Siovaa wakuatesileko ovaivisi ovo. Mongeleka, pomuvo pana ankho kuna vala ovakokoli-ndyila vena 225 mouye auho. Pahe, aveliyawisa avakala 350. Olio enima lyo tete ovaivisi valamba po 8.000 vaava ovilinga viavo kombala Yonombangi mba Siovaa. Tyotyili, Siovaa wevekuatesileko unene.

Monthiki 21 ya Março yo 1920, Joseph F. Rutherford, ankho onkhalamutwe Yovalilongesi vo Mbimbiliya, alingi elongomona lina osapi yati: “Ovanthu Ovanyingi-nyingi Vena Omuenyo Hono, Kamavakankhia Vali.” Ovalilongesi vo Mbimbiliya avalingi ononkhono ononene mbokukonga ovanthu veye okutehelela elongomona olio. Avalukala ondyuo imwe onene mo Estados Unidos, iya vaavele omikanda viokukonga ovanthu, vina 320.000.

Akuya ovanthu ovanyingi-nyingi, valamba pu ava ankho vakevelela. Mondyuo valukala, avahafu-mo. Amufu vala 5.000, ovanthu vena 7.000 avakondoka. Omutala Womulavi wapopia “eliongiyo olio lialingilwe novalilongesi vo Mbimbiliya okuti ankho liaonganekwa nawa.”

Ovalilongesi vo Mbimbiliya avehimbika okuivisa onondaka mbokuati: “ovanthu ovanyingi-nyingi vena omuenyo hono, kamavakankhia vali.” Namphila ankho vehei oñgeni onondaka onongwa mambuliyandyana, mahi no ngotyo vaivisile nombili. Omulilongesi umwe wo Mbimbiliya utiwa Ida, wahimbika okuenda komaliongiyo 1902, wati: “Mokonda ankho tutyii okuti Huku makaavela ovipuka oviwa ovanthu, atuhimbika okupopila onondaka onongwa ovanthu aveho tuvasa movilinga viokuivisa.”

Ovakuatate vo ko Mbetele avehimbika okulinga omikanda opo vivekuatesako okupameka oupanga wavo na Huku. Avalande onomakina, avembupake mondyuo imwe valukala ikala ponthele petapalo litiwa Myrtle 35, ponthele yo Mbetele yo ko Brooklyn, Nova York.

Leo Pelle na Walter Kessler avakaundapa mo Mbetele, mohanyi ya Janeiro yo 1920. Walter Kessler, wati: “Etyi tuehika, omukulu wokuakalela komutwe otyilinga tyokulinga omikanda, etupopila okuti: ‘Nkhele kuakamba oola no meya opo tukalie, mupondola okulinga otyilinga tyimwe.’ Avetuavela ovikasa viomikanda, tuvionganeke.”

Tupu, Leo wapopia etyi tyamoneka-po etyi kuatya. Wati: “Etyi tuehika, otyilinga tuapewa, o tyokusukula  mondyuo, mahi ku ame otyilinga otyo tyitombesisa. Andyiti pahe ndyityilinge vala mokonda o tya Tatekulu.”

Ovakuatate ovo vaundapele nombili, avetyivili okulinga Omutala Womulavi 1 ya Fevereiro yo 1920. Avalingi Omitala Viomulavi vina 60.000. Tupu, no mondyuo yokupaka omikanda, avapake-mo omakina yokulinga omikanda. Omakina oyo, ngayo valinga nayo o Pahukei! 14 ya Abril 1920. Ovilinga ovio aviho, vevilinga vala monosimanu mbehehi. Otyo tyilekesa okuti Siovaa wevekuatesileko unene.

Pahe ovaumbili va Siovaa ankho vehimbika vali okuundapa nombili, iya ankho velikuata vali okapandi. Mahi okupolelela mo 1917 atee mo 1919, vamwe povalilongesi vo Mbimbiliya, avayekepo otyili mokonda yovipuka vimwe viaendele meongano. Oityi ankho tyipondola okuvekuatesako?

Omutala Womulavi 1 ya Abril yo 1920, waetele onthele imwe yati: “Tukalei Nombembwa.” Onondaka ombo mbevepamekele unene mokonda wapopia “okuti. . . aveho vena ononkhono mba Tatekulu. . . mavalimbwa ovipuka vyo konyima, . . . avelikuate-po kumwe, ngatyina olutu lwike vala.”

Oñgeni onondaka ombo mbevekalesile? mbevehambukisilwe unene. Ovalinepi vamwe vapopia okuti: “Tuahambukwa unene, mokonda enima liokualamba, ovanthu vamwe ankho vokulinga ovipuka ovivi, aveviyekepo, avahimbika okuivisa. . . . Tukevela okuti kamatutalukwa vali.” Pahe ankho mavakala novilinga ovinyingi.

Mo 1918, omukanda utiwa “ZG” — Mistério Consumado, * waholekelwe mokonda ankho wailikwa. Mahi tyina tyiti monthiki 21 ya Junho yo 1920, ovalilongesi vo Mbimbiliya avehimbika okuava vali omukanda oo.

