Ka nnete Jehova o yye a tiyisa batšhomayedi bowa ba gore ba na le matšato. Ka mongwaga wonone, nombhoro ya mašupatsela yi yye ya tloga ga 225 ya ye teya ga 350. Ke mo go ro ba la mathomo batšhomayedi ba go teya ka ku ga 8 000 ba yye ba yisa dipego tsa tšhomo ga ntlokgolo. Jehova aa ba rufa lona.

Ka di 21 tsa March 1920, Joseph F. Rutherford, wa gore ka nako yone ne go le moyetamahlong wa bo ba gore ne ba Tšhuta Baebele o yye a bolabola ka hlogotaba ya gore “Batho ba go Tlala ba Gore Gana Byalo Baa Phela ba ka sa Tsoge ba Kgwile.” Bo ba go Tšhuta Baebele ba yye ba kena fase gore ba thogo mema batho ba gore ba jabolela go tla ga mogahlano wowa. Ba hiriye ye nngwana ya diholo tse dikgolo tsa hala New York City fote ba sipidisiye gana hala ga 320 000 ya dimemo.

Go tlile batho ba go feta bo ne ba naganne gore ba nyoko tla. Holo yone ne yi tlele tswi, ne go na le batho ba go teya ka ku ga 5 000, gana hala ga 7 000 ya batho a baa kgona go kena. Sewokamelo se yitseri “a sanka gwa ba le mogahlano wa go phala wowa wa gore wo makiye ke bo ba go Tšhuta Baebele ba Lefaseng ka mokana ga lona.”

Bo ba go Tšhuta Baebele ba yye ba tuma ka go sabalatsa taba ya gore “batho ba go tlala ba gore gana byalo baa phela ba ka sa tsoge ba kgwile.” Ka nako yone, ne ba sa tšibi gore ne ba sa na le mmereko wo mogolo wa go sabalatsa molayetsa wa ditaba tsa Mmušo. Mara matšato ya bona ke mo ma tshosa. Ida Olmstead, wa gore o thomisiye go ya megahlanong ka mongwaga wa 1902, o re, “Ne re di tšiba tsa gore batho ka mokana ga bona ba nyoko rufiwa fote taba yowa ya go jabodisa re yi butsiye bo ne re gahlana nabo tšhomong.”

Bo ba go bereka Bethele ba yye ba thomisa go tiphrinthela dipuku gore tso tsa go bolabola ka tsa Modimo di dule di le gona. Ba hirisiye ntlo ya gore yi ku 35 Myrtle Avenue, Brooklyn, New York ya gore a yi kgole ka matla le Bethele ke mokane ba reka tso ba nyoko di berekisang gore ba ye mahlong ka mmereko wowa.

Leo Pelle le Walter Kessler ba yye ba thomisa go bereka Bethele ka January 1920. Walter o re, “Mo re segela, ye a wokamelang ga tso tsa go phrintha o yitseri, ‘Go šele awara le hafo gore go segele nako ya ledhina.’ O re kgopele gore re tle le mabhokisi ya dipuku ya gore ne ma le kamareng ya ka tlase ga ntlo.”

Leo o sa gopola so se yyeng sa makega letšatši la go latela, o re: “Rune ba re neyye mmereko wa go gohla mapharo ya kamara ya mathomo ga  ntlo ya oposteyisi. Lephelong laka a sanka ka bereka mmereko wa go thilafatsana wa go tshwana le wowa. Mara ke wo jabolele ka taba la gore ne ke wo makela Morena.”

Ka nthago ga mabekenyana, magageru ya gore ma na le matšato ya ne ma maka mmereko wone ma sa tšhofe ke motho ma yye ma thomisa go phrintha Sewokamelo. Go phrinthiwwe 60 000 ya Diwokamelo tsa February 1, 1920 ga kamara ya bobedi ya oposteyisi. Ke mokane ga kamara ya ka tlase ga ntlo magageru ne ma beyye motšhene wa go phrintha wo ne ba re lebitso la wona ke Battleship. Mo go phrinthiwa Sewokamelo sa April 14, 1920, ba yye ba phrintha le makazini wa The Golden Age. Di fo ba lekgwaying gore Jehova o yye a rufa mmereko wo ne ba wo maka.

