Yehauvas yeej cuab nws cov neeg lub zog kawg. Xyoo ntawd tsuas muaj 225 tus tho kev xwb tiamsis tom qab ntawd muaj 350 tus lawm. Xyoo no kuj yog thawj xyoo uas muaj tshaj li 8,000 tus tshaj tawm xa lawv cov sijhawm mus rau lub koom haum hauv paus loj. Yehauvas foom koob hmoov rau lawv tes haujlwm thiab muaj coob tus xav paub txog phau Vajlugkub.

Lub 3 Hlis tim 21 xyoo 1920, Kwvtij Yauxej Luthafaw (Joseph F. Rutherford) cev ib zaj lus qhuab qhia hu ua “Coob Tus Uas Muaj Sia Nyob Tamsim No Yuav Tsis Tuag Li.” Thaum ntawd Kwvtij Yauxej yog tus ntaus thawj ntawm Cov Tub Kawm Vajlugkub. Cov Tub Kawm Vajlugkub nrhiav tau ib lub tsev loj heev hauv lub nroog Nus Yauj Xiti (New York City) rau Kwvtij Yauxej cev zaj lus qhuab qhia no. Lawv kub siab lug caw tibneeg thiab tseb tag li 320,000 daim ntawv caw.

Muaj neeg tuaj coob heev tiamsis lub tsev tsuas ntim tau 5,000 tus xwb ces li 7,000 tus yuav tau rov mus tsev. Phau Tsom Faj hais tias zaum no yog ib zaug uas neeg tuaj mloog Cov Tub Kawm Vajlugkub zaj lus qhuab qhia coob tshaj plaws.

Txhua tus paub tias Cov Tub Kawm Vajlugkub yog cov uas tshaj tawm tias “coob tus uas muaj sia nyob tamsim no yuav tsis tuag li.” Thaum ntawd Cov Tub Kawm Vajlugkub tsis paub tias txoj xov zoo txog Vajtswv lub Nceeg Vaj yuav tsum coj mus tshaj tawm thoob ntiajteb. Txawm li ntawd los lawv kub siab lug ua Yehauvas tes haujlwm. Tus muam Aida Auxites (Ida Olmstead) pib mus kev sib txoos xyoo 1902. Nws hais tias: “Peb paub tias Vajtswv muaj txoj xov zoo rau noob neej peb thiaj rau siab ntso tshaj tawm txoj xov no rau txhua tus uas peb ntsib.”

Yuav kom peb muaj ntaub ntawv Vajlugkub ntau txaus, cov kwvtij hauv Npe-ee pib luam peb tej ntaub ntawv. Lawv yuav tau ib lub tshuab luam ntawv thiab xauj ib lub tsev hauv lub nroog Npluavlees xeev Nus Yauj (Brooklyn, New York) uas nyob tsis deb ntawm Npe-ee.

Li-aus Pes (Leo Pelle) thiab Vauthaw Khexalaw (Walter Kessler) tuaj ua haujlwm hauv Npe-ee lub 1 Hlis xyoo 1920. Vauthaw hais tias: “Thaum wb nyuam qhuav tuaj txog ntua xwb, tus kwvtij saib xyuas kev luam ntaub ntawv hais rau wb tias, ‘Tseem tshuav  li 1 txoos teev ntau peb mam li noj sus.’ Ces nws txawm kom wb mus nqa cov thawv ntawv hauv qab daus los.”

Li-aus qhia tias hnub tom qab ntawd nkawd ntxuav cov phab ntsa tsev nyob tshooj 1 rau lub tsev luam ntawv. Nws hais tias: “Txoj haujlwm no mas ceb muag thiab qias heev. Tiamsis wb zoo siab ua vim yog ua rau Yehauvas.”

Ob peb lub lim tiam tom qab xwb, peb twb pib luam Phau Tsom Faj lawm. Phau Tsom Faj lub 2 Hlis tim 1 xyoo 1920 yog luam nyob rau tshooj 2 hauv lub tsev luam ntawv. Hos hauv qab daus cov kwvtij muaj ib lub tshuab luam ntawv thiab. Cov kwvtij pib luam The Golden Age rau lub 4 Hlis tim 14 xyoo 1920. Peb pom tseeb tias Yehauvas yeej foom koob hmoov rau cov kwvtij no.

