Yehowa gaw myit rawt ai hkaw tsun masha ni hpe n-gun atsam jaw wa ai. Dai shaning hta kopota ngu ai ningshawng ni gaw, marai 225 kaw nna 350 du hkra rawt jat wa ai. Shawng nnan hku nna hkaw tsun masha 8,000 jan nga wa ai. Yehowa gaw shanhte hpe mauhpa shaman chyeju jaw ai.

1920, March 21 hta, dai aten hta Chyum Jawng Ma ni hpe woi awn nga ai Josep Radahpot gaw, “Dai Ni Asak Hkrung Nga Ai Wan Hku Law Ai Ni Gaw Galoi Mung N Si Sana” ngu ai ga baw hte mungga htawn tsun wa ai. Chyum Jawng Ma ni gaw, myit lawm ai ni hpe dang lu ai daram saw shaga ai. Nyu Yawk Siti na kaba htum gawknu hpe shap nna, saw shaga laika 320,000 daram garan wa ai.

Myit mada da ai hta grau nna sa lung ma ai. Gawknu gaw marai 5,000 sha shang ai majaw, marai 7,000 daram gaw bai n htang wa ra mat ai. Mungdan shagu na Chyum Jawng Ma ni galaw ai zuphpawng hta na ndai zuphpawng gaw, awng dang dik htum kaw na langai re ngu nna Sin Langchyi hta tsun da ai.

Chyum Jawng Ma ni hpe “Dai Ni Asak Hkrung Nga Ai Wan Hku Law Ai Ni Gaw Galoi Mung N Si Sana” ngu ai lam hpe ndau shana ai ni hku nna chye wa ma ai. Dai aten hta, mungdan shiga hpe grau nna htawn tsun ra na ngu ai lam hpe shanhte n chye na ai. Raitim, shanhte gaw matut myit rawt nga ai. 1902 hta zuphpawng ni lung hpang wa ai nauna Ida Umsted ndai hku tsun ai: “Masha yawng a matu shaman chyeju ni nga ai lam anhte chye ai majaw, hkrum ai masha ni hpe dai kabu gara shiga n hkaw tsun ai sha n nga ai.”

Wenyi nshat hpe madi shadaw ya na matu, Behtela kaw nga ai hpunau ni gaw, laili laika nkau mi hpe shanhte nan dip shapraw hpang ai. Shanhte gaw laika dip jak hpe mari nna, Behtela nta hte nau n tsan ai No.35, Mata, Abennyu Bruklin, Nyu Yawk hta htingnu langai hpe shap nna, dai jak hpe shachyaw da ai.

1920, January hta, Hpunau Liyo Pe hte Wawta Kesla gaw, shanhte du sai lam Behtela magam dap de shana ai. “Anhte du ai shaloi,” laika dip dap hpe woi awn ai hpunau gaw ndai hku tsun ai, ‘shat sha ai aten du hkra nanhte  hta hkying hkum mi jan sha aten nga sai yaw’ ngu nna tsun ai lam” hpunau Wawta bai tsun dan ai. Nta lawu htap na laika buk nkau mi hpe sa la na matu anhte hpe tsun ai.

Hpang shani hta galaw ai lam hpe Liyo ndai hku bai tsun dan ai: “Anhte gaw htap langai kaw na shakum ni hpe kashin ra ai. Ngai galaw wa ai bungli ni kaw nna maza dik htum ai bungli ni re. Raitim, ndai gaw, Madu a bungli re ai majaw, galaw na matu gingdan ai.”

Bat loi mi laman hta sha, myit rawt ai shawang lit gun ai ni a majaw, Sin Langchyi hpe dip shapraw lu wa ai. 1920, February 1, Sin Langchyi laika buk 6,000 hpe htap lahkawng hta dip shapraw lu wa ai. Lawu htap hta gaw, sanghpaw dingsa ngu shaga ai laika dip jak hpe hpunau ni shachyaw ai. 1920, April 14 kaw nna, Aja Prat ngu ai laika buk hpe mung dip shapraw hpang ai. Shawang lit gun ai ni a shakut shaja ai lam hpe Yehowa shaman chyeju jaw nga ai gaw danleng nga ai.

