1. Eeghe kụ edị ewạ dị aKristẹn phọ abuphẹ moḍiiny bọ muụm mọ kokiọm ghisigh oḍighi ghan?

NẠ MAḌIINY ni muụm? Eḍighi iduọn phọ, pọ nạ maḍeenhaan ni esi ogbo mọ nạ ameeraam ni aZihova, ḅilhẹ kẹn mọ nạ aakolhobian ni oḅọph r’ookpomhoghan phọ okumu odị. * Iikia i/lo, omheeraam mọ nạ amhoọgh bọ aghị esi aZihova kakị ni ghisigh akpạr ghan bịn. Kụ ewạ kẹn dị nạ kakiọm ghisigh akparamhị omheeraam mọ anạ mọ ookpomhoghan phọ aZihova ramuneni ni oḍighi phọ aZihova ḍio arodon.

2-3. Eghẹn eten kụ edị aZihova raaḅakị bọ ookpomhoghan phọ odị ḍio arodon? Gbạ.

² Ḍio arodon, eten phọ aZihova raaḅakị bọ ookpomhoghan phọ odị eeghironhaan raagharạ phọ odị, ogbi phọ odị, ḅilhẹ r’asinhị iilhogh phọ odị. Uguạ ooḅeghiọn iraạr araagharạ aZihova dị eeghironhaan siẹn ookpomhoghan phọ odị.

³ Eḅẹl phọ, “Enaạn re/Iọgh ghan oye iiseẹny.” (Iiḍighi 10:34) Ephomhoghiạn inyu ni aZihova osighẹ Oọny phọ odị ‘otagharanạm oomo awe.’ (1 Tim. 2:6; Jọn 3:16) AZihova asighẹ we phọ odị kụ rakaaphọm ghan iiḅi iinhaghạn phọ kaḅenhị oomo abuphẹ rowạ bọ omhooghọm aani asuọ ekiạ etagharạn phọ. Omhunhenhiom iyạl, aZihova aḍighi Enhaạn eephọ dị ramaạr ghan kaḅoonhomhị raraạr. (1 Kọr. 14:33, 40) Loor esi iduọn phọ, yira oḍuom ni olhoghi mọ arebenhẹ phọ odị komoọgh eephọ oḅilhẹ omaạr oḅoonhomhị araraạr. Omhunhenhiom iraạr, aZihova kụ “Ogbogh Otomoghiom.” (Isa. 30:20, 21) Pọ kụ iyaạr phọ ookpomhoghan phọ odị ogbon bọ otughemhị ghan awe Ekpo Onhụ phọ odị, Baibul phọ, emhiigh siẹn ookpomhoghan phọ kụ esi epẹ erugh phọ. Ika kụ idị iraạr phọ apakirị araagharạ phọ aZihova iphẹn phọ eganana siphẹ ookpomhoghan aKristẹn oḅẹl okuron asiạ phọ? Ika kụ idị awe phọ aZihova roḍeenhaan raagharạ  phọ iphẹn phọ ḍio arodon? Kụ ika kụ idị uwaloor iigbia phọ kaloghonhaạn nyinhạ ḍighaạgh okumuan r’ookpomhoghan phọ aZihova ḍio arodon?

4. Odaphạn Iiḍighi 1:8, eeghe iyaạr kụ edị aZizọs atọ aḅenhị bumatuạn phọ odị oḍighi, kụ kongọ bidị eeghe iyaạr?

⁴ Siphẹ oḅẹl okuron asiạ phọ. Adom mọ aZizọs agbeelhom ghan bọ engọ oḍuomolhoghi oomo omhạr awe. (Luk 4:43) Odị atọ aḅenhị bumatuạn phọ odị mọ oghiọm ghisigh oḍighi phọ odị amhiighom bọ, ongọ ghan ogbaanhaạn tutụ bidị osiemhi “eekuna aḅirini phọ.” (Bạl Iiḍighi 1:8.) Ii, bidị bịn ko/tue oḍighi oḍighi phọ ophọn phọ r’inyaạm abidị. Kewạ ni mọ bidị omhoọgh uwaloor iigbia phọ—“olọgh ḍighaạgh phọ [nwt]” aZizọs aguanhaan bọ bidị.—Jọn 14:26; Zech. 4:6.