Lub sijhawm no Yehauvas cov neeg ib leeg txhawb ib leeg thiab rov qab kub siab ua Vajtswv tes haujlwm. Tiamsis xyoo 1917 txog 1919 thaum muaj kev kub ntxhov, Cov Tub Kawm Vajlugkub ib txhia tau tawm lub koom haum lawm. Cov kwvtij ua li cas thiaj pab tau lawv rov qab los?

Phau Tsom Faj lub 4 Hlis tim 1 xyoo 1920 zaj hu ua “Cia Peb Nyob Ua Ke Sib Haum Xeeb” hais li no: “Peb vam tias cov uas xav mloog Yehauvas lus yuav tsis xav txog tej uas lawv ua yuam kev yav tas los thiab rov los nrog Vajtswv cov neeg ua Vajtswv tes haujlwm.”

Zaj no pab tau coob tus rov qab los. Muaj ob niam txiv sau ntawv tuaj tias zaj no pab nkawd pom tias nkawd ua yuam kev lawm thaum nkawd tso tseg tsis mus tshaj tawm tau ob peb xyoo. Nkawd thiaj li kub siab lug rov qab mus tshaj tawm. Yehauvas muaj haujlwm ntau heev rau cov uas rov qab los rau hauv nws lub koom haum.

Lub 6 Hli tim 21 xyoo 1920, Cov Tub Kawm Vajlugkub kub siab lug tseb phau ntawv The Finished Mystery uas yog phau 7 ntawm phau ntawv Studies in the Scriptures. Xyoo 1918 tej nom tswv txwv tsis pub muab phau ntawv no mus tseb tawm peb thiaj muab phau no khaws cia tau ob peb xyoos.

 Cov tshaj tawm thiab cov tho kev tau tseb phau ntawv no. “Txhua tus hauv lub koom txoos uas twb ua kevcai raus dej lawm yuav tsum zoo siab hlo ua tes haujlwm no.” Thaum ntawd cov kwvtij muaj ib lo lus hais tias: “Tsuas muaj ib yam uas kuv ua xwb yam ntawd yog mus tseb phau ntawv The Finished Mystery.” Kwvtij Emoos Hupaws (Edmund Hooper) hais tias nov yog thawj zaug uas cov kwvtij coob tus mus tshaj tawm ib lub qhov rooj rau ib lub. Nws hais ntxiv tias: “Zaum no peb to taub tias tes haujlwm mus tshaj tawm zoo li cas tiag thiab yuav mus deb npaum li cas.”

Lub caij Ntsuj Rog Thoob Qab Ntuj Zaum 1, kev sib nug moo nrog Cov Tub Kawm Vajlugkub uas nyob lwm tebchaws tsis yoojyim. Kwvtij Yauxej Luthafaw xav mus txhawb lawv thiab qhia lawv mus tshaj tawm txoj xov zoo. Yog li ntawd lub 8 Hli tim 12 xyoo 1920, nws thiab 4 tug kwvtij thiaj li sawv kev mus rau tebchaws Askiv thiab lwm lub tebchaws.

Thaum Kwvtij Yauxej mus txog tebchaws Askiv, Cov Tub Kawm Vajlugkub muaj 3 lub rooj sib txoos thiab lwm txojkev sib txoos 12 zaug. Cov uas tuaj koom cov rooj sib txoos thiab cov kev sib txoos no tag nrho muaj li 50,000 tus. Phau Tsom Faj hais li no tias: “Cov kwvtij tau kev txhawb zog. Lawv zoo siab heev vim lawv tuaj sib koom ua ke thiab ib leeg pab ib leeg.” Thaum Kwvtij Yauxej mus txog lub nroog Paslis (Paris) nws rov qab cev zaj lus qhuab qhia “Coob Tus Uas Muaj Sia Nyob Tamsim No Yuav Tsis Tuag Li.” Neeg tuaj puv nkaus mloog zaj lus qhuab qhia no. Tom qab ntawd muaj 300 tus neeg xav paub ntxiv.