Batho ba Jehova ba go tshepega ba yye ba jabolela mo mmereko wa bona wo thomisa fote, le go nghanelana le Makreste ya mangwana. Mara ba bangwana ga bo ba go Tšhuta Baebele ba yye ba kgeloga mo dilo di sa sepele gabutši ka bo 1917 go segela ka bo 1919. Ne ba ka gelepiwa byang mara?

Sewokamelo sa April 1, 1920 ne se na le hlogotaba ya gore “Tla re Dudisaneneng Gabutši.” Se ba hlohletsele ka gore: “Re tshepa . . . gore motho ye mongwana le ye mongwana wa gore o na le moya wa Morena . . . o nyoko lebala ka dilo tsa go kekema tso di makegiyeng botala, . . . ke mokane a dula ggoši le ba bangwana tsa nkare ke mmele ka wwoši.”

Ba go tlala ba theetsele wa tšiba. Monna ye mongwana le mosadi wage ba ngwadiye gore: “Re di bonne gabutši gore re yi lahliye mo re fetsa mengwaga re sa make selo, mola ba bangwana ba kene ba ya mahlong ka mmereko [wa go tšhomayela] . . . . Re tshepa gore sowa se ka sa sa tsoga se re makegele.” Sone se makiye gore bo ba gore ne ba sa sa tšhomayela ba di bone gore mmereko wo sa tlele la go sa hlayisege.

Ka di 21 tsa June 1920, bo ba go Tšhuta Baebele ba yye ba thomisa letsima le legolo la go sipidisa puku ya “ZG,” ya gore ke mo go le puku ya go fo tlatsisela ga The Finished Mystery. * Ke mo go na le  dipuku tsa go tlala tsa gore ke mo di beyiwwe nakwela ba re yi sa sa sipidisiwa ka 1918.

Mmereko wowa ke mo go se wa mašupatsela fela, batšhomayedi ka mokana ga bona ne ba memiwwe gore ba sipidise puku yowa. “Motšhomayedi ye mongwana le ye mongwana wa gore o kolobetsiye ga diphutego ka moka a make mmereko wowa a sa tšhofe ke motho. Ye mongwana le ye mongwana a tipotse gore: ‘Sowa di nyaka ke se maka’—ke nyoko sipidisa ZG.” Edmund Hooper o re ba go tlala ne go le la mathomo ba kena mutši ka mutši ga letsima la go sipidisa ZG. Fote o yitseri, “Re thomisiye go kwisisa gabutši gore mmereko wo ne re tshwanele go wo maka ne wo le wo mogolo go feta ka mokgo ne re tseya ka gona.”

Ka taba la gore ka Ntwa ya Mathomo ya Lefase bo ba go Tšhuta Baebele ne ba sa kgone go bolabola le ba dinaga tse dingwana, Mogareru Rutherford ne a nyaka go ba tiyisa le go ba lukiselela gore ba thogo ya mahlong ka mmereko wa bona wa go tšhomayela. Byalo, ka di 12 tsa August 1920, yene le magageru ka mane ba yye ba ya Britain, Continental Europe le Middle East.

Mo mogageru Rutherford a vakašela Britain, bo ba go Tšhuta Baebele ba yye ba maka megahlano ka meraro ye megolo le 12 ya megahlano ya batho ka moka. Ne go tlile batho ba go teya gana hala ga 50 000. Ka nthago ga mogahlano wowa, Sewokamelo se yitseri: “Ba yye ba tiyisiwa ka matla. Ba yye ba kwa ba mamarelanne fote ba berekisana ggoši, tsotsone di makiye gore ba jabole tsa nkare ke moka.” Ku Paris, Mogageru Rutherford o bolabodiye fote ka taba ya gore “Batho ba go Tlala ba Gore Gana Byalo Baa Phela ba ka sa Tsoge ba Kgwile.” Mo polabolo yone yi thoma, ye lune, ne go tlele la go sa hlayisege. Batho 300 ya bona ba yye ba nyaka go tšiba tsa go tlala.