Yehowa a sadi dung ai masha ni gaw, galaw hkawm sa ai lam nnan ni hte kanawn mazum ai lam ni hta ngwi pyaw ai lam hkamsha nga ma ai. Raitim, Chyum Jawng Ma nkau gaw, 1917 kaw nna 1919 grai yakhkak ai aten laman, uhpung kaw nna pru mat wa ai. Shanhte hpe karum ya na matu hpa galaw lu ai kun?

1920, April 1, Sin Langchyi hta “Ngwi Pyaw Simsa Let Nga Ga” ngu ai sumhpa lawm wa ai. Shanhte hpe tsawra myit hte ndai hku n-gun jaw da ai: “Madu a chyoi pra ai wenyi lu ai ni gaw lai wa sai aten hpe malap kau nna, Karai a amyu masha ni hte arau kahkyin gumdin let matut magam gun na hpe anhte kam ai.”

Tsawra myit lawm ai dai ga ni hpe masha law law hkap la ai. Yan la langai ndai hku tsun ai: “An gaw lai wa sai aten hta, shut mat ai. Hkaw tsun bungli hta n shang lawm wa ai. Raitim, ya gaw, myit rawt let hkaw tsun na matu dawdan da ai.” Bai shamu shamawt wa ai masha ni a matu galaw ra na bungli ni grai law hkra nga ai.

1920, June 21 hta, Chyum Jawng Ma ni gaw, “Ngut Mat Sai Sung Htum Lam” ngu ai “ZG” laika buk hpe shabra ai kemping hta shang lawm  wa ai. * 1918 hta, dai laika buk hpe hkum pat da ai majaw, grai law hkra ngam taw ai.

Ningshawng ni hpe sha n-ga, hkaw tsun masha yawng hpe mung ndau shabra ai bungli hta shang lawm na matu saw shaga ai. “Nawku hpung yawng kaw na hkalup hkam da sai ni gaw, ndai bungli hta sharawng awng let shang lawm ging ai. Ngai galaw lu ai lam langai mi gaw, “ZG” laika buk hpe shabra na matu re” ngu tsun nna shada da n-gun jaw hkat ma ai. Ndai kemping gaw, nta langai hpang langai hkaw tsun bungli galaw ai lam ni kaw nna shawng nnan lang re ngu nna Emat Huppa tsun ai. Shi ndai hku mung tsun ai: “Anhte myit mada da ai hta na, grau nna galaw ra na ngu ai hpe anhte chye na wa ai.”

Nambat 1 Mungkan Majan laman, kaga mungdan hta nga ai Chyum Jawng Ma ni hte matut mahkai na matu yak ai majaw, Hpunau Radahpot gaw, dai hpunau ni hpe n-gun jaw mayu nna, hkaw tsun bungli hte seng ai lam ni hpe mung bai hpawng de ya mayu ai. Dai majaw, 1920, August 12 hta, shi hte kaga hpunau 4 gaw Ingalan mung hte kaga mungdan ni de hkrun lam galu hkawm ai.

Hpunau Radahpot gaw Britin de sa chyai ai shaloi, Chyum Jawng Ma ni gaw ginwang zuphpawng 3 hte shawa zuphpawng 12 hpe galaw ma ai. Sa lung ai masha yawng gaw 50,000 daram re. Hkrun lam hkawm ai hte seng nna Sin Langchyi hta ndai hku kadun dawk tsun da ai: “Hpunau nauna ni n-gun lu la ma ai. Shanhte gaw grau zinlum wa nna, tsawra wa ai, magam bungli hpe mung arau galaw ai, shanhte grai ngwi pyaw ma ai.” Perit hta, Hpunau Radahpot gaw, “Dai Ni Wan Hku Law Ai Asak Hkrung Ai Ni Gaw Galoi Mung N Si Sana” ngu ai ga baw hpe bai htawn tsun ai. Mungga hpang ai hte gawknu gaw hpring mat ai. Masha 300 daram gaw grau nna sanglang dan na matu hpyi shawn ma ai.

