Jehová omombarete umi opredika vaʼekuépe kyreʼỹme. Upe áñope hetave oĩ umi kolportór térã prekursór, 225-gui ohasa 350-pe. Upérõ primera ves mas de 8.000 travahadór térã puvlikadór omondo iñinfórme de predikasión pe sentrál mundiálpe. Oĩ vaʼekue hetaiterei ohendu porãva koʼã puvlikadórpe. Ha péicha Jehová ovendesi chupekuéra.

Pe 21 de marzo de 1920, Joseph Rutherford, upérõ odirihíva umi Estudiánte de la Bíbliape, ojapo pe diskúrso: “Hetaiterei oikovéva koʼág̃a nomanomoʼãi arakaʼeve”. Umi Estudiánte de la Biblia ojapo ikatúva entéro oinvita hag̃ua umi héntepe ko diskúrsope g̃uarã. Haʼekuéra oalkila pe teátro tuichavéva oĩva siuda de Nueva Yórkpe ha orreparti hikuái 320.000 invitasiónrupi.

Hetaitereive hénte ou upe haʼekuéra ohaʼarõ vaʼekuégui. Pe teátrope 5.000 persónante ija, ha upévare mas de 7.000 persóna oho jey ndaikatuvéima rupi oike. Pe rrevísta The Watch Tower heʼi vaʼekue upéva haʼe hague peteĩva umi rreunión tuichavéva ha oporomokyreʼỹvéva ojapo vaʼekue umi Estudiánte Internasionál de la Biblia.

Umi Estudiánte de la Bíbliape ojekuaa vaʼekue opárupi omombeʼu haguére: “Hetaiterei oikovéva koʼág̃a nomanomoʼãi arakaʼeve”. Upe tiémpope haʼekuéra nontendéi vaʼekue umi notísia porã oñeʼẽva Ñandejára Rréinore oñemombeʼu vaʼerãha hetave lugárpe ko múndope. Upéicharõ jepe haʼekuéra ikyreʼỹeterei. Ida Olmstead oho vaʼekue primera ves rreunionhápe 1902-pe, ha haʼe heʼi: “Ore roikuaa ohaʼarõha hetaiterei vendisión yvyporakuérape, upévare siémpre romombeʼu ko notísia porã umi rotopávape predikasiónpe”.

Ani hag̃ua ofalta umi informasión omombaretétava umi ermáno jerovia, umi ermáno oĩva Betélpe oñepyrũ oimprimi haʼekueraite voi umi puvlikasión. Ojogua hikuái umi ekípo ha omoĩ peteĩ edifísio oalkila vaʼekuépe avenída Myrtle, número 35, Brooklyn, Nueva Yórkpe, opytáva unas kuánta kuádrante Betélgui.

Leo Pelle ha Walter Kessler oñepyrũ vaʼekue ombaʼapo Betélpe enero de 1920-pe. Walter omombeʼu: “Rog̃uahẽrõ guare, pe imprentapegua superintendénte omaña orerehe ha heʼi: ‘Ofaltáiti una óra imédia jaha hag̃ua jakaru’. Upémarõ haʼe ojerure oréve roho hag̃ua rogueru unas kuánta káha de lívro pe sótanogui”.

Leo imanduʼa la oiko vaʼekuére al día sigiénte: “Roñeasigna romopotĩ hag̃ua pare pe edifísio  plánta váhape. Upéva haʼe vaʼekue pe traváho ikyʼavéva ajapo vaʼekue. Péro ore rombaʼapo hína kuri Jehovápe g̃uarã ha upévare ovale la péna”.

Unas kuánta semána haguépe, umi ermáno ikyreʼỹetéva oimprimíma pe rrevísta The Watch Tower. Oñeimprimi 60.000 rrevísta 1 de febrero de 1920-pegua, upearã oipuru hikuái pe imprénta plána oĩva pe primer písope. Upe aja, pe sótanope umi ermáno oinstala peteĩ imprénta tuicháva ombohérava el Acorazado. Pe rrevísta The Golden Age, (koʼág̃a hérava ¡Despertad!) 14 de abril 1920-pegua oñeimprimíma vaʼekue upépe. Ojekuaa porã Jehová ovendesi hague umi mbaʼe oñehaʼãva ojapo umi ermanokuéra ikyreʼỹetéva.

