Yehova wayikolesheli awa akwakushimwina. Munichi chaaka nambala yawakolopota hela apayiniya yavuliliku kufuma ha 225 nakwinza ha 350. Nawa akwakukalakala hela akwakushimwina akubadika ha 8,000 atemesheli katachi maora kukasanji keneni. Yehova wayikiswilili hakudihana kwawu.

HaMarch 21, 1920 Joseph F. Rutherford, walombweleña mudimu wazatileña Atudizi aBayibolu hayina mpinji, wahanini mpanji yahosheleña nawu “Antu Amavulu Achidi Amomi aKafwa Wanyi.” Atudizi aBayibolu azatili nañovu yejima kutambika antu kwinza kuniku kupompa. Asonkeleli itala deneni dayisela muNew York City nawa ahanini yipapilu yakutambika nachu antu yakushika ku 320,000.

Antu amavulu etejeli iwu mutambi kubadika chakuhweleleliwu Atudizi aBayibolu. Idi itala denzeli nawantu 5,000 apompeli nawa antu 7,000 afuntili muloña mwenzeli nankashi. Kaposhi Kakutalila kahosheli nawu: “Iku dikupompa kweneni kwawaTudizi aBayibolu kwapompeli antu amavulu.”

Atudizi aBayibolu ayilukili nankashi nansañu yashimwinineñawu yahosheleña nawu “antu amavulu achidi amomi akafwa wanyi.” Haniyi mpinji elukishili wanyi nawu nsañu yaWanta atela kuyishimwina kumaluña amakwawu. Hela chochu, adiña neyena dakuzata. Muhela Ida Olmstead, watachikili kupompa mu 1902, wahosheli nindi: “Twelukili netu yuma yayiwahi yikatambwilawu antu yidi kumbidi nawa hitwakañenyi kuyishimwina antu ejima itwabulakeneña nsañu yayiwahiku.”

Hakwila nawu yakuda yakuspiritu yivuli, amanakwetu haBeteli atachikili kudipulintila awenawu nyikanda. Alandili ikina nawa adishili mwitala dasonkeleleñawu dadiña ku 35 Myrtle Avenue, Brooklyn, New York, hadiña hohu matala antesha kufuma haBeteli.

Manakwetu Leo Pelle niWalter Kessler atachikili kuzatila haBeteli muJanuary 1920. Manakwetu Walter wahosheli nindi: “Chitwashikili manakwetu watalileña mudimu wakupulinta watutalili nawa wahosheli nindi, ‘Munashali naora  yimu nachikunku kulonda muyi hachayili.’ Watulejeli nindi tunoni yikasha yanyikanda.”

Leo wanukaña chamwekeni ifuku dalondelelihu, wahosheli nindi: “Yetu twadiñi namudimu wakuwahisha jimbañu jatupeka twaheshina munidi itala.” Kanda nizateñahu dehi mudimu wamajilu neyi iwuku. Twazatili muloña wadiña himudimu waYehova nawa dichaletesheli wikali walema.”

Munyilungu yantesha hohu, Kaposhi Kakutalila atachikili kukipulinta kudi amanakwetu adihanini. Kaposhi Kakutalila kaFebruary 1, 1920, akipulintili mukuvula 60,000, hetala damuchiyedi kuya hewulu. Mukapeka kaheshina amanakwetu ashilimu ikina datumbiliwu nawu Battleship. Kutachika haApril 14, 1920, atachikili cheñi kupulinta magazini yaThe Golden Age. Chakadi nikujina Yehova wakiswilili mudimu wazatileña awa amanakwetu adihanini.

Antu jaYehova ashinshika adiña nakudifukwila hamu nikuzatila hamu. Hela chochu, Atudizi aBayibolu amakwawu afumini mukuloñesha hampinji yikwadiñi kukala mu 1917 nakushika mu 1919. Yumanyi yeliliwu hakwila nawu ayikwashi?

Kaposhi Kakutalila kaApril 1, 1920, kadiña nachibaba chahosheleña nawu “Tuletenu kuwunda.” Chahosheli nawu: “Tuneluki chikupu netu . . . muntu wejima wukweti spiritu yaMwanta . . . wukujimbalaku yuma yejima yamwekeni kunyima . . . nakudinuña nikuzatila hamu neyi mujimba wumu.”

Amavulu azatishili awa mazu. Adisumbula amu asonekeli nawu: “Tuneluki netu twaluwañesheli hakushakama hadi chaaka chamukuma iku akwetu anakushimwina. . . . Tunakuhweleli chikupu netu hitwamba kaluwankana cheñiku.” Awa amanakwetu afuntili adiña namudimu weneni wakuzata.

HaJune 21, 1920, Atudizi aBayibolu atachikili kampeni yakuhana mukanda ‘waZG’ wadiña nachipapilu chahewulu chamukanda waThe  Finished Mystery. * Nyikanda yayivulu hanyikanda yahaniniwu yadiña hinyikanda yatentekeliwu hawulekesheliwu iwu mukanda mu 1918.

