Ο Ιεχωβά μπαγιά ντινάς ζορ ι πφραλέν σο κερένας ο έργος αντράλ πουμαρέ γκίσταρ. Οντουβά μπρες, ο βιβλιοπώλες διάκονοι, δηλαδή ο σκαπανείς, από 225 αβιλέ 350. Ντα ισινέ η πρώτη φαρ σο πιο μπουτ από 8.000 εργάτες τάξεων, δηλαδή τζενέ σο βακερένας ο λατσσέ αμπέρια, ντινέ πουμαρό έργος κο κεντρικά γραφεία. Ο Ιεχωβά ντινάς-λεν μπουτ ευλογίες κο έργος.

21 Μαρτίου 1920, ο Ιωσήφ Φ. Ρόδερφορντ, σο αζομάν ισινέ υπεύθυνος ι εργόσκε σο κερένας ο Σπουδαστές της Γραφής, κερντάς ι ομιλία ι θεμάσαρ «Εκατομμύρια Τζενέ σο Τζουβντιόνα Ακανά να κα Μερέν Ποτές». Ο Σπουδαστές της Γραφής κερντέ σο νακχέλας λένγκε βαστένταρ για τι καλίνεν τζενέν κι ομιλία. Νοικιαντέ εκ κατά πιο μπαρέ θέατρα κι Νέα Υόρκη ντα ντινέ περίπου 320.000 προσκλήσεις.

Ο τζενέ σο αβιλέ ισινέ πιο μπουτ οντουλένταρ σο μπεκλεντίνενας. Ο θέατρος πφερντιλό 5.000 ντα πιο μπουτ τζενέ, ενώ περίπου 7.000 νασλέ σόσκε να ερεσένας αντρέ. Σαρ βακερέλας η Σκοπιά, ανταγιά ισινέ «εκ κατά πιο μπαρέ συναθροίσεις σο κερντάς ποτές ο Διεθνής Σύλλογος των Σπουδαστών της Γραφής ντα ανταγιά συνάθροιση λοκχιαρντάς ο γκι μπουτέ τζενένγκο».

Σαρέ τζανένας ότι ο Σπουδαστές της Γραφής βακερένας ότι «εκατομμύρια τζενέ σο τζουβντιόνα ακανά να κα μερέν ποτές». Οντουλά μπρεσά, ναστί αγαβένας ότι ο λατσσέ αμπέρια ι Βασιλειάκε έπρεπε τι βακέρντιβεν σαρί κι πφουβ. Όμως, να τσσιναντέ τι κερέν έργος αντράλ πουμαρέ γκίσταρ. Η Άιντα Όλμστεντ, σο τζάλας κο συναθροίσεις κατά 1902, βακερντάς: «Τζανάας ότι σαρέ ο τζενέ κα τθερένας μπουτ σουκάρ ευλογίες ανγκλά-πουμέντε ντα να τσσιναβάας τι βακεράς ανταλά λατσσέ αμπέρια οντουλένγκε σο αρακχάας κο έργος».

Για τι αβέν σίγουροι ότι κα τθερένας πνευματικός χαμπέ, ο πφραλά κο Μπέθελ αρχισάλε τι τυπώνεν κορκορέ μερικά κατά έντυπα. Κιντέ μηχανήματα ντα τσσουντέ-λεν εκχέ κτιριόστε σο νοικιαντέας κι Λεωφόρος Μιρτλ 35 κο Μπρούκλιν κι Νέα Υόρκη, σο ισινέ πασέ κο Μπέθελ.

Ο Λίο Πελ ντα ο Γουόλτερ Κέσλερ γκιλέ τι υπηρετίνεν κο Μπέθελ κο Ιανουάριος 1920. Ο Γουόλτερ βακερντάς: «Κάνα ερεσλάμ, ο πφραλ σο ισινέ υπεύθυνος για τι τυπώντιβεν ο έντυπα  ντικχλάς-αμέν ντα βακερντάς: “Τθερένα ατζέ μιάμιση ώρα μέχρι τι χαν μεσημεριανός”. Σοράν, τσσουντάς-αμέν τι ακχαράς κατά υπόγειος κουτιά σο τθερένας βιβλία».

Ο Λίο βακερντάς σο αβιλό-πες ο γιαβέρ ντιβές: «Βακερντέ αμένγκε τι τθοβάς ο ντουβάρια κο ισόγειος κι κτιριόσκο. Ισινέ η πιο κχαντινί μπουτί σο κερντόμας ποτές. Αλλά κεράας μπουτί ι Κυριόσκε ντα οτθάρ αξίνελας τι κεράς-λεν σαρέ ανταλά».

Αντρέ σε χάνικ σάντε εβδομάδες, πφραλά σο κερένας μπουτί αντράλ πουμαρέ γκίσταρ τυπώνενας ι Σκοπιά. Εξήντα χιλιάδες περιοδικά ι Σκοπιάκε 1 Φεβρουαρίου 1920 τυπωσάλε κο πιεστήριος σο ισινέ κο πρώτος όροφος. Κι ίδια στιγμή, κο υπόγειος, ο πφραλά τσσουντέ εκ πιεστήριος σο βακερένας λέσκε Θωρηκτό. Κατά περιοδικός 14 Απριλίου 1920, τυπώντιβελας οτθέ ο περιοδικός-ντα Χρυσούς Αιών. Σίγουρα, ο Ιεχωβά ευλογιντάς ι μπουτί σο κερένας οντουλά πφραλά αντράλ πουμαρέ γκίσταρ.

