Zeova ti fortifie sa bann predikater bien zele la. Pandan sa lane-la, kantite bann kolporter (ki azordi nou apel pionie) ti ogmante. Zot ti sorti 225 pou vinn 350. Ek pou premie fwa, plis ki 8000 proklamater ti avoy zot rapor biro mondial. Zeova ti beni zot dan enn fason extraordiner!

Le 21 Mars 1920, Frer Joseph Rutherford, ki sa lepok-la ti pe diriz bann Etidian Labib, ti fer enn diskour ki ti ena tem: “Bann Milyon Dimounn Ki Pe Viv Asterla Zame Pa Pou Mor.” Bann Etidian Labib ti fer zot maximum pou invit tou bann ki interese pou sa levennman-la. Zot ti lwe enn parmi bann pli gran teat ki ena dan New York ek zot ti distribie apepre 320,000 linvitasion.

Bann Etidian Labib pa ti atann ki sa kantite dimounn la ti pou vini. Plis ki 5,000 dimounn ti reisi asiste sa levennman-la, me akoz pa ti ena plas dan teat-la, 7,000 dimounn pa ti reisi gagn plas. Latour Degard ti dir ki parmi tou bann rasanbleman ki bann Etidian Labib ti fer, sa ti enn parmi bann pli gran ek pli ankourazan.

Bann dimounn ti konn bann Etidian Labib pou mesaz ki zot ti pe anonse: “Bann milyon dimounn ki pe viv asterla zame pa pou mor.” Sa lepok-la, bann Etidian Labib pa ti ankor konpran ki bonn nouvel ti bizin prese osi dan bann lezot pei ek pandan enn pli long peryod letan. Kanmem sa, zot ti ena enn gran zel. Ida Olmstead, ki ti koumans asiste bann renion an 1902, ti dir: “Nou ti kone ki limanite ti pou gagn bann gran benediksion, ek nou pa ti ezite pou partaz sa bon nouvel-la avek bann ki nou ti zwenn dan predikasion.”

Bann frer dan Betel ti koumans inprim sertin piblikasion par zotmem, pou ki bann frer ek ser gagn seki zot bizin lor plan spiritiel. Zot ti aste bann lekipman, ek zot ti instal sa dan enn batiman ki zot ti lwe. Ladres sa batiman-la ti 35 Myrtle Avenue, Brooklyn, New York, ek li pa ti tro lwin ar Betel.

Leo Pelle ek Walter Kessler ti rant Betel Zanvie 1920. Walter dir: “Kan nou ti arive, responsab linprimri ti get nou ek ti dir nou, ‘Zot ena enn-er-d-tan edmi avan dezene.’ Li ti fer nou tir bann bwat karton ranpli ar liv ki ti ena dan sousol.”

 Leo rakonte seki ti arive landemin. Li dir: “Dan batiman linprimri, nou ti bizin lav bann miray. Samem travay pli malang ki mo’nn fer dan mo lavi. Me sa travay-la ti pou Lesegner, alor li ti vo lapenn fer li.”

Dan zis de-trwa semenn, bann frer bien zele ti koumans inprim Latour Degard. Lor masinn ki ti lor premie letaz, bann frer ti inprim 60,000 Latour Degard 1^e Fevriye 1920. Anmemtan, dan sousol, bann frer ti instal enn masinn ki zot ti apel Le Cuirassé. Zot ti osi koumans inprim magazinn L’Âge d’Or apartir nimero 14 Avril 1920. Li kler ki Zeova ti pe beni zefor sa bann frer-la.

Bann fidel serviter Zeova ti kontan pou rekoumans zot laktivite dan linite. Selman, akoz bann sitiasion ki ti arive ant 1917 ek 1919, sertin Etidian Labib ti kit lorganizasion. Ki ti kapav fer pou ed zot?

Dan Latour Degard 1^e Avril 1920, ti ena lartik “Anou Res Ansam dan Lape.” Sa lartik-la ti dir: “Nou sir ki tou bann ki anvi obeir Zeova pou bliye bann erer ki zot ti fer, ek zot pou zwenn ansam avek pep Bondie pou fer travay Zeova.”

Sa bann parol-la ti ankouraz boukou parmi zot. Enn koup marye ti ekrir: “Nou ti konpran ki nou ti fer enn erer, parski pandan plis ki enn an nou pa ti pe fer nanye alor ki lezot ti pe prese. . . . Nou espere ki zame ankor nou pa pou elwagn nou ar Zeova.” Sa bann Etidian Labib la ti revinn aktif, ek zot ti ena boukou travay pou fer.

Le 21 Zin 1920, bann Etidian Labib ti koumans enn gran kanpagn pou distribie “ZG,” enn ti brosir ki ti form parti liv Mystère accompli. * Sa liv-la ti interdi an 1918 ek akoz sa ti res boukou an stok.

