იეჰოვაქ გამანგარ თე მონდომებულ მაქადაგებელეფ. 1920 წანას პიონერეფიშ რიცხვიქ, მიდგას თი დროს წიგნეფიშ გილმაღალარეფ ჯოხოდეს, 225-შე 350-შახ მიძინ. თეს გეძინელ, თე წანას 8 000-შე მეტ მაქადაგებელქ პირველო ჩაბარ მსახურებაშ ანგარიშ. იეჰოვაქ მანგარო აკურთხჷ თინეფიშ მონდომა.

ჯოზეფ რუტერფორდიქ, მით თი დროს ბიბლიაშ მარკვიებელეფს ხემძღვანელენდჷ, 1920 წანაშ 21 მარტის გაკეთ მოხსენება: „ამდღა მახორუ მილიონეფ დღას ვა ღურნა“. ბიბლიაშ მარკვიებელეფს დუდ ვაუზოგებნა, ნამდა დაინტერესებულ ადამიანეფ ქუდაპატიჟესკო თე მოხსენებაშ ორჩქილშა. თინეფქ ნიუ-იორკის ართ-ართ არძაშ უმოს დიდ თეატრ დექირეს დო სოდგარენ 320 000 მაწვიებელ გავრცელეს.

მოხსენებაშ ორჩქილშა ელდესინ თიშე ბრელით უმოს კოჩიქ ქუმორთჷ. დარბაზის 5 000-შე მეტ კოჩიქ დიშაყარ დო 7 000-შე უმოსის უკახლე აჸუ დართინალქ. „გინაჯინალ კოშკის“ თე შეხვალამა მოშინაფილ რდუ, მუჭოთ: „ართ-ართ არძაშ უმოს დიდ შეხვალამა, ნამუთ ბიბლიაშ საერთაშორისო მარკვიებელეფქ ჩატარეს“.

ბიბლიაშ მარკვიებელეფ აცხადენდეს ცნობას: „ამდღა მახორუ მილიონეფ დღას ვა ღურნა“ დო თეშ ჭყოლოფათ თინეფს არძა იჩინენდჷ. მართალ რე, თი დროს თინეფს ვარჩქილედეს, ნამდა სამეფოშ გურშენ ცნობაქ უმოს დიდ მაშტაბით ოკო იჸუკო გაცხადებულქ, მარა იშენით განსაკუთრებულ მონდომას გიმირჩქინანდეს. იდა ომსტედი, ნამდგაქ შეხვალამეფშა დასწრება 1902 წანას დიჭყჷ, იშინანდჷ: „ჩქი მიჩქუდეს, ნამდა კაცობრიობას დიდ კურთხევეფ მელუდ დო თე სახიოლო ამბეს ვურაგადუდით არძას, მიდგას მსახურებას შეფხვადუდით“.

ჯიმალეფქ ბეთელს მუნეფიშით ქიდიჭყეს ნამთინე ლიტერატურაშ ბეშტუა, ნამდა სულიერ საზრდო ქიმეჩესკო ხალხის. თინეფქ ქიჸიდეს საჭირო დანადგარეფ დო ქუდოდგეს ქირებულ შენობას, ნამუთ ბრუკლინს, ნიუ-იორკის, მირტლ-ავენიუშ 35-ის რდუ. თე შენობა ბეთელშე მუსხირენ კვარტალიშ მაშორას რდუ.

ბეთელშა 1920 წანაშ იანარს მიწვიეს ჯიმალეფ, ლეო პელი დო ვოლტერ კესლერი. ჯიმა ვოლტერ იშინანდჷ: «ბეთელშა ქიმეფრთითინ, სტამბაშ ზედამხედველქ ქინმოჯინეს დო მიწუეს: „სადილშახ საათ დო გვერდ გიღნა“. თიქ პადვალშე კარდონიშ ყუთეფიშ ეკოღალა დუმავალეს».