5-6. Ighẹn areten kụ edị uwaloor iigbia phọ alhoghonhaạn ḍighaạgh bumatuạn phọ aZizọs?

⁵ Ungọ uwaloor iigbia phọ bumatuạn phọ Pentecost 33 C.E. R’olhoghonhaạn aḍighaạgh uwaloor iigbia phọ, bidị umhiigh ogbạ ikpo onhụ phọ egina amem, kụ esi ekulha amem asimuonịr umheeraam ni dom iiḅi iinhaghạn phọ. (Iiḍighi 2:41; 4:4) Mem dị awe omhiigh okpuuroghọm abidị, bidị u/meel uḍighanhaan esi oghiilhaan, kuolọ bidị ulhọm Enhaạn olhoghonhaạn aḍighaạgh. Bidị uuḅereghị mọ: ngọ rebenẹ phọ anạ “akpọ ologhi oghaaphọm ghan oghaạph phọ anạ.” Uwaloor iigbia phọ amuza ni loor oomo abidị kụ oghiọm ghisigh “oghaaphọm ghan oghaạph phọ Enaạn r’akpọ ologhi.”—Iiḍighi 4:18-20, 29, 31.

⁶ Abumatuạn phọ aZizọs uḅilhẹ ni usoman inhọn ipaanhaạn. Esi omaạm, ikpooghinheen arinyạ iigbia phọ i/ḍiza mem mọ opọ phọ. Arinyạ osighẹ otuughaạm i/tọl, iduọn yira omhoọgh bọ ḍio arodon. Ḅilhẹ kẹn, awe dị oḅạ ghan runhụ aḍiaḅạ kirokirọ kụ edị bidị kokaạph oḅenhị. Etigheri ipaanhaạn phọ iphẹn phọ, r’oophugh abumatuạn phọ abuẹn phọ uḍighi ni oḍighi dị u/seere olhoghi—esi 30 asiạ, bidị ugbeelhom ni iiḅi iinhaghạn phọ “oleenye oomo aḅirini pho.”—Kọl. 1:6, 23.

7. Dị mepel li esi 100 asiạ, ika kụ idị arebenhẹ phọ aZihova olhegheri oḍighi phọ Enhaạn rawạ bọ mọ bidị oḍighi, kụ bidị umhegheron ika?

⁷ Siẹn amem mọ ayira. AZihova akiọm ni ghisigh raaḅakị kaḅilhẹ angọ iikpọ we phọ odị. Ogbogh apakirị iiḅakiọm mọ eḍuạ siphẹ aBaibul phọ, uwaloor phọ odị aphum bọ kụ ogẹ kụ atu. Isiphẹ phọ kụ edị yira omhiịn bọ dị ogẹ ilọ arukumuan phọ aZizọs ḅilhẹ r’itọ phọ odị eḅẹm bọ mọ abumatuạn phọ odị oghiọm ni ghisigh oḍighi phọ odị amhiighom bọ. (Mat. 28:19, 20) AWatchtower aJuly 1881, aḅẹm mọ: “U/mạgh obobọ u/sagharạn iyira okpologhi eelạ bịn oḍigh eghuan, kuolọ umhạgh iyira osighẹ araraạr emhoọgh ayira ghụn kụ olhọgh esi oghaạph iiḅi iinhaghạn phọ.” Aḍinyạ dị oghol mọ To Whom the Work Is Entrusted, dị omiteom lhạ phọ 1919, iḅẹm mọ: “Ekịgh mudị oḍighi phọ abụgh ni, kuolọ aḍighi oḍighi Uw-emhoọgh phọ, kụ odị kungọ ni iyira inyaạm oḍighinhom.” Ii, idiphọ abuḅẹl aKristẹn phọ, r’akpọ oḅio abumor phọ ukuọm ni loor abidị oḍighi phọ, r’oḍuom olhoghi mọ uwaloor iigbia phọ kaloghonhaạn ni bidị ḍighaạgh oghaạph iiḅi iinhaghạn phọ oḅenhị awe kirokirọ. Yira phọ kẹn opamanhạm ni oniin phọ oḍuomolhoghi phọ opọ phọ ḍio arodon.

