Jehovah strongim olketa hia wea laek tumas for preach. Lo datfala year, namba blo olketa colporteur, or pioneer hem go ap from 225 for 350. And hem firstaem for winim 8,000 class worker, or pablisa givim report go lo hedquarter. Jehovah blessim olketa lo bigfala wei.

Lo March 21, 1920, Joseph Rutherford wea hem organizem waka blo olketa Bible Student lo datfala taem, hem givim wanfala tok wea subject blo hem “Millions Now Living Will Never Die.” Olketa Bible Student duim evri samting wea olketa fit for duim for invaetem olketa wea interest for kam lo disfala hipap. Olketa rentim wanfala lo olketa big theater lo New York City and olketa givimaot samting olsem 320,000 invitation.

Namba blo pipol wea kam hem winim wanem olketa expectim. From datfala theater hem fitim 5,000 pipol nomoa, samting olsem nara 7,000 pipol olketa no fit for kam insaed. The Watch Tower sei “Datwan hem best meeting winim enitaem bifor wea International Bible Student organizem.”

Evriwan savve lo olketa Bible Student olsem pipol wea talemaot datfala message “millions now living will never die.” Lo datfala taem, nomata olketa no minim yet hao disfala Kingdom message bae kamap moa big, olketa faithful for talemaot. Ida Olmstead, wea start for attendim olketa meeting lo 1902, hem ting go bak lo datfala taem. Hem sei: “Mifala savve bigfala blessing hem stap for evriwan and mifala no stop for talemaot gud nius lo olketa wea mifala meetim lo ministry.”

For mek sure olketa brata and sista kasem spiritual kaikai, olketa brata lo Bethel start for printim seleva olketa literature blo iumi. Olketa peim olketa equipment and installem lo wanfala building wea olketa rentim lo 35 Myrtle Avenue, Brooklyn, New York and datwan hem no farawe nomoa from Bethel.

Olketa invaetem Leo Pelle and Walter Kessler for duim Bethel service lo January 1920. Walter hem sei, “Taem mifala arrive, overseer lo printery hem luk lo mitufala and sei, ‘Wan and haf hour nomoa stap bifor lunch.’ Hem askem mitufala for pushim olketa carton buk from basement.”

Leo ting go bak lo samting wea happen lo next day, hem sei: “Waka blo mifala hem for wasim olketa wall lo first floor blo datfala building. Datfala waka hem barava dirty winim eni waka wea mi duim bifor. Bat hem waka blo Lord, datwan nao mekem waka hia important.”

 Insaed lo tu-thri week nomoa, olketa faithful volunteer hia printim nao The Watch Tower. Olketa printim sixti thousand copy blo February 1, 1920, The Watch Tower lo datfala flatbed press wea stap lo floor. And lo basement, olketa brata setim ap wanfala press wea olketa kolem Battleship. Start from April 14, 1920, olketa printim The Golden Age magasin lo there. Tru nao, Jehovah blessim hard waka blo olketa hia wea willing.

Olketa faithful pipol blo Jehovah enjoyim wei for duim disfala waka and wei for associate tugeta. Nomata olsem, samfala Bible Student lusim organization lo olketa hard taem wea kamap start lo 1917 go kasem 1919. Hao nao for helpem olketa hia?

Lo wanfala article blo The Watch Tower April 1, 1920, wea garem disfala article “Let Us Dwell in Peace.” Hem garem wanfala naesfala toktok for encouragem olketa. Hem sei: “Iumi sure . . . dat evriwan wea kasem spirit blo Lord . . . willing for forgetim olketa samting wea bin happen, . . . and iumi waka tugeta olsem wanfala body.”

Staka kasem gud samting from datfala encouragement. Wanfala marit couple raet olsem: “Mitufala luksavve lo olketa year wea go pas, mitufala no duim disfala [preaching] waka. . . . Distaem mitufala disaed strong for mas duim moa disfala preaching waka.” Olketa hia wea kam bak moa olketa duim staka waka wea bae kamap.

Lo June 21, 1920, olketa Bible Student startim wanfala bigfala campaign for givimaot datfala “ZG,” wea hem wanfala soft kava magasin blo The Finished Mystery. * Big haf lo olketa buk hia olketa keepim taem olketa banim olketa buk lo 1918.

