Jehova stoakjt siene Deena, waut flietich prädjen deeden. Aunfangs Joa jeef daut 225 Pionieren, oba opp Enj von dit Joa wieren daut aul 350. Un toom ieeschte Mol jeef daut äwa 8 000 Vekjindja, waut äaren Prädichtdeenstberecht no de Hauptoffiz schekjten. Jehova säajend dee äare Oabeit sea.

To jane Tiet wia Joseph F. Rutherford äwa daut Woakj von de Bibelforscha aunjestalt. Dän 21. Moaz 1920 hilt hee eene Räd met daut Teema “Millionende, waut nu läwen, woaren kjeenmol stoawen”. De Bibelforscha deeden aules, waut dee kunnen, toom Menschen fa dise Räd enloden. Dee pachten eent von de jratste Teautasch en New York City un deelden ojjefäa 320 000 Enlodungen ut.

Doa kjeemen mea Menschen han, aus de Bibelforscha jedocht hauden. En daut Teauta wieren äwa 5 000 Toohiera, un wäajen daut aul stiew voll wia, musten see doa soo bie 7 000 wajchschekjen. De Wacht-Turm säd, daut daut “eent von de baste Toopkomes wia, waut de Bibelforscha jeemols jehaut hauden”.

Daut wort wiet un breet bekaunt, daut de Bibelforscha säden, daut millionende, waut nu läwen, kjeenmol stoawen wudden. To jane Tiet wia de Bibelforscha daut noch nich kloa, daut de Norecht von daut Kjennichrikj noch väl wieda bekauntjemoakt woaren sull. Oba dee wieren doawäajen sea flietich. Ida Olmstead funk aune 1902 aun no de Toopkomes to wanken. See säd: “Wie wisten, daut doa noch een deel Säajnungen wieren fa de Menschen, un wie haben em Prädichtdeenst emma to aule Menschen von dise goode Norecht jerät.”

De Breeda em Betel fungen aun, selfst eenje Bieekja to drekjen, daut et emma jenuach jeisteljet Äten jeef. Dee koften Maschienen un stalden dee en een jepachtet Hus en de Myrtle Avenue 35 en Brooklyn, New York, opp. Daut wia dicht bie daut Betel.

Leo Pelle un Walter Kessler fungen en Jaunewoa 1920 aun em Betel mettohalpen. Walter säd: “Aus wie doa hankjeemen, kjikjt de Oppsechta von de Drekjarie no ons un säd: ‘Jie kjennen noch eentunhaulf Stund schaufen, ea daut Meddach jeft.’ Hee säd, wie sullen Doosen met Bieekja von utem Kjala holen.”

Leo vetald, waut dän näakjsten Dach wia. Hee säd: “Wie deeden doa en daut ieeschte  Stock de Wenj aufwauschen. Ekj haud noch kjeenmol ea soone schwiensche Oabeit jedonen. Oba daut loond sikj, wiels daut fa dän Harn wia.”

Benna een poa Wäakj kunn de Woaktorm von de flietje Breeda jedrekjt woaren. Dee brukten de Drekjmaschien oppem tweeden Stock, om 60 000 enjlische Woaktorms vom 1. Feebawoa 1920 to drekjen. To deeselwje Tiet deeden see em Kjala noch eene groote Drekjmaschien oppstalen. Un de ieeschte enjlische Utgow von daut Goldene Zeitalter, waut see doa drekjten, wia daut vom 14. Aprell 1920. Daut wia dietlich to seenen, daut Jehova dise flietje Breeda säajnen deed.

Jehova siene true Deena wieren wada drock em jeisteljen un schauften fein toop. Oba en de schwoare Tiet von 1917 bat 1919 hauden eenje Bibelforscha de Organisazion veloten. Woo wudd eena dee halpen kjennen?

En dän Wacht-Turm von August 1920 wia de Artikjel bennen “En Fräd toophoolen”. Doa wort soone leeftolich toojerot: “Wie sent ons secha, daut jieda eena, waut dän Harn sienen Jeist haft, . . . reed es, von daut to vejäten, waut doa wia, . . . un en Eenichkjeit tooptohoolen un wada fein tooptoschaufen.”

Väle neemen disen leeftoljen Rot wellich aun. Een Ehepoa schreef: “Ons es daut kloa, daut daut nich rajcht wia, daut wie ons nu aul lenja aus een Joa trigjehoolen haben, äwadäm daut aundre [prädjen] deeden. . . . Wie hopen, daut ons daut kjeenmol mea passieren woat.” Un fa soone Breeda wudd daut noch väl to doonen jäwen.

Dän 21. Juni 1920 fungen de Bibelforscha aun, soo väl aus mäajlich daut ZG-Buak uttodeelen. Daut wia daut Buak Das vollendete Geheimnis met een schlaupet Omschlach. *  Aus de Rejierunk dit Buak aune 1918 vebeeden deed, hauden de Breeda een deel soone Bieekja oppbewoat.