Jehová puévlo ifiélva opredika jeýma kyreʼỹme ha en unida. Upéicharõ jepe, unos kuánto Estudiánte de la Biblia oheja vaʼekue Jehová organisasión umi tiémpo ijetuʼuetévape áño 1917 guive 1919 peve. ¿Mbaʼépa ikatu vaʼekue ojejapo oñepytyvõ hag̃ua chupekuéra?

Pe rrevísta The Watch Tower, 1 de abril de 1920-pe, osẽ vaʼekue pe artíkulo hérava “Jaikókena pyʼaguapýpe”. Upépe mborayhúpe ojeʼe chupekuéra: “Ore roime segúro enterove iñeʼẽrenduséva Jehovápe hesaraitaha umi mbaʼe vai ojapo vaʼekuégui ymave, ha omoirũtaha Jehová puévlope ojapo hag̃ua pe traváho haʼe omeʼẽ vaʼekue”.

Heta ningo oĩ umi ojagarra porãva ko konsého mborayhúpe oñemeʼẽ vaʼekue. Peteĩ matrimónio oskrivi: “Ore rohechakuaa rojavy hague ndoropredikái haguére mas de un áño, ha upe aja katu umi ótro opredika oikóvo. Hiʼãite oréve ndoikovéima orerehe upéva núnka mas, ha ore rojerresolvéma rosegitaha ropredika kyreʼỹme”. Koʼã ermáno ou jey vaʼekue oreko kuri hetaiterei traváho ojapo vaʼerã henonderãme.

Pe 21 de junio de 1920, umi Estudiánte de la Biblia omoñepyrũ peteĩ kampáña espesiál orreparti hag̃ua pe “ZG”, haʼéva pe lívro El Misterio Terminado péro tápa vlánda. * Kóva ko lívro ojeguereko  vaʼekue hetaiterei iñongatupy, pórke 1918-pe ojeproivi vaʼekue.

Oñeinvita entéro umi puvlikadórpe ombaʼapo hag̃ua ko kampáña espesiálpe, ndahaʼéi umi prekursórpe añónte. Pe Bulletin, * junio de 1920-pe guare heʼi: “Entéro vautisádo oĩva umi kongregasiónpe, kyreʼỹme opartisipa vaʼerã ko kampáñape. Enterove oreko vaʼerã iñakãme ko fráse: ‘Che ajapo peteĩ mbaʼe, arreparti pe ZG’”. Edmund Hooper omombeʼu: “Hetápe g̃uarã upérõ haʼe vaʼekue pe primera ves opredikáva ogahárupi”. Ha heʼive: “Upépe ae rontende pe traváho rojapo vaʼerã tuichaitereiha, ha ni noroimoʼãi kuri ojepredikáiti vaʼerãha hetave lugárpe”.

Pe primera gérra mundiál aja, umi ermánope ijetuʼu vaʼekue oñekomunika hag̃ua umi Estudiánte de la Biblia oĩvandi umi ótro paíspe. Upévare ermáno Rutherford omokyreʼỹse kuri koʼã ermánope ha oorganisase jey pe predikasión. Upémarõ pe 12 de agosto de 1920, haʼe ha 4 ermáno oho Gran Bretáñape, unos kuánto país oĩva Európape ha Oriente Médiope.

Ermáno Rutherford ovisitárõ guare Gran Bretaña, umi Estudiánte de la Biblia ojapo mbohapy asambléa ha 12 rreunión. Ojekalkula oho hague en totál 50.000 persóna. Oñeʼẽvo ko visítare pe rrevísta The Watch Tower heʼi: “Umi ermanokuérape ningo oñemokyreʼỹ ha oñemombarete. Haʼekuéra ojeheʼa ojuehe ha ombaʼapo oñondive, ha upéva ombovyʼaiterei chupekuéra”. Paríspe ermáno Rutherford ojapo jey pe diskúrso: “Hetaiterei oikovéva koʼág̃a nomanomoʼãi arakaʼeve”. Oñepyrũrõ guare pe diskúrso pe lugár henyhẽtéma, ha 300 persóna ojerure oñemeʼẽve hag̃ua chupekuéra informasión.

Umi semána sigiéntepe, Rutherford ha iñirũnguéra oho Atenas, El Cairo ha Jerusalénpe. Ikatu hag̃uáicha oñepytyvõ umi persóna oñeinteresa vaʼekuépe koʼã lugárpe, ermáno Rutherford omoñepyrũ peteĩ sukursál pe siuda héravape Ramala, ag̃uieténte Jerusaléngui. Upéi oho jey Európape ha omoñepyrũ pe sukursál de Europa Central ha oorganisa oñeimprimi hag̃ua upépe umi puvlikasión.