Hpang na bat ni hta, hpunau nkau gaw, Ahten, Kairo hte Jerusalem de sa kawan ma ai. Dai shara ni hta, myit lawm ai masha ni hpe bai kawan na matu, Hpunau Radahpot gaw, Jerusalem makau na Ramala mare hta laili laika dap hpe gaw de da ya ai. Urawpa de bai wa nna, Ka-ang Urawpa Rung hpe gaw de ya ai. Dai shara kaw laika dip shabra na matu lajang ya wa ai.

1920, September hta, Chyum Jawng Ma ni gaw nambat 27 lang na Aja Prat ngu ai laika buk hpe dip shapraw wa ai. Dai hta, laksan hku nna 1918 laman, Chyum Jawng Ma ni a zingri zingrat hkrum ai lam ni hpe tsun dan da ai. Sanghpaw dingsa ngu ai jak gaw, ndai magazin hpe wan 4 jan dip shapraw lu na matu shani shana bungli galaw ai.

Dai magazin hpe hti ai ni gaw, Ema Matin a mabyin hpe hti lu ai. Nauna Matin gaw, Kelihponiya, San Banadino kaw na kopota langai re. 1918, March 17 hta, shi hte hpunau 3 re ai E. Ham, E. J. Sonnanbak hte E. A. Stibin ni gaw, Chyum Jawng Ma ni a zuphpawng langai hpe sa lung ai.

Sa lung ai ni kaw na marai langai gaw Chyum Laika hkaja na matu n re. “Tara rung kaw na shangun ai majaw, dai zuphpawng de sa ai re” ngu nna hpang de shi bai tsun dan ai. “Sakse mu tam na matu, ngai dai de sa wa ai re.” Ngut Mat Sai Sung Htum Lam ngu ai laika buk langai hpe sakse hku nna shi lu la mat ai. Nhtoi loi mi na ai hpang, nauna Matin hte hpunau 3 gaw rim hkrum ai. Shanhte gaw hkum pat da ai laika buk hpe shabra ai majaw, tara tawt lai ai ni hku nna tara shawk shawn hkrum ai.

Ema hte manang 3 hpe mara nga ai ngu tsun nna, 3 ning htawng jahkrat kau ai. 1920, May 17 hta, ayuhkam sum mat ai majaw, htawng hkrat mat ai. Raitim, kaja ai masa de gale mat ai.

1920, June 20 hta, Hpunau Radahpot gaw, San Hpransitsako hta galaw ai ginwang zuphpawng hta shanhte a mabyin hpe tsun dan ai. Madat nga ai ni gaw, dai Hkristan ni hpe kanawn mazum ai lam hte seng nna, grai mau mat ai majaw, gumsan magam hpang de tang shawn laika ni shagun ma ai. Shanhte ndai hku ka ai: “Nauna Matin hpe htawng jahkrat na matu dingsang galaw da ai majaw, asuya gaw ahkang aya hpe shut ai hku akyu jashawn ai ngu anhte hkamsha ai.”

Hpang shani hta, gumsan magam Wudro Wisin gaw, nauna Matin, hpunau Ham, hpunau Sonnanbak hte hpunau Stibin ni hpe kalang ta shalawt dat ya ai. N tara ai hku htawng jahkrat hkrum ai kaw na lawt lu wa ai.

1920 htum na aten hta, Chyum Jawng Ma ni gaw, dai lam hte seng nna grai kabu ma ai. Gin jaw rung gaw, bungli ni hpe moi na hta grau nna jat galaw ai. Chyum Jawng Ma ni gaw, shinggyim masha ni a manghkang ni hpe hparan ya lu ai Karai A Mungdan lam hpe myit rawt let hkaw tsun ma ai. (Mat 24:14) 1921 ning gaw, Mungdan tengman lam hpe grau nna ndau shana ai shaning pyi byin wa ai.