Akwakushimwina ejima kushilahu niapayiniya ayilejeli kuzataku iwu mudimu. “Mukwakushimwina wejima wapapatishewa wamuchipompelu chejima watela kuzata mukudikeñela. Muntu wejima yanukeña awa mazu. ‘nelaña chuma chimu hohu’ kutiyakesha nsañu yidi muZG.” Edmund Hooper wahosheli nindi iyi kampeni yakushimwina kwitala nikwitala diyadiña mudimu weneni wazatiliwu antu amavulu katachi. Wabombelelihu nindi: “Twenjili nakwiluka yuma yabombeleleli muniwu mudimu.”

Chineli chadiña chakala kuhanjeka nawatudizi aBayibolu adiña mumatuña amakwawu mumpinji yaNjita Yakaayi Yatachi, Manakwetu  Rutherford wakeñeleña kukolesha awa amanakwetu nikutachika cheñi kushimwinamu. Dichi haAugust 12, 1920, yena niamanakwetu awana ayili kuBritain, kuEurope nikuMiddle East.

Chelili manakwetu Rutherford yayi kuBritain, atudizi aBayibolu ekalili nakupompa kweneni kusatu nikupompa kwachipompelu 12. Antu apompeli atela ashikili ku 50,000. Kaposhi Kakutalila kahosheli hanilu lwendu nawu: “Amanakwetu akolesheweli. Adikundili chikupu wumu namukwawu nawa azatilileña hamu, chumichi chayizañalesheli.” MuParis, Manakwetu Rutherford wahanini cheñi mpanji yahosheleña nawu “Antu Amavulu Achidi Amomi aKafwa Wanyi.” Chatachikili mpanji, mwapompeleleñawu mwenzeli. Antu 300 alombeli nawu adiziliku cheñi nsañu yikwawu.

Munyilungu yalondelelihu, amakwetu ayili kuAthens, Cairo, nimuJerusalem. Hakwila nawu ayikoleshi amanakwetu amunawa maluña, Manakwetu Rutherford waloñesheli kwakushikena nyikanda mumusumba waRamallah, kukamwihi naJerusalem. Nkumininaku wafuntili muEurope nakushaku kasanji kakutalaña matuña amuEurope nawa atachikili kupulinta nyikanda hanaka kasanji.

MuSeptember 1920, Atudizi aBayibolu edishili magazini yaThe Golden Age No. 27, magazini yasolweli makabisha amweniwu Atudizi aBayibolu  mu 1918. Ikina dakupulinta nachu daBattleship ditwatena hakusambila dazatili mwana niwufuku kupulinta magazini kubadika ha 4 miliyoni.

Antu atañili iyi magazini elukili chuma chamumwekeneni muhela Emma Martin. Muhela Martin wadiña kolopota muSan Bernardino, California. HaMarch 17, 1918, yena niamanakwindi asatu. Hamm, E. J. Sonnenburg, niE. A. Stevens, apompeli hamu.

Muntu wumu hakachi kawu henjili nankeñelu yakudiza Bayiboluku. Wahosheli nindi: “Nayili kuniku kupompa muloña antumini kudi mukulumpi wamunfulumendi. Nayili nakusendaku wunsahu.” Wasendeli “wunsahu” wakeñeleñayi, mukanda waThe Finished Mystery. Chimwahitili mafuku antesha, Muhela Martin niamanakwetu asatu ayikwatili. Ayinkeli muloña wakufumpa nshimbi muloña adiña nakuhana mukanda wakanishiliwu.

Muhela Emma niamanakwetu asatu ayiwanini namuloña nawa ayikasili yaaka yisatu mukaleya. Aholokeleli kuchota kapampa kakavulu, ilaña kwosi chuma chazatikili. Dichi haMay 17, 1920, atachikili kuzata yaaka yayipimininiwu. Ilaña yuma yenjili nakuwaha.

HaJune 20, 1920, Manakwetu Rutherford washimwini hakupompa kweneni kwadiña muSan Francisco, California, mu U.S.A chuma chayimwekeneni amanakwetu nimuhela. Antu apompeli atiyili kutama hanichi chuma chayimwekeneni awa akwaKristu, dichi amutemesheleli Telegiramu kajiña mpata wetuña daUnited State. Asonekeli nawu: ‘Tunamoni netu nfulumendi yinazatishi wuswa wayu chatama hakukwata kafuta kulonda amukasi Mrs Martin.’

Ifuku dahiñilihu, kajiña mpata Woodrow Wilson wajimini muloña wamukasililiwu Muhela Martin niamanakwetu Hamm, Sonnenburg, naStevens. Ayumbiliku.

Chamanineña chaaka cha 1920 Atudizi aBayibolu amweni nawu kudi yuma yayivulu yamwekeni yayizañalesheli. Mudimu hakasanji keneni wayililuku hambidi chikupu, aKwaKristu alala atwalekelihu nakudikita nakushimwina nawu Wanta waNzambi diwukamanisha kukala kunakumonawu antu ejima. (Mat. 24:14) Chaaka chalondelelihu cha 1921, ashimwinini chikupu nsañu yaWanta.