8-9. Ighẹn areten kirokirọ kụ edị ookpomhoghan phọ aZihova moḍighinhom obughẹ oghaạph iiḅi iinhaghạn phọ?

⁸ Ookpomhoghan phọ aZihova mosighẹ ni imạ araraạr oḍighinhom oraramhị oghaạph iiḅi iinhaghạn phọ. Araraạr phọ iphẹn phọ pọ arinyạ phọ ayira, “Photo-Drama of Creation,” phonographs, sound cars, radio broadcasts ḅilhẹ r’intanẹt phọ aḍio arodon. Ookpomhoghan phọ Enhaạn oḅilhẹ kẹn opạm oḍighi ogbạ otenheghi inhọn arunhụ dị mepelhom idị merọl ghan! Eeghe kụ iḍighi? Loor esi dị bidị rowạ mọ awe kirokirọ onhaghạn oghaạph iiḅi iinhaghạn phọ onhụ phọ opọ abidị. AZihova ra/lọgh ghan oye iiseẹny; odị aghaạph ni mọ kokaạph ni oghaạph iiḅi iinhaghạn phọ oḅenhị we “oomo areelhe phọ r’arughunughun r’arunhụ r’aramạ oomo aḅirini phọ.” (Ogan. 14:6, 7) Odị rawạ dị torobọ oye kanaghạn aani dom Omhạr phọ.

 ⁹ Kokaạph aani ika ilọ abuphẹ okpạr bọ oteẹny, idiphọ abuphẹ orughogh bọ igbogh-aruutu dị ekpạr oḍigh? Omhiịn mọ oteẹny ni budọ awe phọ abuẹn phọ, ookpomhoghan phọ aZihova uuḅeghiọn ni reten kirokirọ osighẹ ongoọm ogbaanhaạn esi ogbo. Esi omaạm, lhạ phọ 2001, Aloor Phọ Repogh Bọ umheeraam ni mọ omhiigh oḍighinhom akạt phọ epẹ France, kụ esighẹ rekị bịn esi aani inhọn arikpisi. Iphẹn phọ ikọm ni imạ emiteom. Kụ lhạ phọ 2011, umhiigh ni osighẹ emhoom eten phọ ephẹn phọ oḍighinhom oghaạph iiḅi iinhaghạn phọ igbogh arikpisi epẹ New York City, United States, rikpisi dị awe ro/kạr ghan komhoọgh eepoogh. Ḍiḅẹl alhạ phọ, 102,129 arinyạ ḅilhẹ r’68,911 asimagazin kụ edị bidị ongooghị. Kụ awe dị omhạn 4,701 kụ uḅẹm mọ bunọ kotuughạ aani Baibul phọ! Eegholhaan ni mọ uwaloor iigbia phọ abakị ni oḍighi phọ ophọn phọ. Odaphạn iphẹn phọ, Aloor Phọ Repogh Bọ umheeraam ni mọ oḍighinhom aani emhoom eten phọ ephẹn phọ oomo isiẹn aḅirinhi phọ.

10. Yira koḍighi ika kụ otue osilor epẹ erugh phọ?

¹⁰ Idị ewạ mọ ḍighi aani. Miịn mọ nạ amooghọm aani ni suọ ipẹ aZihova ratughemhị bọ siphẹ otu ituughạ phọ. Gbor ghan arelhean r’opọ rapogh bọ ekool arukumuan phọ anyinha. Bịn melhoghonhaạn nyinhạ ḍighaạgh osilor oghaạph aani iiḅi iinhaghạn phọ r’otughemhị ghan, abumor r’abumarani phọ kotue ni olọgh kẹn ḍighaạgh. Kiọm ni ghisigh etigheri ipaanhaạn. Idiphọ esi aBaibul phọ osighẹ bọ emhuoghaạph phọ eḅẹm bọ, ke/si iikpọ ayira, kuolọ esi uwaloor iigbia phọ kụ edị yira rotue ghan bọ komhunhenhi ogbi phọ Enhaạn. (Zech. 4:6) Loor esi dị oḍighi phọ oḍighi Enhaạn.