Ο αφοσιωμέ λαός ι Ιεχωβάσκο κερέλας πάλι έργος αντράλ πι γκίσταρ ντα ισινέ ενωμέ. Όμως, μερικοί Σπουδαστές της Γραφής νασλέας κατά οργάνωση κο μπρεσά 1917 μέχρι 1919, σο ισινέ μπουτ δύσκολος βακίτι. Σο κα βοηθίνελας-λεν;

Κι Σκοπιά 1 Απριλίου 1920 (κι αγγλική) ισινέ αντρέ ο θέμας «Τι Μπεσάς με Ειρήνη». Βακερέλας: «Ισινάμ σίγουροι . . . ότι σαρέ οντουλά σο τθερένα ο πνεύμας ι Κυριόσκο . . . μανγκένα αντράλ πουμαρέ γκίσταρ τι μπιστρέν οντουλά σο ισί παλάλ, . . . τι αβέν ενωμέ ντα τι κερέν ο έργος σαρ εκ σώμας».

Ανταλά σουκάρ λάφια ερεσλέ μπουτέ τζενένγκε γκιέντε. Εκ αντρόγυνος γραφιντάς: «Αγαντάμ ότι ισινέ λάθος σο πιο μπουτ από εκ μπρες να κεράας έργος. . . . Να μανγκάσα τι χουχάντιβας πάλι». Οντουλά εργάτες σο αρχισάλεας πάλι τι κερέν πράγματα κι Ιεχωβάσκι υπηρεσία τθερένας ανγκλά-πουμέντε μπουτ έργος τι κερέν.

Κατά 21 Ιουνίου 1920, ο Σπουδαστές της Γραφής κερένας εκ μπαρί προσπάθεια για τι ντεν ο βιβλίος Το Τετελεσμένον Μυστήριον, σο ισινέ ο έβδομος τόμος ι βιβλιόσκο Γραφικαί  Μελέται. Τθερένας μπουτ βιβλία κι νάκρη κάνα η κυβέρνηση κο 1918 να μουκχέλας-λεν τι ντεν ανταβά βιβλίος.

Βακερντέ σαρέ κο πφραλά, όχι σάντε κο σκαπανείς, τι ντεν ανταβά βιβλίος. «Κάθε μπολντό τζενό σαρέ κατά κχανγκιριά σο μπορίνελα τι κερέλ ανταβά έργος πρέπει τι κερέλ-λες χαράσαρ. Σαρέ τι βακερέν: “Εκ πράγμας κεράβα​—ντάβα ο Τετελεσμένον Μυστήριον”». Ο Έντμουντ Χούπερ βακερντάς ότι μπουτ τζενέ νικίστιλε πρώτη φαρ κο έργος κχερ κχερέστε κι εκστρατεία ανταγιά. Ντα βακερντάς: «Αρχισάλαμ τι αγαβάς σο έπρεπε τι κεράς ανταλέ εργόστε σο κα μπαριόλας πιο μπουτ οντουλέσταρ σο μπεκλεντίναας».

Επειδή ισινέ δύσκολος τι κερέν λάφι με το Σπουδαστές της Γραφής σο μπεσένας γιαβερέ τθεμέντε καζόμ αβέλας-πες ο Πρώτος Παγκόσμιος Πόλεμος, ο πφραλ Ρόδερφορντ μανγκέλας τι ντελ ζορ οντουλέ πφραλέν ντα τι οργανώνελ πάλι ο έργος. Οτθάρ, 12 Αυγούστου 1920, βοβ σταρέ γιαβερέ πφραλέντζαρ νασλό για τι ντικχέλ ι πφραλέν κι Βρετανία ντα μπουτέ γιαβερέ τθεμέντε.

Κάνα ο Ρόδερφορντ γκιλό κι Βρετανία, ο Σπουδαστές της Γραφής κερντέ τριν συνελεύσεις ντα 12 συναθροίσεις. Περίπου 50.000 τζενέ γκιλέ. Η Σκοπιά βακερέλας χάνικ λαφίντζαρ ανταλέσκε: «Ο πφραλά λιντέ ζορ. Κερντέ παρέα ντα μπουτί ο εκ ι γιαβερέσαρ, ντα ανταβά ντινάς-λεν μπουτ χαρά». Κο Παρίσι, ο πφραλ Ρόδερφορντ κερντάς πάλι ι ομιλία «Εκατομμύρια Τζενέ σο Τζουβντιόνα Ακανά να κα Μερέν Ποτές». Κάνα αρχισάλι η ομιλία, η αίθουσα ισινέ πφερντί. Τριακόσια τζενέ μανγκλέ τι σικλιόν πιο μπουτ πράγματα.