ლეო იშინანდჷ, მუქ მოხვად მაჟია დღას: „თე შენობაშ პირველ სართულიშ კიდალეფიშ რჩხუალა  დუმავალეს. თენა არძაშ უმოს უსუფთაო საქმე რდუ, მუთ დღას მიკეთებ. მარა თენა უფალიშ საქმე რდუ დო ათეშენ ღირუდ თიშ კეთება“.

მუსხირენ მარაშა „გინაჯინალ კოშკის“ მსახურებაშო დუდგინოდვალირ მოხალისეეფ ბეშტანდეს. შენობაშ მაჟია სართულს 1920 წანაშ 1 ფრევალიშ „გინაჯინალ კოშკიშ“ 60 000 ეგზემპლარქ იბეშტჷ. თე დროშ დინახალე, ჯიმალეფქ პადვალს ქუდოდგეს როტაციულ ობეშტალ მანქანა, ნამდგას „სამხედრო გემი“ გიოდვეს. 1920 წანაშ 14 აპრილშე მოჸუნაფილ ქიდიჭყეს ჟურნალიშ „ოქროშ ხანა“ გიშაშქუმალა. არგამა რე, იეჰოვაქ აკურთხჷ თე დუდგინოდვალირ მსახურეფიშ მონდომა.

იეჰოვაშ ართგურ ხალხის ხიოლ მოუღ გაახალებურ ძალეფით ქადაგებაქ დო ართიანწკუმა თანამშრომლობაქ. მარა 1917—1919 წანეფს რთულ პერიოდიქ ქუდოდირთჷ დო ბიბლიაშ ნამთინე მარკვიებელქ ორგანიზაცია ქიდიტუ. მუჭო ოკო მეხვარესკო თინეფს?

„გინაჯინალ კოშკის“, 1920 წანაშ 1 აპრილიშ გიშაშქუმალას, მოჩამილ რდუ სტატია: „მორთ იფცხოვრათ მშვიდობიანო“. სტატია მთელ გურით ურაგადუდ თე ჟურნალიშ მაკითხეს: „ჩქი დარწმუნებულ ვორეთ . . . ნამდა თითოულ, მიდგას უფალიშ წმინდა შურ უღჷ . . . მზათ რე, გიჭყოლიდუას ულირს მოხვალამირ . . . ნამდა იფცხოვრათ ართობას დო ადამიანიშ სხეულცალო ჰარმონიულო იფთანამშრომლათ“.

ბრელქ გურშა მიღჷ თე სიტყვეფ. ართ დაქორწინებულ წყვილქ ჭარჷ: „ჩქი მარჩქილენა, ნამდა შეცდომა რდუ წარმოწანაშე მეტ ხანს ჩქინ უმოქმედოთ რინა, მუჟამსით შხვეფ ქადაგენდეს . . . იმენდ მიღნა, ნამდა თეცალ შეცდომას დღას ვა დუშვენთ“. ღორონთიშ თეცალ მსახურეფს ბრელ საქმე ელდეს წოხოლე.

ბიბლიაშ მარკვიებელეფქ 1920 წანაშ 21 ივანობაშე მოჸუნაფილ ქიდიჭყეს, წიგნიშ „დასრულებურ საიდუმლო“ გავრცელება, ნამდგას ჟურნალიშ ფორმა უღუდ; თის „ZG“-ს უძახდეს. * 1918 წანას  თე წიგნიქ ვარიებულქ იჸუ, ათეშენ ჯიმალეფქ თიშ დიდ რაოდენობა დოჩუეს.

