Yehovah tranga den fayafaya preikiman disi trutru. A yari dati a nomru fu kolporteur, noso pionier, kren fu 225 go na 350. Fu a fosi leisi, moro leki 8000 klas wrokoman, noso preikiman, seni den preikiwroko raportu go na a edekantoro. Yehovah blesi a wroko fu den bogobogo.

Tapu 21 maart 1920, Joseph F. Rutherford di ben e teki fesi na ini a wroko fu den Bijbel Ondrosukuman fu a ten dati, ben hori a lezing di ben nen „Milyunmilyun sma di e libi now, noiti no sa dede”. Den Bijbel Ondrosukuman du ala san den man fu kari sma kon fu arki a lezing disi. Den yuru wan fu den moro bigi theater na ini New York City èn den prati sowan 320.000 kari.

Moro sma leki san den Bijbel Ondrosukuman ben fruwakti kon arki a lezing. Moro leki 5000 sma ben span a theater èn den ben musu seni moro leki 7000 sma gowe fu di presi no ben de moro. A tijdschrift The Watch Tower ben taki dati a konmakandra disi ben de „wan fu den moro bigi konmakandra di den Internationaal Bijbel Ondrosukuman ben hori èn di trowstu bun furu sma”.

Furu sma ben kon sabi den Bijbel Ondrosukuman leki den sma di ben e preiki taki „milyunmilyun sma di e libi now, noiti no sa dede”. Na a ten dati, den Bijbel Ondrosukuman no ben e frustan ete taki a Kownukondre boskopu ben musu preiki na moro presi na grontapu èn taki a wroko ben o teki moro langa. Ma toku den ben e preiki fayafaya. Ida Olmstead di bigin go na den konmakandra na ini 1902, e fruteri: „Wi ben sabi taki ala libisma ben o man kisi bigi blesi na ini a ten di e kon èn wi tan du muiti fu preiki a bun nyunsu disi gi sma di wi ben e miti na ini a preikiwroko.”

Fu di den brada na Betel ben wani sorgu taki sma tan kisi leri fu Gado, meki den bigin druk sonwan fu den buku den srefi. Den bai masyin èn den seti den na ini wan gebow di den ben yuru na 35 Myrtle Avenue, krosibei fu a Betel-oso na Brooklyn, New York.

Leo Pelle nanga Walter Kessler go dini na Betel na ini yanuari 1920. Walter e taki: „Di wi doro drape, na opziener fu a drukkerij luku wi èn a taki: ’Unu abi ete wán nanga afu yuru fosi wi go nyan.’ A poti wi fu tyari dosu nanga buku go na sodro.”

 Leo e memre san pasa a dei baka dati: „Wi ben abi a wroko fu wasi den skotu na inisei fu a gebow. Noiti ete mi ben du so wan fisti wroko. Ma fu di wi ben e wroko gi Yehovah, meki wi ben e du en nanga prisiri.”

Wan tu wiki nomo baka dati, brada ben e wroko fayafaya fu druk a tijdschrift The Watch Tower. Den druk siksitenti dusun fu a tijdschrift fu 1 februari 1920, na a fosi sodro fu a gebow. Na a srefi ten, den brada seti wan drukpers na ini a pisi fu a gebow di ben de ondrogron èn den kari a drukpers dati a Fetisipi. Den brada bigin druk a tijdschrift The Golden Age (Het Gouden Tijdperk) tu. Den bigin nanga a di fu 14 april 1920. A de krin taki Yehovah blesi a muiti fu den brada disi di ben de klariklari fu du a wroko.

A pipel fu Yehovah bigin du a wroko fu den fayafaya baka èn den bigin wroko makandra leki wán man baka. Ma di tesi miti na organisâsi na a ten fu 1917 te go miti 1919, dan son Bijbel Ondrosukuman gowe libi na organisâsi. Fa den ben kan yepi den sma disi?

The Watch Tower fu 1 april 1920 ben abi na artikel di nen „Meki freide de na wi mindri”. Na artikel ben gi sma a deki-ati disi: „Wi de seiker . . . taki ibri sma di abi a yeye fu Gado . . . o wani frigiti den sani di pasa, . . . so taki wánfasi kan de na wi mindri èn wi kan dini Gado makandra leki wán man.”

Den moi wortu disi ben naki na ati fu furu sma. Wan trowpaar ben skrifi: „Wi kon si taki a no ben bun taki wi no preiki a pisi ten di pasa, aladi tra sma ben e du a preikiwroko. . . . Wi e howpu taki noiti moro wan sani puru wi prakseri na a wroko disi.” Den brada nanga sisa disi ben o abi furu du.

Tapu 21 yuni 1920, den Bijbel Ondrosukuman bigin prati a „ZG” fayafaya. Dati ben de a buku The Finished Mystery di ben tyari kon na doro leki tijdschrift. * Di lanti taki na ini  1918 taki a buku disi no ben mag prati moro, dan den brada poti den na ini maksin.