Lub sijhawm no ib co kwvtij kuj mus xyuas lub nroog Athees (Athens), Khailaus (Cairo), thiab Yeluxalees. Kwvtij Yauxej nrhiav tau ib qho chaw ua ib ceg Npe-ee hauv lub zos Lamala (Ramallah) uas nyob ze lub nroog Yeluxalees los pab cov uas xav paub phau Vajlugkub ntxiv. Ces nws rov qab mus rau sab Yus Luv thiab tsa ib lub Npe-ee los luam peb tej ntaub ntawv nyob rau hauv.

Lub 9 Hlis xyoo 1920, Cov Tub Kawm Vajlugkub luam tawm phau The Golden Age phau 27. Phau no qhia txog tej kev tsim txom  uas Cov Tub Kawm Vajlugkub raug xyoo 1918. Lub tshuab luam ntawv nyob hauv qab daus ua haujlwm nruab hnub hmo ntuj luam phau ntawv no tau li 4 plhom tawm phau.

Cov uas nyeem phau ntawv no paub txog tej uas los raug tus Muam Ema Mateem (Emma Martin). Tus Muam Ema yog ib tug tho kev hauv lub nroog Xees Npawnadinau hauv lub xeev Kalifaunias (San Bernardino, California). Lub 3 Hlis tim 17 xyoo 1918, Ema thiab 3 tug kwvtij mus ib qho kev sib txoos me me nrog Cov Tub Kawm Vajlugkub.

Ib tug txivneej tuaj ntawd tsis yog tuaj kawm phau Vajlugkub. Tus txivneej no hais tias: “Kuv mus koom lawv qhov kev sib txoos ntawd vim cov nom tswv cov kws lij choj txib kom kuv mus nrhiav pov thawj los ua plaub rau lawv.” Nws nrhiav tau phau ntawv The Finished Mystery. Ob peb hnub tom qab ntawd, Ema thiab 3 tug kwvtij ntawd txawm raug ntes mus kaw vim lawv tseb phau ntawv uas nom tswv txwv.

Lub rooj hais plaub txiav txim tias Ema thiab 3 tug kwvtij ua txhaum thiab yuav raug kaw 3 xyoos. Lawv thov lub tsev hais plaub ob peb zaug kom rov qab hais zaj plaub ntug no tiamsis lawv tsis kam. Lub 5 Hlis tim 17 xyoo 1920 lawv thiaj raug coj mus kaw lawm. Tiamsis lawv raug kaw tsis ntev.

Lub 6 Hli tim 20 xyoo 1920, Kwvtij Yauxej Luthafaw qhia txog Ema thiab 3 tug kwvtij ntawd rau cov uas tuaj koom lub rooj sib txoos hauv lub nroog Xees Falaxikaus (San Francisco). Sawvdaws pom tias qhov uas Ema thiab 3 tug kwvtij raug no tsis ncaj ncees lawm, lawv thiaj sau ntawv mus rau tus nom loj hauv tebchaws U.S.A. Cov kwvtij hais tias qhov uas cov nom tswv txhob txwm nrhiav plaub muab tus Muam Ema coj mus kaw txhaum cai lawm.

Hnub tom qab kiag xwb tus nom loj hauv tebchaws U.S.A. hais kom lawv txo tus Muam Ema thiab 3 tug kwvtij ntawd lub txim thiab tso lawv tawm.

Cov Tub Kawm Vajlugkub pom tias xyoo 1920 muaj ntau yam zoo rau lawv. Tes haujlwm hauv lub koom haum hauv paus loj muaj ntau zuj zus thiab Cov Tub Kawm Vajlugkub kub siab lug tshaj tawm tias tsuas yog Vajtswv lub Nceeg Vaj xwb thiaj kho tau noob neej tej teeb meem. (Mathais 24:14) Thiab xyoo 1921 los lawv haj yam kub siab mus tshaj tawm txoj xov zoo txog Vajtswv lub Nceeg Vaj.