11. Ika kụ idị aloor phọ repogh bọ erọl bọ mem oḅẹl okuron asiạ phọ, oḅophoghạn okumuan orue ophamhanhạm eephọ roḅilhẹ omhaạr oḅoonhomhị araraạr siẹn ookpomhoghan phọ?

¹¹ Siphẹ oḅẹl okuron asiạ phọ. Aloor phọ repogh bọ erọl bọ Jeruselem uḅophoghạn ni okumuan, omhiịn mọ bidị opamanhạm ni eephọ oḅilhẹ omaạr oḅoonhomhị raraạr igbo awe phọ Enhaạn. (Iiḍighi 2:42) Esi omaạm, mem mọ oghaạph iḍun phọ alhegheri bọ bịn agholhoghọl mem mọ reteẹny bọ lhạ phọ 49 C.E., dị eego esi iiḅakiọm uwaloor iigbia phọ, aloor phọ repogh bọ uuḅeghiọn ni iiḅaghamhị phọ esoor bọ. Mọ ookpomhoghan phọ m”uḅọph bọ onhụ ilọ oghaạph phọ ophọn phọ, obọ oḍighi iphelhegbeel phọ muḅula  ni omhạn. Kụ ghalhamọ r’iduọn bidị oḍighi bọ ni buọ aJu, abutelhedom mọ r’ikumor awe phọ u/meera ikạ eḍighinhom iyaạr abuọ aJu phọ obobọ abuẹn rotughemhị bọ emhoogh bidị. Kparipẹ ghụn, bidị uughiraan osoman Ekpo Onhụ phọ Enhaạn ḅilhẹ r’iiḅakiọm uwaloor iigbia phọ. (Iiḍighi 15:1, 2, 5-20, 28) Eeghe kụ iḍuạ emite? AZihova asẹph ni osopha phọ abidị, kụ eephọ r’amuḅọph esoor, kụ bidị oghiọm ghisigh oḍighi iphelhegbeel phọ.—Iiḍighi 15:30, 31; 16:4, 5.

12. Eeghe kụ iḍeenhaan bọ mọ eephọ ḅilhẹ roḅoonhomhị ghan araraạr edi ni siẹn ookpomhoghan phọ aZihova ḍio arodon?

¹² Siẹn amem mọ ayira. Ookpomhoghan phọ aZihova rakumuan ni omhiịn mọ opamanhạm ni eephọ oḅilhẹ omaạr oḅoonhomhị raraạr igbo awe phọ Enhaạn. AZion Watch Tower and Herald of Christ’s Presence aNovember 15 1895, aphạm ni emhuoghaạph dị eḅẹm mọ “Decently and in Order,” dị ekpasị 1 Korịnt 14:40. Kụ iḅẹm mọ: “Abutelhedom mọ ughaạph ni iboom ilọ oḅoonhomhị ghan araraạr oḅenhị Siosị phọ . . . Eḍighi ni oghoph omhiigha aloor odaphạn araraạr phọ ogẹ bọ ‘siphẹ aḍinyạ iigbia phọ, . . . otughemiọm ghan ayira.’” (Rom. 15:4) Ii, aḍiḅeraạn ophamhanhạm eephọ r’omhaạr oḅoonhomhị araraạr phọ olhegheriom bọ buḅẹl aKristẹn phọ, kụ edi aani siẹn ookpomhoghan phọ aZihova rodon. Esi omaạm, eḍighi maạr dị nạ aghị Ituughạ Otu Okoriom onhọn ookpomhoghan—ghalhamọ enhọn eelhe—nạ kalegheri ni ipẹ kopạm bọ ituughạ phọ ḅilhẹ r’emhuoghaạph phọ kotuughạ bọ. Nạ ka/loghoma mudị nạ ooruen! Iyaạr edi ni dị ketue emiteom muḅọph phọ amuẹn, emuton uwaloor iigbia phọ Enhaạn ḍughụm?—Zeph. 3:9, igẹ dị edi ude.