Ο γιαβερά εβδομάδες, ο πφραλά γκιλέ κι Αθήνα, κο Κάιρος ντα κι Ιερουσαλήμ. Για τι μπορίνεν ο πφραλά σο μπεσένας οτθέ τι κερέν έργος, ο πφραλ Ρόδερφορντ κανονιντάς τι τθερέν εκ γραφείος τμήματος κι Ραμάλα, πασέ κι Ιερουσαλήμ. Σοράν, γκιλό πάλι κι Ευρώπη ντα κερντάς ο Γραφείος Κεντρικής Ευρώπης ντα κανονιντάς τι τυπώντιβεν οτθέ ο έντυπα.

Κο Σεπτέμβριος 1920, ο Σπουδαστές της Γραφής νικαντέ ο Αρ. 27 ι περιοδικόσκο Χρυσούς Αιών, εκ ειδικός περιοδικός σο κερέλας λάφι ι κοντράκε σο τζάνας κο Σπουδαστές της Γραφής κο 1918. Ο Θωρηκτό κερέλας μπουτί ντισάρα ντα ιράτ για τι τυπώνελ πιο μπουτ από τέσσερα εκατομμύρια περιοδικά.

Οντουλά σο διαβαντέ ο περιοδικός σικλιλέ για την Έμα Μάρτιν. Η πφεν Μάρτιν ισινέ βιβλιοπώλης διάκονος κο Σαν Μπερναρντίνο κι  Καλιφόρνια. 17 Μαρτίου 1918, τρινέ πφραλέντζαρ, ι πφραλέντζαρ Έντουαρντ Χαμ, Έντουαρντ Σόνενμπουργκ ντα Έρνεστ Στίβενς, γκιλί εκχέ χουρντέ συναθροισιάτε σο κερένας ο Σπουδαστές της Γραφής.

Εκ τζενό οντουλένταρ σο ισινέ οτθέ να γκιλόας για τι σικλιόλ ι Γραφιάκε. «Γκιλόμ οντουλέ συναθροισιάτε . . . επειδή μπουτσσαντάας-μαν ο εισαγγελέας», βακερντάς πιο σοράν. «Γκιλόμ για τι σικλιάβ πιο μπουτ πράγματα λένγκε». Αρακχλάς οντουβά σο ρόντελας, εκ βιβλίος Το Τετελεσμένον Μυστήριον. Χάνικ ντιβεσά πιο σοράν, ασταρντέ ι πφενιά Μάρτιν ντα ι τρινέ πφραλέν. Κατηγοριντέ-λεν ότι γκιλέ κόντρα κο νόμος επειδή ντένας ανταβά βιβλίος σο ισινέ απαγορευμέ.

Ο δικαστήριος βακερντάς ότι η Έμα ντα ο τριν πφραλά ισινέ ένοχοι ντα χαλέ τριν μπρεσά φυλακή. Αφού κερντέ μπουτ φαρ έφεση ντα ο δικαστήριος να αλλαντάς ι απόφαση, 17 Μαΐου 1920, τσσουντέ-λεν κι φυλακή. Αλλά σουγκό ο πράγματα αβιλέ πιο λατσσέ.

20 Ιουνίου 1920, ο πφραλ Ρόδερφορντ βακερντάς λένγκι εμπειρία εκχέ συνελευσιάτε κο Σαν Φρανσίσκο. Ο τζενέ σο ισινέ οτθέ σαστισάλε κάνα ασουντέ σο τσσίντενας οντουλά Χριστιανοί ντα μπουτσσαντέ εκ γράμμας κο πρόεδρος των Ηνωμένων Πολιτειών. Γραφιντέ: “Πακιάσα ότι η κ. Μάρτιν να γκιλί κόντρα κο νόμος ντα ισί κι φυλακή άδικα. Πακιάσα ότι η κυβέρνηση τσσουντάς παγίδα κι κ. Μάρτιν ντα κατηγοριντάς-λα επίτηδες για τι πφάντελ-λα κι φυλακή ντα ανταβά ισί εκ μπουτ γκεραλό πράγμας”.

Ο γιαβέρ ντιβές, ο πρόεδρος Γούντροου Γουίλσον ελευθερωντάς ι πφενιά Μάρτιν ντα ι πφραλέν Χαμ, Σόνενμπουργκ ντα Στίβενς. Νικίστιλε κατά φυλακή σο τσσουντέας-λεν άδικα.

Κάνα τελειώνελας ο 1920, ο Σπουδαστές της Γραφής τθερένας μπουτ λόγους για τι χαιρίνεν. Ο έργος κο κεντρικά γραφεία αβγατίντιβελας, ντα πιο μπουτ από ποτές ο Σπουδαστές της Γραφής βακερένας ότι η Βασιλεία ι Ντεβλέσκι κα νασκιαρέλ ο προβλήματα ι ντουνιάσκε. (Ματθ. 24:​14) Κο γιαβέρ μπρες, κο 1921, ο Σπουδαστές της Γραφής κα τθερένας ατζέ πιο μπουτ πράγματα τι κερέν κο έργος για τι βακέρντιβελ η αλήθεια ι Βασιλειάκι.