Ovaivisi aveho avapopilwa vaave omukanda Mistério Consumado. “Ovaivisi vambatisalwa vo mawaneno aeho, ankho vena okulinga otyilinga  otyo nomutima auho. Ovakuatate avalundu ovaivisi vakale nolusoke luokuti ‘ngaliti pano’, tuna okutyilinga.” Edmund Hooper, wapopia okuti kovanthu ovanyingi oyo onthiki yo tete vaivisile umbo na umbo. Wapopia vali okuti: “Tuahimbika okunoñgonoka vali ovilinga ovio tyipona etyi ankho tusoka.”

Mokonda ankho tyipuiya okupopia novakuatate vo kovilongo ovikuavo mokonda Yovilwa Vyo Tete Viouye Auho, Omukuatate Rutherford ankho uhanda okupameka ovakuatate, nokuonganeka ovilinga viokuivisa. Mu 12 ya Agosto yo 1920, Omukuatate Rutherford novakuatate vekuana, avaende ko Inglaterra, no kovilongo ovikuavo vyo Europa, no ko Médio Oriente.

Etyi Omukuatate Rutherford akapila ko Inglaterra, ovalilongesi vo Mbimbiliya avalingi ovionge vitatu, nomaliongiyo 12. Ovanthu aveho vakalele movionge ovio, no momaliongiyo oo, vavasa po 50.000. Omutala Womulavi, wapopia oñgeni oungendi oo waenda okuti: “Ovakuatate ovo, vapamekelwe, avelikuate okapandi, avaundapela kumwe. Iya otyo atyivekalesa nehambu.” Etyi Omukuatate Rutherford akapila o Paris (França), awane okulinga elongomona liokuati: “Ovanthu Ovanyingi-nyingi Vena Omuenyo Hono, Kamavakankhia Vali.” Etyi ehimbika okulinga elongomona olio, mondyuo ankho mueyula ovanthu. Ovanthu vena 300, avakala nolumbwe luokunoñgonoka ovipuka ovikuavo.

Mo nosimanu mbalandulako, ovakuatate vamwe, avaende ko Atenas, no ko Kairo, no ko Selusalei. Opo omukuatate Rutherford akuateseko ovanthu ankho vesuka notyili, ataindya omphangu yokupaka omikanda mepunda-umbo limwe likala ponthele yo Selusalei litiwa Ramallah. Etyi vakondoka ko Europa, apake-ko oseketa yokulinga omikanda.

Ponthyimbi yo 1920, ovalilongesi vo Mbimbiliya avaave o Pahukei! 27 ya Setembro. Ankho ipopia ononkhumbi ovalilongesi vo Mbimbiliya valambelele mo 1918. Tupu, omakina yokulinga omikanda tuapopia konthyimbi, yaundapele tyitenya no tyinthiki nokulinga omikanda ominyingi. Ailingi ono Pahukei! mbulamba po nomiliau 4.

Ovatangi, vavasile-mo ehipululo momukanda oo, liomphange umwe ankho utiwa o Emma Martin, omukokoli-ndyila wotyilongo tyimwe tyitiwa São Bernardino ko California. Monthiki 17 ya Março yo 1918, omphange oo, novakuatate vetatu  vatiwa ovo E. Hamm, na E. J. Sonnenburg na E. A. Stevens, vaile peliongiyo lyo Valilongesi vo Mbimbiliya.

Peliongiyo opo, apeya omukulu umwe ankho wehesukile-ale nalio. Omukulu oo, wapopia okuti: “Peliongiyo pana, ankho natumwa-po vala. . . novatumini opo ndyilave etyi valinga.” Avasi-po omukanda Mistério Consumado, eutyindi-po. Apakala vala ononthiki mbumwe, omphange Emma, novakuatate vetatu, avakuatwa. Avatendeleyua okuti vekahi nokuava omukanda wailikwa.

Emma, novakuatate ovo vetatu, avakuatwa, avapakwa mokaleya, avanakelwa-mo omanima etatu. Mahi monthiki 17 ya Maio yo 1920, avaiti vatepululwe komanima oo, avehetavelwa. Mahi ovipuka ankho mavipiluluka liwa-liwa, avikala vali nawa.

Monthiki 20 ya Junho yo 1920, Omukuatate Rutherford apopi otyitateka otyo motyonge tyalingilwa mo São Francisco. Ovanthu ankho veli motyonge, avahonekela omukanda omutumini wo ko Estados Unidos. Vahoneka okuti: “Onthue tuna onthumbi yokuti . . . Emma . . . utupu etyi alinga tyapenga. Ovipuka ovatumini vekahi nokulinga opo . . . vemukuate . . . netyi vehesukile nae tyina apopia . . . , ku onthue vekahi nokumulinga onya.”

Omutumini oo, watambula vala omikanda, etyi kuatya, atumu okupola-mo omphange Emma, novakuatate vetatu, ovo Hamm, na Sonnenburg na Stevens. Pahe avayovoka!

Konthyulilo yenima lyo 1920, Ovalilongesi vo Mbimbiliya pahe ankho vahambukwa. Kombala Yonombangi mba Siovaa, ovilinga ankho vitualako okuliyandyana. Ovaivisi avatualako okupopia okuti Ouhamba wa Huku, oo vala maumaneko ovitateka viovanthu. (Mat. 24:14) Etyi tyati mo 1921, ovaivisi avahimbika okuyandyanesa nawa otyili Tyouhamba.