Septiembre de 1920-pe, umi Estudiánte de la Biblia onohẽ pe rrevísta The Golden Age número 27 (koʼág̃a hérava ¡Despertad!). Upéva haʼe vaʼekue peteĩ rrevísta espesiál, pórke ohechauka mbaʼéichapa ojepersegi vaʼekue umi Estudiánte de la Bíbliape 1918-pe. Pe imprénta el Acorazado  ajeʼi ñañeʼẽ hague, ombaʼapo ára ha pyhare oimprimi hag̃ua mas de 4 millón upe rrevísta.

Umi olee vaʼekue ko rrevísta oikuaa peteĩ mbaʼe iñextráñova oiko vaʼekue Emma Martin rehe, peteĩ prekursóra oikóva San Bernardínope, California, Estados Unidos. Pe 17 de marzo de 1918, haʼe ha mbohapy ermáno, Edward Hamm, Edward Sonnenburg ha Ernest Stevens oho peteĩ rreunión michĩva ojapóvape umi Estudiánte de la Biblia.

Peteĩ karai ohóva upe rreuniónpe, ndohói vaʼekue oaprendeve hag̃ua la Bíbliagui. Haʼe voi upe rire omombeʼu: “Pe fiskalía ojerure chéve aha hag̃ua upe rreuniónpe. Che aha akonsegi hag̃ua pruéva”. Ha otopa pe “pruéva” oheka vaʼekue, pe lívro El Misterio Terminado. Unos kuánto día haguépe, ermána Martin ha umi 3 ermánope ojegueraha préso. Ojeakusa chupekuéra nokumplíri hague pe Léi de Espionáhe orreparti rupi peteĩ lívro oĩva proivído.

Emma ha umi 3 ermánore ojeʼe haʼeha kulpávle, ha oñekondena chupekuéra 3 áño de kársel. Haʼekuéra heta vése oñehaʼã kuri pe trivunál okambia hag̃ua ikondéna, péro upéi ndaikatuvéima ojapo mbaʼeve, ha upéicha rupi pe 17 de mayo de 1920 ojegueraha chupekuéra kárselpe. Péro upéi iporãvéta kuri la situasión.

Pe 20 de junio de 1920, ermáno Rutherford omombeʼu upe experiénsia peteĩ asambléa ojejapo vaʼekuépe San Francisco, California, Estados Unídospe. Umi oĩ vaʼekue pe asambléape oñemondýi ha ndogustaiete voi chupekuéra mbaʼéichapa ojetrata kuri koʼã ermánope. Upévare omondo hikuái peteĩ telegráma pe presidénte de los Estados Unídospe. Haʼekuéra oskrivi: “Oréve g̃uarã haʼe peteĩ inhustísia pe kondéna oñemeʼẽ vaʼekue señóra Mártinpe ojeakusa haguére chupe nokumplíri hague pe Léi de Espionáhe. Umi ofisiál oipuru vai ijautorida, pórke omoñuhã señóra Mártinpe omoñepyrũ hag̃ua peteĩ káso ikóntrape, ikatu hag̃uáicha omondo chupe kárselpe. Oréve g̃uarã upéva iñinhústo ha oĩ vaieterei”.

Al día sigiénte, presidénte Woodrow Wilson pyaʼe porã oanula umi senténsia oñemeʼẽ vaʼekue ermána Martin ha ermáno Hamm, Sonnenburg, ha Stévenspe. Ha péicha opa pe inhustísia ohasa vaʼekue hikuái.

Opa potávo pe áño 1920, umi Estudiánte de la Biblia ohechakuaa oiko hague heta mbaʼe porã ha ikatuha ovyʼa hikuái upévare. Pe traváho ojejapóva pe sentrál mundiálpe osegi heta hetave, ha koʼytevéntema umi Estudiánte de la Biblia kyreʼỹme omombeʼu Ñandejára Rréino osolusionataha yvyporakuéra provléma (Mat. 24:14). Ha pe sigiénte áñope, 1921-pe hetavétantema kuri pe traváho ojepredika hag̃ua ha hetave lugárpema osegíta og̃uahẽ hikuái.