Mabekenyana ya go latela, magageru ya mangwana ma yye ma vakašela Athens, Cairo le Jerusalema. Ka taba la gore ma krayye batho ba gore baa jabolela mo ga dipoleke tsowa, Mogageru Rutherford o lukiselele gore go be le poleke ya gore go dula dipuku toropong ya Ramallah ya gore yi thina le Jerusalema. Ke mokane o yye a boyela Yuropo, mo a segela gana ku a bula ofisi ye nngwana gore le gona go thogo phrinthiwa dipuku.

Ka September 1920, bo ba go Tšhuta Baebele ba yye ba ntsha makazini wa bo 27 wa The Golden Age, wona ne wo hlawolegiye ka taba la gore ne wo bolabola ka magageru ya gore ma yye ma hlorisiwa ka 1918. Motšhene wa go phrintha wa Battleship wo go bolabodiwweng ka wona, ne wo bereka bošego le motshegare ke mokane gwa phrinthiwa dimakazini tsa go teya ka ku ga dimiliyoni ka dine.

 Batho bo ba badiyeng makazini wone ba yye ba kwa ka tso di makegeleng Emma Martin tsa go makatsa. Mogageru wa mosadi wa ga Martin ne go le lephayona ku San Bernardino hala California. Ka di 17 tsa March 1918, yene le magageru yawa E. Hamm, E. J. Sonnenburg le E. A. Stevens ke mo ba le ga mogahlano wa bo ba Tšhutang Baebele.

Morene mongwana o yye a tla mara ne a sa tlela go tšhuta Baebele. Ka nthago mo a hlatolla o yitseri “Ke yye ga mogahlano wone . . . ke romme ke ba ofisi ya mmušo ba gore ba bereka ka tsa go yahlula. Ne ke fo tinyakela go kraya se sengwana sa gore nka ba tanya ka sona.” Ka nnete so ne a se nyaka o se krayye, o krayye puku ya The Finished Mystery. Ka nthago ga matšatšinyana, Mogageru wa mosadi wa ga Martin le magageru yala ka mararo ba yye ba tshwariwa. Ba ba tshwere ka taba la gore ba takiye molawo ka go neya batho dipuku tsa gore ba yitseri di sa sipidisiwi.

Ba butsiye Emma le banghana bage gore ba takiye molawo ke mokane ba ba bošela jele mengwaga ka meraro. Ba feleletsiye go ya khota ka di 17 tsa May 1920 ke mokane ba thomisa seghwebo sa bona. Mara di so yi kgole, dilo di yye dya thomisa go kgiba.

Ka di 20 tsa June 1920, Mogageru Rutherford o bolabodiye ka tso ba gahlanneng natso mogahlanong wo mogolo wa gore ne ba wo tshwarele San Francisco. Bo ne ba theetsele ba kwisiye go baba ke taba yowa ke mokane ba romela borifi ga phresidente ya United States. Ba ngwadiye gore: ‘Taba ya gore mogageru wa mosadi wa ga Martin o yye a tshwariwa ka taba la go neya batho dipuku ke lešidi. Tso ba go lawola ba di makiyeng ke go fo berekisa matšhika ya bona ya go lawola bošayedi gore ba tanye Mmane yewa wa ga Martin le go maka nkare tso a di makiyeng di tshwanela gore a bošediwe jele, rune re re a yi tsona le ka gonyana.’

Ka letšatši la go latela, Phresidente Woodrow Wilson o napiye a sula seghwebo sa Mogageru wa mosadi wa ga Martin, sa ngwaneru Hamm, sa ngwaneru Sonnenburg le sa ngwaneru Stevens. Tsa go tshwariwa ga bona ka bošakašakane di yye dya fela.

Mafelelong ya mongwaga wa 1920, bo ba go Tšhuta Baebele ne ba sa jabola lona. Mmereko wo ne wo makiwa ku ntlokgolo wo yye wa ya mahlong wo kene wo gola fote Makreste ya mannete ma yye mahlong ma sabalatsa gore Mmušo wa Modimo ke wona fela wo nyoko fetsang ka mathatha ya batho. (Mat. 24:14) Mmereko wo wa go tšhomayela nnete ka Mmušo wa Modimo ke mo wo nyoko makiwa ka matlamatla ka 1921.