Tou bann proklamater ti invite pou partisip dan sa kanpagn-la, pa zis bann pionie.  Bulletin * Zin 1920, an Franse, ti dir: “Dan sak lansable, tou bann ki batize ek ki kapav partisip dan sa kanpagn-la bizin fer sa avek lazwa. Asterla, sakenn parmi nou bizin les sa fraz-la motiv li: ‘Enn kitsoz ki sir: mo pou distribie ZG.’” Edmund Hooper ti dir ki se pandan sa kanpagn-la ki boukou parmi zot ti koumans prese lakaz-lakaz pou premie fwa. Li dir: “Nou ti koumans konpran seki sa travay-la ti inplike. Li ti pou bien pli gran ki seki nou ti pe panse.”

Pandan Premie Lager Mondial, sa ti bien difisil pou rant an kontak avek bann Etidian Labib dan lezot pei. Frer Rutherford ti bien anvi ankouraz sa bann frer-la ek re-organiz travay predikasion. Alor, le 12 Out 1920, li ek kat frer ti al Langleter ek dan lezot pei.

Kan Frer Rutherford ti ariv Langleter, bann Etidian Labib ti organiz trwa lasanble ek 12 renion piblik. Antou, ti ena apepre 50,000 asistan. Konsernan sa vizit-la, enn Latour Degard dir: “Bann frer ek ser ti gagn boukou lankourazman. Zot ti zwenn ek travay ansam, ek sa ti rann zot zwaye.” Dan Paris, Frer Rutherford ti refer diskour “Bann Milyon Dimounn Ki Pe Viv Asterla Zame Pa Pou Mor.” Kan li ti koumans so diskour, lasal ti bien ranpli. Ek trwa san dimounn ti anvi konn plis.

De-trwa semenn apre, sertin frer ti vizit Athènes, Caire, ek Jérusalem. Pou swiv lintere bann dimounn dan sa bann landrwa-la, Frer Rutherford ti met anplas enn biro nasional dan lavil Ramallah, ki pre ar Jérusalem. Apre sa, li ti retourn Lerop ek li ti met anplas Biro Nasional Lerop Santral ek li ti pran bann dispozision pou ki inprim bann piblikasion laba.

An Septam 1920, bann Etidian Labib ti inprim L’Âge d’Or No. 27. Sa magazinn-la ti enn nimero spesial parski li ti devwal bann persekision ki bann Etidian Labib ti gagne an 1918. Le Cuirassé, ki nou ti mansione avan, ti roule lanwit-lizour pou prodir plis ki kat milyon kopi sa magazinn-la.

Bann dimounn ki ti lir sa magazinn-la, ti aprann seki ti ariv Emma Martin. Ser Martin ti enn kolporter dan San Bernardino,  Californie. Le 17 Mars 1918, li ek trwa frer, Edward Hamm, Edward Sonnenburg, ek Ernest Stevens, ti asiste enn renion bann Etidian Labib.

Parmi bann dimounn ki ti asiste sa levennman-la, ti ena enn misie ki pa ti la pou aprann plis lor Labib. Sa misie-la ti dir: “Mo ti al dan sa renion-la . . . parski biro Prokirer ti demann mwa pou fer sa. Mo ti al laba pou rod enn prev.” Li ti gagn “prev” ki li ti pe rode: liv Mystère accompli. De-trwa zour apre, lapolis ti aret Ser Martin ek sa trwa frer-la. Ti akiz zot ki zot ti dezobeir lalwa lor espionaz, parski zot ti pe distribie enn liv ki ti interdi.

Ti ziz Emma ek sa trwa frer-la koupab ek zot ti kondane pou fer trwa-z-an prizon. Plizir fwa zot ti fer apel lakour, me sa pa ti marse. Alor, le 17 Me 1920, ti met zot dan prizon. Me plitar, zot sitiasion ti ameliore.

Le 20 Zin 1920, Frer Rutherford ti rakont zot lexperyans dan enn lasanble dan San Francisco. Lasistans ti gagn sok ar fason ki ti tret sa bann frer ek ser-la. Alor, zot ti avoy enn telegram prezidan Letazini. Zot ti ekrir: “Nou konsider lakizasion ki’nn met . . . lor Madam Martin . . . konsernan lalwa lor espionaz kouma enn linzistis . . . Bann azan federal finn servi pouvwar ki zot ena pou . . . piez . . . Madam Martin . . . pou met enn lakizasion lor li ek pou met li dan prizon. Nou trouv sa . . . bien sokan.”

Landemin, Prezidan Woodrow Wilson deswit ti tir lakizasion ki ti mete lor Ser Martin, Frer Hamm, Frer Sonnenburg, ek Frer Stevens. Zot ti libere.

Lafin lane 1920, bann Etidian Labib ti ena boukou rezon pou zot zwaye. Bann travay ki ti pe fer dan biro mondial ti pe kontign ogmante ek bann vre Kretien ti kontign anons avek zel ki zis Rwayom Bondie ki kapav rezoud problem bann dimounn. (Mat. 24:14) Lane apre, an 1921, ti pou anons bann verite lor Rwayom Bondie ankor plis.