ხვალე წიგნეფიშ გილმაღალარეფს ვარინ, არძა მაქადაგებელს მოუწოდეს, მონაწილება მიღესკო თე წიგნიშ გავრცელებაშ საქმეს. «არძა ნათილ პიროვნებაქ, თითოულ კრებაშე, მიდგას თე საქმეს მონაწილებაშ მეღება შეულებ, თენა ხიოლით ოკო აკეთას. მორთ თითოულიშ დევიზ რდას: „მთავარ, მუდგას ვორთუქ — ვავრცელენქ ZG-ს“». ედმონდ ჰუპერ იშინანდჷ, ნამდა თე კამპანიაშ დროს ბრელქ პირველო იქადაგ კარდოკარ. თიქ გეუძინ: „ვორწყედით, ნამდა თე საქმექ ველუდითინ თიშე ბრელით უმოსო გეფართოვ“.

პირველ მსოფლიო ომიშ დროს შხვა ქიანას ბიბლიაშ მარკვიებელეფწკუმა დაკავშირება ძნელ რდუ, ათეშენ ჯიმა რუტერფორდის ოკოდ, გურშა ელუკინკო თინეფს დო თექ ქადაგებაშ საქმე განაახლკო. თაშ ნამდა, 1920 წანაშ 12 არგუსოს რუტერფორდიქ დო ოთხ ჯიმაქ მიდართეს ბრიტანეთ, ცენტრალურ ევროპა დო შქა აღმოსავლეთშა.

მუჟამსით რუტერფორდიქ ბრიტანეთშა გენორთჷ, ბიბლიაშ მარკვიებელეფქ სუმ დიდ კონგრეს დო 12 საჯარო შეხვალამა ჩატარეს. თე შეხვალამეფს სოდგარენ 50 000 კოჩიქ დესწრჷ. თე ვიზიტიშ გურშენ „გინაჯინალ კოშკის“ ჭარუდ: „ჩქინ და დო ჯიმალეფ გურშა ელაკინელ რდეს დო გაახალებურ ძალეფ უღდეს. თინეფიშ ჸოროფაქ უმოსო გემანგარ დო მსახურებას უმოს ართობა უღდეს. შედეგო თინეფიშ გურქ ხიოლით ეიფშჷ“. თეშ უკულ, ჯიმა რუტერფორდიქ პარიზის ხოლო გაკეთ მოხსენება: „ამდღა მახორუ მილიონეფ დღას ვა ღურნა“. მუჟამსით მოხსენებაქ ქიდიჭყჷ, დარბაზიქ ხალხით ეიფშჷ. შეხვალამაშ უკულ სუმოშშე უმოს პიროვნებაქ მითხუ მეტ ინფორმაციაშ მეღება.

უკულიან მარეფს, მუსხირენ ჯიმაქ მიდართჷ ათენი, კაირო დო იერუსალიმშა. თე ადგილეფს მახორუ ხალხის უმოს ინტერეს გურჩქინკონ, ჯიმა რუტერფორდიქ ჭიჭე ქალაქ რამალას, იერუსალიმწკუმა ხოლოს, ლიტერატურაშ საწყობ გონწყჷ. უკულ კინ ევროპაშა დირთჷ, სოდეთ ცენტრალურ ევროპაშ ოფისი გონწყჷ დო თექ ლიტერატურაშ ბეშტუა დაგეგმჷ.

ბიბლიაშ მარკვიებელეფქ, 1920 წანაშ დამორჩილს, გეგშაშქვეს ჟურნალიშ „ოქროშ ხანა“ 27-ა ნომერ. თენა სპეციალურ გიშაშქუმალა რდუ, სოდეთ გიმოარგამებულ რდუ, მუჭო თხოზუდეს 1918 წანას ბიბლიაშ მარკვიებელეფს. „სამხედრო გემს“, ნამუთ ჟიშე მიფშინეთ, და დო ჯიმალეფ დღაშ დო სერით მუშენდეს, ნამდა თე ჟურნალიშ ოთხ მილიონშე მეტ ეგზემპლარ დუბეშტუდესკო.