Evri class worker kasem invitation for share insaed disfala waka, no just olketa colporteur nomoa. Datfala June 1920 Bulletin  * hem sei: “Evri faithful [baptaes] wan insaed lo evri kongregeson shud hapi for duim datfala waka. Diswan nao  shud toktok blo iumi evriwan: ‘Samting wea mi duim nao’ hem for givimaot disfala ZG.” Edmund Hooper ting go bak lo datfala campaign hao for staka datwan hem firstaem for olketa duim door tu door waka. Hem sei: “Mifala start for luksavve hao disfala waka bae hem kamap moa big winim wanem mifala expectim.”

From wei for contactim olketa Bible Student lo nara kantri hem barava hard lo taem blo World War I, Brata Rutherford laek for encouragem olketa brata hia and hem laek for organizem moa preaching waka. So lo August 12, 1920, Brata Rutherford and fofala nara brata moa go lo Britain, olketa kantri lo Europe, and lo Middle East.

Taem Rutherford visitim Britain, olketa Bible Student organizem thrifala convention and 12 pablik meeting. Total attendance hem samting olsem 50,000. For finisim datfala visit, The Watch Tower hem sei: “Evriwan barava kasem encouragement. Olketa for barava wan mind and olketa waka tugeta and datwan mekem staka wea sorre for barava hapi.” Lo Paris, Brata Rutherford storyim moa datfala subject “Millions Now Living Will Never Die.” Taem datfala lecture hem start, datfala hall hem barava fulap. Thri handred pipol nao laek for kasem samfala information moa.

Lo olketa week bihaen, samfala brata visitim Athens, Cairo, and Jerusalem. For mekem hem isi for contactim moa olketa wea interest lo olketa ples hia, Brata Rutherford startim moa wanfala literature depot lo Ramallah, wanfala taon klosap lo Jerusalem. Then hem go bak lo Europe and hem startim Central European Office and arrangem for olketa printim olketa literature lo there.

Lo September 1920, olketa Bible Student releasem No. 27 magasin blo The Golden Age, datfala spesol magasin hem showimaot klia persecution wea olketa Bible Student kasem lo 1918. Datfala printing press, Battleship, wea iumi bin storyim, hem waka naet and day for printim winim foa million copy blo disfala magasin.

Olketa wea readim datfala magasin lukim wanfala interesting case blo Emma Martin. Sista Martin hem wanfala colporteur lo San Bernardino, California. Lo March 17, 1918, Emma and thrifala brata, Edward Hamm, Edward Sonnenburg, and Ernest Stevens, olketa attendim wanfala smol hipap blo olketa Bible Student.

 Wanfala man wea kam attend, hem no kam bikos hem laek for lane abaotem Bible. Hem sei: “Mi go lo datfala meeting . . . bikos office wea lukaftarem olketa kot case nao sendem mi.” Hem sei moa bihaen, “Mi go lo there for kasem olketa evidence.” Datfala man kasem nao “evidence” wea hem laekem, wea hem nao wanfala copy blo The Finished Mystery. Tu-thri day bihaen, olketa arrestim Sista Martin and thrifala brata hia. Olketa sei hao fofala hia brekem disfala Espionage Act bikos olketa givimaot olketa buk wea olketa banim.

Olketa sei Emma and thrifala brata hia guilty and mas go lo prison for thrifala year. Lo May 17, 1920, nomata olketa trae for appeal, olketa no win. So fofala hia mas go lo prison. Bat wanfala change wea hem gud hem kamap.

Lo June 20, 1920, Brata Rutherford storyim datfala experience lo wanfala convention lo San Francisco. Evriwan lo audience seke tumas lo hao olketa treatim olketa brata and sista hia, so olketa sendem wanfala telegram go lo president blo United States wea sei: “Mifala raet lo iu abaotem sentence . . . blo Mrs Martin, . . . anda lo datfala Espionage law hem no stret . . . Wei wea olketa officer iusim paoa wea olketa garem for . . . trikim . . . Mrs Martin . . . and then for mekem case againstim hem and putim hem lo prison, mifala sei datwan hem . . . barava no stret.”

Lo nextfala day, President Woodrow Wilson stretawe changem sentence blo Sister Martin and Brata Hamm, Sonnenburg, and Stevens. Datfala prison sentence blo olketa wea no stret hem finis nao.

Lo end lo 1920, olketa Bible Student barava hapi for lukim staka samting nao hem bin happen insaed lo datfala year. Waka wea gohed lo hedquarter hem kamap moa big winim eni narataem bifor, and olketa tru Christian gohed for talemaot hao Kingdom blo God nomoa savve finisim olketa problem wea kasem olketa man. (Matt. 24:14) Lo nextfala year, 1921, bigfala waka moa hem gohed for advertisem datfala Kingdom truth.