Jehova ga nkondopekere vazuvhisi owo. Momvhura ozo, sivaro sovazuvhisi wokukarerera kwa ligwedererere kutunda 225 dogoro 350. Ano momvhura zoozo hena, vazuvhisi wokusika ko-8 000 kwa geve nonzapo dawo domoyirugana yokuzuvhisa. Esi kwa kere sikando sokuhova. Yitundwamo eyi ya ya horokere konyima kulikida asi Jehova kwa va tungikire.

Mo-21 Nsinano 1920, Joseph F. Rutherford ogu nga pitisire Valirongi woBibeli posiruwo sina, kwa geve siuyungwa sosiparatjangwa asi: “Mamiliyona govantu ava vana kuparuka kapi ngava fa hena.” Valirongi woBibeli kwa rugene paapa va hulira yipo va gavere yimbapira yezigido kosilika oso. Awo kwa futilire evango limwe lyenene eli ava ruganene yilika mositata saNew York ntani awo kwa hanesere yimbapira yezigido yokusika 320 000.

Vantu wovanzi kwa wizire. Vantu wokusika 5 000 kwa kere mevango olyo, ano 7 000 kwava tengwidire morwa evango enunu lya kere. Ruhungu kwa tente kuhamena sihorokwa oso asi: “Eli kwa kere epongo lyenene po lyokuhengagwida eli va dilire kurugana rumwe posiruwo sina.”

Valirongi woBibeli kwa divikwire morwa siuyungwa oso va divisire kovantu. Posiruwo sina, awo kapi va kwete egano asi mbudi zoUhompa ngazi ligwederera unene mouzuni mudima. Nye nampili ngoso, awo kwa twikilire kuzuvhisa noupampi. Ida Olmstead ogu ga tamekere kuza komapongo mo-1902 kwa tanta asi: “Twa yi divire asi mauwa manzi ngava gwana vantu komeho ntani ose kwa twikilire kuzuvhisa mbudi zongwa kovantu ava ngatu ligwana nawo mokuzuvhisa.”

Vanavazinyetu ava ngava rugana koBeteli kwa tamekere kunduruka yimbapiratjangwa, yipo vantu va gwane nondya dopampepo. Awo kwa rende ehina lyokunduruka eli va tulire metungo eli va futilire ava tumbura asi 35 Myrtle Avenue moBrooklyn moNew York eli lya kere pepi noBeteli.

Leo Pelle naWalter Kessler kwa tamekere sirugana sokoBeteli mwaMurongagona 1920. Walter kwa tanta asi: “Apa twa ka sikire, munazinyetu ogu nga gendesa sirugana sokunduruka kwa tu tanterere asi: ‘Muna kara novili zimwe noharufa komeho gu tameke muzuhwa.’ Age kwa tu tanterere tu damagure mapakote gonobuke tu ga guse monzugo zepevhu nokugatwara konzugo zekeguru.”

 Leo kwa tente eyi ya horokere ezuva lyokukwama ko. Age kwa tente asi: “Ose kwa zeresere ekuma monzugo zepevhu. Esi kwa kere sirugana esi na dilire kuhara. Nye aso kwa kere sirugana saHOMPA ntani naso sa kere nomulyo.”

Konyima tupu zoyivike yongandi, vazuvhisi kwa tamekere kunduruka Ruhungu. Yifo mayovi ntazimwe yoRuhungu romo-1 Murongankuru 1920 kwa yi ndurukire monzugo zekeguru. Ano posiruwo sooso, vanavazinyetu kwa tulire hena ehina lyokunduruka monzugo zepevhu eli ngava tumbura asi Battleship. Kutamekera mo 14 Kudumogona 1920, sifo esi ngava tumbura asi The Golden Age kwa tamekere naso kusinduruka. Yosili, Jehova kwa tungikire vanavazinyetu owo mosirugana esi.

Vantu vaJehova wovalimburukwi ngava hafere yirugana yawo ntani awo kwa kere mouumwe. Nye nampili ngoso, Valirongi vamwe woBibeli kwa ligusire ko kombunga morwa yiruwo yoyidigu eyi ya kere ko mo-1917 dogoro 1919. Ngapi omu vava vaterere va tengure kombunga zaJehova?

MoRuhungu romo-1 Kudumogona 1920 kwa kere mo siparatjangwa asi: “Tu kareni mombili.” Amo kwa kere mo nonkango edi da tumangedere vantu asi: “Tuna si huguvara asi . . . vantu one mwa kara nompepo zokupongoka, . . . nomu divara yininke yanare nokuyisiga yipo tu kare mombili nokutwikira ngorutu rumwe.”

Vantu wovanzi va tambwire nonkango odo. Valikwali vamwe kwa tjenge asi: “Ose kwa kere mepuko kweyi twa hagekere kuzuvhisa. . . . Ngesi tuna tokomene kuzuvhisa.” Vanavazinyetu owo va kere noyirugana yoyinzi eyi yava ndindilire komeho.

Mo-21 Pembagona 1920, Valirongi woBibeli kwa tamekere sirugana sosinene sokuhanesa buke The Finished Mystery, the seventh volume of Studies in the Scriptures. Nobuke dononzi kwa di pungwire monzugo pungwiro apa buke ozo va zi nyokesere kuzihanesa mo 1918.

