.

Pahn Joon 21, 1920, di Baibl Styoodents mi staat wahn reeli big kampayn fi giv owt di “ZG,” weh da-mi wahn saaf-kova kapi a The Finished Mystery. * Wahn lata dehnya buk mi  deh stoar op fahn di taim wen di govament mi ban di buk eena 1918.

Evri poblisha mi geh invaitid fi tek paat eena dis kampayn, noh jos di painyaaz. Di leta mi seh: “Evri baptaiz persn eena evri kangrigayshan weh ku tek paat eena dis werk shuda bee wilin fi du it. Mek dis bee di sayin weh unu liv bai now: ‘Wan ting weh Ah wahn duʼ da giv owt di ZG.” Edmund Hooper seh dat fi wahn lata di Baibl Styoodents, dis da-mi di fers taim dehn mi eva gaahn preech fahn hows tu hows. Hihn mi aalso seh: “Wi mi reeli get fi andastan humoch wi mi wahn haftu du eena dis werk weh mi wahn groa moa dan wi kuda mi eva imajin.”

Sayka weh ih mi soh haad fi kamyoonikayt wid ada Baibl Styoodents eena ada konchriz joorin Werl Waar I, Brada Rutherford mi waahn inkorij dehndeh bradaz ahn help dehn fi aaganaiz di preechin werk agen. Soh pahn Aagas 12, 1920, hihn ahn foa ada bradaz gaahn pahn wahn lang chrip tu Britain ahn wahn lata ada konchri.

Wen Brada Rutherford gaahn da Britain, di Baibl Styoodents mi ga chree kanvenshan ahn 12 poblik meetin. Di toatal amonk a peepl weh mi aten da-mi bowt 50,000. Dis da weh The Watch Tower mi seh bowt di vizit: “Di frenz mi geh wahn lata inkorijment. Afta dat, dehn geh kloasa tu wan anada ahn dehn staat tu werk wid eech ada, ahn dat mi mek dehn feel hapi.” Da Paris, Brada Rutherford mi gi di sayhn taak weh naym “Milyanz a Peepl Weh Di Liv Now Wahn Neva Ded.” Di haal mi pak op wen hihn staat tu gi di taak, ahn 300 peepl mi aks fi moa infamayshan aftawodz.

Eena di weeks afta dat, sohn bradaz mi vizit Athens, Cairo, ahn Jerusalem. Fi fala op pahn di inchres weh di peepl mi shoa eena dehndeh plays, Brada Rutherford mi set op wahn lichricha wyaahows eena wahn tong weh naym Ramallah, weh mi deh kloas tu Jerusalem. Afta dat, ih gaahn bak da Europe an ih mi set op di Central Europe Aafis an araynj fi mek dehn print lichricha deh.

Eena Septemba 1920, di Baibl Styoodents mi poblish ishu nomba 27 a The Golden Age magazeen; ih mi ekspoaz di persikyooshan weh di Baibl Styoodents gaahn chroo joorin 1918. Di printin masheen, weh dehn yoostu  kaal di Battleship, mi ron day ahn nait fi projoos moa dan foa milyan kapi a dis magazeen.

Peepl weh mi reed da magazeen mi fain owt weh mi hapm tu Emma Martin. Sista Martin da-mi wahn painyaa da San Bernardino, California. Pahn Maach 17, 1918, shee ahn chree bradaz, E. Hamm, E. J. Sonnenburg, an E. A. Stevens, mi gaahn da wahn smaal meetin weh di Baibl Styoodents mi gat.

Wahn man gaahn da di meetin, bot da neva fi laan bowt di Baibl. Laytaraan, hihn mi seh dat di reezn wai hihn gaahn da dis meetin da bikaaz di govament leegal aafis mi sen ahn fi kalek evidens. Hihn mi fain di “evidens” weh ih mi-di luk fa—wahn kapi a The Finished Mystery. Wahn fyoo dayz layta, dehn mi ares Sista Martin ahn di chree bradaz. Dehn mi chaaj dehn fi brok wahn laa weh mi ban dehn fahn giv owt dis buk.

Di koat mi seh dat Emma ahn di chree bradaz mi gilti, ahn soh dehn sentens dehn tu chree yaaz eena prizn. Bot pahn May 17, 1920, afta dehn mi tek evri chaans weh dehn kud fi apeel di kays, dehn mi stil en op di goh da prizn. Bot soon, tingz mi geh beta fi dehn.

Pahn Joon 20, 1920, Brada Rutherford mi tel dehn ekspeeryens da wahn kanvenshan da San Francisco. Di aadyans kudn bileev how dehn mi-di chreet dehnya Kristyanz, soh dehn sen wahn telegram tu di prezident a di United States. Di bradaz dehn mi rait ahn seh dat dehn mi reeli feel laik di govament mi abyooz dehn powa, bikaaz dehn mi set op wahn chrap jos fi ga wahn ekskyoos fi sen Sista Martin da prizn.

Di day afta di bradaz mi sen di telegram, Prezident Woodrow Wilson mi kaal wahn en tu di prizn sentens a Sista Martin, Brada Hamm, Brada Sonnenburg, ahn Brada Stevens.

Da di en a 1920, di Baibl Styoodents mi ga wahn lata tingz fi mek dehn bee hapi bowt. Di werk da hedkwaataz mi kantinyu fi groa, ahn moa dan eva bifoa, chroo Kristyanz mi-di preech dat Gaad Kingdom da-mi di solooshan tu aala wi prablemz. (Mach. 24:14) Soh 1921 mi wahn bee wahn eevn beta yaa fi advataiz Kingdom chroot.