Boiti den pionier, ala den tra preikiman kisi wan kari fu yepi prati a buku disi. „Ibri dopu sma fu ibri klas di kan teki prati na a wroko musu du dati nanga prisiri.” Den ben gi ala sma deki-ati fu si en leki wan prenspari sani fu prati a ZG. Edmund Hooper e memre taki disi ben de a fosi leisi gi furu sma fu du na oso-fu-oso preikiwroko. A e taki: „Wi bigin frustan moro krin san a ben wani taki fu du a wroko disi di ben o gro moro leki san wi ben fruwakti.”

Na a ten fu a Fosi Grontapufeti, a no ben makriki fu feni okasi fu taki nanga den Bijbel Ondrosukuman na ini tra kondre. Dati meki Brada Rutherford ben wani gi den brada nanga sisa disi deki-ati èn a ben wani orga a preikiwroko baka. Sobun, tapu 12 augustus 1920, en nanga fo tra brada teki pasi go na Ingrisikondre nanga furu tra kondre.

Di Brada Rutherford ben de na ini Ingrisikondre, den Bijbel Ondrosukuman hori dri kongres nanga 12 konmakandra. Ala nanga ala, sowan 50.000 sma ben de na den konmakandra disi. The Watch Tower ben taki: „Den brada nanga sisa kisi furu deki-ati fu den konmakandra disi. Den ben breiti srefisrefi fu de nanga makandra èn fu wroko nanga makandra.” Na ini Parijs, Brada Rutherford hori a lezing baka di nen „Milyunmilyun sma di e libi now, noiti no sa dede”. Di a bigin nanga a lezing a heri zaal ben span. Baka dati, dri hondro sma aksi fu kon sabi moro.

Den wiki baka dati, wan tu brada go na Ateine, Cairo, nanga Yerusalem. Brada Rutherford ben wani taki den sma di ben wani sabi moro kisi yepi. Dati meki a opo wan bijkantoro na ini a foto Ramallah, krosibei fu Yerusalem, pe den ben e poti buku so taki sma drape ben kan kisi yepi. Baka dati, a drai go baka na Europa fu seti a Centraal Europa bijkantoro na ini Switserland pe den ben o bigin druk buku.

Na ini september 1920, den Bijbel Ondrosukuman tyari nr. 27 fu a tijdschrift The Golden Age kon na doro. A tijdschrift disi ben meki spesrutu fu tyari kon na krin fa  sma ben e frufolgu den Bijbel Ondrosukuman na ini 1918. A drukpers di wi ben taki fu en na a bigin, ben e drai dei nanga neti fu druk moro leki fo milyun fu a tijdschrift disi.

Den sma di ben leisi a tijdschrift disi kon sabi san pasa nanga Emma Martin. Sisa Martin ben de wan pionier na ini San Bernardino, na Kalifornia. Tapu 17 maart 1918, en nanga dri brada, E. Hamm, E. J. Sonnenburg, nanga E. A. Stevens ben kon makandra nanga wan tu Bijbel Ondrosukuman.

Ma wan man ben de drape di no ben kon fu leri sani fu Bijbel. Bakaten, di a ben de na fesi krutu a taki: „Mi go na a konmakandra disi . . . fu di lanti ben taigi mi fu go. Mi go fu feni buweisi teige den.” A feni a „buweisi” di a ben e suku èn dati ben de wan fu den buku The Finished Mystery. Wan tu dei baka dati, skowtu hori Sisa Martin nanga den dri brada. Sma ben feni taki den ben trangayesi a wet di e taki dati den no ben mag prati a buku dati.

Emma nanga den tra brada kisi dri yari strafu. Aladi den tyari a tori go na krutu difrenti leisi, toku den ben musu go na strafu tapu 17 mei 1920. Ma heri esi wan kenki kon.

Tapu 20 yuni 1920, Brada Rutherford fruteri na ondrofenitori fu den sma disi na wan kongres na ini San Francisco. Den brada nanga sisa di ben de drape no ben feni en bun srefisrefi san sma ben du nanga den Kresten disi. Dati meki den seni wan telegram-brifi gi a presidenti fu Amerkankondre. Den skrifi: „A no de wan reti sani taki un krutu . . . Mevrouw Martin . . . leki wan sma di trangayesi a wet . . . Skowtu gebroiki a makti fu den fu . . . seti wan trapu . . . gi Mevrouw Martin . . . èn baka dati den lei gi en soso fu man poti en na strafu-oso. Wi feni taki a sani dati no kan kwetikweti.”

A dei baka dati, Presidenti Woodrow Wilson meki den lusu Sisa Martin, Brada Hamm, Brada Sonnenburg, nanga Brada Stevens wantewante. Den no ben abi fu koti strafu moro.

Na a kaba fu 1920, den Bijbel Ondrosukuman kon si taki furu bun sani ben pasa èn taki den ben kan breiti fu den sani dati. A wroko na a edekantoro ben e gro moro nanga moro èn noiti ete den Bijbel Ondrosukuman ben e wroko so fayafaya fu preiki taki Gado Kownukondre wawan kan lusu den problema fu libisma (Mat. 24:14). A yari baka dati, na ini 1921, den ben o preiki a Kownukondre boskopu gi moro sma srefi.