 Vazuvhisi navenye kwa va pulire va hanese buke ozo. Buke The Finished Mystery kwa tente asi: “Nkenye muzuvhisi [gokugwana ekuho] ogu ga kere mombungakriste ga hepere kulihameka mo nomutjima nagunye.” Edmund Hooper kwa tanta asi esi kwa kere sirugana sokuhova sa tunda embo zende embo esi va dilire kurugana rumwe posiruwo sina. Age kwa tanta hena asi: “Ose twa yi kwete egano asi sirugana esi ngasi ligwederera unene komeho.”

Mokumona asi Valirongi woBibeli womoyirongo yokulisiga-siga kapi va kere mouumwe morwa yita yokuhova youzuni mudima, munazinyetu Rutherford kwa here a korangede vanavazinyetu owo yipo va twikire kuzuvhisa. Mo 12 Siwogedi 1920, munazinyetu Rutherford novakwawo vane kwa zire va ka dingure Ingiranda ntani noyirongo yimwe hena.

Apa munazinyetu Rutherford ga tengwire koBritania, Valirongi woBibeli kwa kere noyigongi yitatu ntani nomapongo 12 gokulikarera. Vantu ava va pongere pomapongo nagenye ogo kwa ka sikire po-50 000. Ruhungu kwa tente kuhamena yitundwamo asi: “Vanavazinyetu kwa ya va korangedere. Awo kwa kere mouumwe ntani ngava rugana kumwe ano eyi kwa va hafesere.” MoParis, munazinyetu Rutherford kwa geve hena siuyungwa sosiparatjangwa: “Mamiliyona govantu ava vana kuparuka kapi ngava fa hena.” Apa sa tamekere siuyungwa, mevango kwa zulire mo vantu. Vantu wokusika komafere gatatu kwa here hena kuzuvha ko yoyinzi.

Moyivike eyi ya kweme ko, munazinyetu Rutherford novakwawo kwa zire va ka dingure sitata saAthens naCairo ntani Jerusalem. Munazinyetu Rutherford kwa tulisire po evango lyokupungwira yimpapiratjangwa modoropa Ramallah pepi naJerusarema. Makura yipo ga tengwire koEuropa, ta ka tulisa po Beteli nomawapaiko gokunduruka yimbapiratjangwa.

MwaSitatara 1920, Valirongi woBibeli kwa pwagesere sifo so 27 The Golden Age. Mosifo oso kwa tjenge mo mahepeko aga va li gwanekerere nago Valirongi woBibeli mo-1918. Ehina lyokunduruka ava tumbura asi Battleship eli tuna tumbura nare, ngali rugana mutenya nomasiku yipo va nduruke sifo oso kupitakana pomamiliyona gane.

Mosifo oso, varesi kwa ya dimbwilire mo sihorokwa samunazinyetu Emma Martin. Munazinyetukadi  Martin kwa kere muzuvhisi gokukarerera moSan Bernardino, California. Mo-17 Nsinano 1918, nage novakwawo vatatu E. Hamm naE. J. Sonnenburg ntani A. Stevens, kwa zire kepongo lyoValirongi woBibeli.

Mugara gumwe ogu ga kere mepongo olyo, kapi ga wizilire mo nositambo sokuyalironga Bibeli. Konyima age kwa ya tente asi: “Ame kwa zire kepongo olyo morwa mukurona gomomberewa zompanguro yige ga tumine nge. Ame kwa zire ko nositambo sokukagwana maumbangi.” Age kwa gwene maumbangi aga ga paparere, buke The Finished Mystery. Konyima zomazuva gomasesu, munazinyetu Martin novanavazinyetu vatatu kwa va kwete. Awo kwa va gwene unzoni asi vana teza po veta pokuhanesa buke ezi va silikire.

Emma novakwawo vatatu kwava gwene unzoni nokuvatomena nomvhura ntatu modorongo. Awo ngava zi kohofa yikando yoyinzi yipo asi va ka va pangure hena. Mo-7 Kudumonkuru 1920, hofa kwa tokwere asi tava va tura modorongo. Nye konyima, ukaro wawo wa ya litjindjire.

Mo-20 Pembagona 1920 apa munazinyetu Rutherford ga kere posigongi moSan Francisco. Age kwa simwitilire eyi ya horokerere vanavazinyetu owo. Vantu ava va kere posigongi oso kwava tetukisire kweyi ya horokerere vanavazinyetu owo makura tava tumine mbudi peresidente gwaAmerika pokuruganesa telegarama. Awo kwa tjenge asi: “Mpanguro ezi . . . ga ligwanekerere nazo Martin kapi za kere zongwa. Eyi lya rugene epangero . . . kwamunazinyetu Martin mokumutura modorongo kapi lya kere etokoro lyouhunga nye lyoufuki.”

Ezuva lyokukwama ko peresidente Woodrow Wilson kwa geve mpangera va pwagese mo modorongo munazinyetukadi Martin namunazinyetugara Hamm naSonnenburg ntani Stevens. Awo kapi va kere hena modorongo.

Kouhura womvhura 1920, Valirongi woBibeli va ya dimbwilire asi pwa kere yininke yoyinzi yokuvhura kuvahafesa. Yirugana yokomberewa zonene kwa twikilire kuligwederera ntani Valirongi woBibeli kwa litulire mo unene va zuvhise asi Uhompa waKarunga yiwo welike ngau gusa po maudigu govantu. (Mat. 24:14) Ano mo-1921, kwa kere mvhura zomulyo unene ezi va divisire kuhamena Uhompa.