 თე ჟურნალშე ხალხიქ ქიგეგ და ემა მარტინიშ წინააღმდეგ წუმოჭყაფილ საქმეშ გურშენ. და მარტინ წიგნეფიშ გილმაღალარ რდუ სან-ბერნარდინოს, კალიფორნიას. 1918 წანაშ 17 მარტის, თინა დო ჯიმალეფ ჰემი, სონენბურგი დო სტივენსი ბიბლიაშ მარკვიებელეფიშ ჭიჭე შეხვალამას ოსწრუდეს.

თე შეხვალამას ოსწრუდ ართ კოჩ, ნამდგას თექ ბიბლიაშ გურშენ მეტიშ გაგებელო ვემურთუმ. უმოს გვიანო, თიქ აღიარ: „თე შეხვალამაშა ულა . . . პროკურატურაქ დუმავალ. თექ თი მიზანით მეფრთჷ, ნამდა ხეშა მტკიცებულება ქეშიპჸოთკო“. თიქ ქოთ ქაშიჸოთ თე „მტკიცებულება“, თენა რდუ წიგნ „დასრულებურ საიდუმლო“. მუსხირენ დღაშა და მარტინ დო თი სუმ ჯიმა ოჭოფეს. თინეფს შპიონაჟის ქიგედვეს ბრალ, მუშენდა ვარიებულ წიგნის ავრცელენდეს.

და ემა დო თე სუმ ჯიმას ბრალ დუმტკიცეს დო სუმ წანიან პატიმრობა ქიმუსაჯეს. თინეფქ მუსხირენშა გასაჩივრეს სასამართლოშ გადაწყვეტილება, მარა ნამთინ საჩივარ ვა დაკმაყოფილეს დო 1920 წანაშ 17 მესის თინეფ ციხეს ქუდახუნეს. მარა მალას ირფელქ უჯგუშობაშა დითირ.

ჯიმა რუტერფორდიქ 1920 წანაშ 20 ივანობას თინეფიშ შემთხვევა მიშინუ კონგრესის, ნამუთ იტარებუდ სან-ფრანცისკოს. კონგრესიშ დამსწრეეფს მანგარო გუკვირდეს თე ამბექ დო ტელეგრამა ქიმუჯღონეს შეერთებულ შტატეფიშ პრეზიდენტის. თე ტელეგრამას ჭარუდ: „სასამართლო გადაწყვეტილება . . . ნამუთ ემა მარტინს ოხუ . . . მიმორჩქუნა, ნამდა თის უსამართლოთ გედვეს ბრალ შპიონაჟის . . . ფედერალურ ოფიცერეფიშ საქციელ, მიდგაქ მუნეფიშ ძალაუფლება გიმირინუეს, ნამდა . . . ქიგიოჭოფესკო . . . ემა მარტინ . . . უკულ თიშ წინააღმდეგ საქმე ქიმწიჭყესკო დო ციხეს ქუდახუნესკო, მიმორჩქუნა, ნამდა თენა . . . მანგარ უსამართლობა რე“.

მაჟია დღას პრეზიდენტიქ ვუდრო უილსონქ გაუქმჷ და მარტინ დო ჯიმალეფ ჰემი, სონენბურგი დო სტივენსიშ სასჯელ. თაშ ნამდა, უსამართლო პატიმრობაქ გეთუ.

ბიბლიაშ მარკვიებელეფს ხიოლიშ ბრელ მიზეზ უღდეს 1920 წანაშ ბოლოს. სამეფოშ საქმე უმოს დიდ მაშტაბით ისრულებუდ დო ჭეშმარიტ ქრისტიანეფ უმოს აქტიურო აცხადენდეს, ნამდა კაცობრიობაშ პრობლემეფს ხვალე ღორონთიშ სამეფო გინოჭკირუნს (მათ. 24:14). 1921 წანა უმოს მნიშვნელოვან იჸუაფუდ სამეფოშ გურშენ ჭეშმარიტებაშ გაცხადებაშო.