Aule Vekjindja sullen dit Buak utdeelen, nich bloos de Pionieren. “En jieda Vesaumlunk sellen aule Jedeepte, waut doa kjennen, wellich bie dit Woakj metmoaken. Jieda eena saul sikj väanämen: ‘Eenatlei doo ekj – daut ZG-Buak utdeelen!’ ” Edmund Hooper denkjt daut noch, daut väle to jane Tiet daut ieeschte Mol von Hus to Hus prädjen deeden. Hee säd: “Ons wort daut emma kloara, waut bie dit Woakj aules met en wia un daut daut väl jrata woaren wudd, aus wie ons väajestalt hauden.”

De Bibelforscha en de Stäts hauden en de Tiet von dän Ieeschten Weltkjrich nich väl von de Breeda en de aundre Lenda jehieet. Doawäajen wull Brooda Rutherford dee Moot toospräakjen un doa daut Prädichtwoakj fresch plonen. Dän 12. August 1920 muaken hee un vea aundre Breeda eene lange Reis no Enjlaunt un no väl aundre Lenda.

En dee Tiet, aus Brooda Rutherford en Enjlaunt wia, hilden de Bibelforscha doa dree Kongressen un 12 aundre Toopkomes auf. Met aules toop wieren doa soo bie 50 000 hanjekomen. De Wacht-Turm säd äwa daut: “De Breeda doa kjrieejen fresch Moot un Krauft. Dee feelden sikj dolla vebungen un dee schauften mea toop, un daut muak an väl Freid.” En Paris haud Brooda Rutherford noch eemol de Räd “Millionende, waut nu läwen, woaren kjeenmol stoawen”. Aus de Räd aunfunk, wia daut Hus rein gaunz voll. Un 300 Menschen wullen lota mea weeten.

En de näakjste Wäakjen reisden noch waut Breeda no Ateen, Kairo un Jerusalem. Toom de Intressieede doa halpen, muak Brooda Rutherford en de Staut Ramallah, dicht bie Jerusalem, eene Städ reed, wua de Breeda kunnen Bieekja oppbewoaren. Dan reisd hee wada trigj no Europa un stald doa eene Offiz opp, wua see uk Bieekja drekjen deeden.

En Septamba 1920 jeewen de Bibelforscha daut Goldene Zeitalter, Numma 27 rut. Met dise Tietschreft wort daut opjedakjt, woo se de Bibelforscha aune 1918 vefolcht hauden. De groote Drekjmaschien, wua wie aul ea von räden, dreid Dach un Nacht, om äwa vea Millionen von dise Tietschreften to drekjen.

 Doabennen stunt, waut Emma Martin beläft haud. Daut wia eene Pionia-Sesta von San Bernardino, Kalifornien. Dän 17. Moaz 1918 wia see un de Breeda E. Hamm, E. J. Sonnenburg un E. A. Stevens bie een kjlienet Toopkomen.

Doa wia oba uk een Maun bie, waut doa nich von de Schreft lieren wull. Hee säd lota: “Ekj kjeem no daut Toopkomen, . . . wiels de Rejierungsbeaumte mie doa hanjeschekjt hauden. Dee wullen, daut ekj eenen Bewies funk, daut de Bibelforscha een Jesaz jebroaken hauden.” Funk hee doa waut? Jo, daut wia daut Buak Das vollendete Geheimnis. Een poa Doag lota worden Sesta Martin un de dree Breeda faustjenomen. Dee worden beschulcht, daut dee vebodne Bieekja utjedeelt hauden un doaderch daut Spionagegesetz jebroaken hauden.

Daut Jerecht tald Emma un de Breeda fa schuldich un säd, daut dee fa dree Joa em Jefenkjnis nenn sullen. Dee schauften ieremol doaropp, daut daut Jerecht an nich fa schuldich talen sull, oba dän 17. Mei 1920 musten see werkjlich em Jefenkjnis nenn. Oba daut wia nich fa sea lang.

Dän 20. Juni 1920 wia Brooda Rutherford bie eenen Kongress en San Francisco un vetald doa von dise Jeschicht. De Toohiera wieren gaunz vestalt doaräwa, woo se de Breeda behaundelt hauden, un schekjten dän Präsident von de Stäts eenen Breef. Doa säd daut: “Daut se . . . Emma Martin . . . wäajen daut Spionagegesetz veuadeelt haben, tal wie fa ojjerajcht . . . Daut wia lang nich rajcht, . . . daut de Rejierungsbeaumte . . . Emma Martin . . . en eene Faul nenjelokt hauden, . . . bloos daut see dee kunnen enstoppen.”

De Präsident Woodrow Wilson sach fuaz dän näakjsten Dach doano, daut Sesta Martin un de Breeda Hamm, Sonnenburg un Stevens utem Jefenkjnis rutkunnen.

Aus daut Joa 1920 to Enj jinkj, wieren de Bibelforscha sea schaftich. De Oabeit bie de Hauptoffiz wia fein wiedajekomen, un daut jeef mea woare Christen aus jeemols ea, waut doa bekauntmuaken, daut bloos Gott sien Kjennichrikj met de Menschen äare Trubbels een Enj moaken kunn (Mat. 24:14). Un en daut Joa 1921 wudden dee dan noch mea doonen kjennen, om de Woarheit von daut Kjennichrikj bekaunttomoaken.