13. Odaphạn Jems 3:17, eeghe asipuru kụ edị ewạ mọ opuruan loor?

¹³ Idị ewạ mọ ḍighi aani. AZihova rawạ mọ awe phọ odị omhaạr ophạm ‘oḅọph onhụ phọ Uwaloor Iigbia phọ rangọ ghan bọ, loor eephọ phọ epẹ eḅạr bọ [bidị] eḅophoghị.’ (Efẹ. 4:1-3) Esi iduọn phọ puruan loor anạ mọ: ‘Mị ralọgh ghan ni kaphophe muḅọph r’eephọ siẹn ookpomhoghan phọ ḍughụm? Mị asooromhi ni loor ranaghanhạn ghan buphẹ oḍiemhiom bọ ḍughụm? Abunhọn awe kotue ni ubeḍenhọm imhị eḍighi maạr dị mị amhoọgh roopoogh arukumuan siẹn ookpomhoghan phọ ḍughụm? Mị aḍighi ni oye dị raḅon ghan, ḅilhẹ mị aakolhobian ni olhoghonhaạn ghan aḍighaạgh r’okumu ongọ abunhọn ḍughụm?’ (Bạl Jems 3:17.) Eḍighi maạr dị nạ amhiịn riisi dị nạ asughanham, pọ ḅeeḅereghị alhọm uwaloor iigbia  phọ aZihova. Nạ amheera mọ uwaloor iigbia phọ aḅọl raagharạ phọ anạ aḅilhẹ amhoogh roozọ phọ anạ, abumor r’abumarani phọ kophomhoghiạn ni nyinhạ oḅilhẹ omhaghamhị nyinhạ maạr.

14. Odaphạn Kolosị 1:9, 10, ika kụ idị aZihova atughemhị bọ we phọ odị siphẹ oḅẹl okuron asiạ phọ?

¹⁴ Siphẹ oḅẹl okuron asiạ phọ. AZihova akạr kụ apomhoghiạn otughemhị ghan awe phọ odị. (Ps. 32:8) Odị rawạ mọ bidị ophomhoghiạn nyodị, ḅilhẹ orọl k’agee-pọ idiphọ abuuḅi anmụny odị. Iphẹn phọ ke/tue edugh dị itughemhị phọ odị i/lo. (Jọn 17:3) AZihova asighẹ ookpomhoghan abuḅẹl aKristẹn phọ kụ atughemhiọm we phọ odị. (Bạl Kolosị 1:9, 10.) Uwaloor iigbia phọ—“olọgh ḍighaạgh [nwt]” phọ aZizọs aguanhaan bọ—alhoghonhaạn ni kẹn ḍighaạgh bumatuạn phọ. (Jọn 14:16) Angọ bumatuạn phọ onhaghạn aḍughụm Ekpo Onhụ phọ Enhaạn, kụ aḅilhẹ aatughianhạm ghan bidị ibadị araraạr phọ aZizọs aghaạph bọ aḅilhẹ aḍighi, idiphọ ogẹ bọ siphẹ arinyạ aGospel phọ. Olhegheri iyaạr phọ ophọn phọ akparamhị ni omheeraam abuḅẹl aKristẹn phọ ḅilhẹ r’ephomhoghiạn phọ bidị omhoọgh bọ oghị esi Enhaạn, r’Oọny phọ odị, ḅilhẹ r’oniin atum nyoniin.

15. Ighẹn areten kụ edị nạ mamhiịn dị aZihova mamhunhenhi ipẹ odị aghaạph bọ siphẹ Isaiah 2:2, 3?

¹⁵ Siẹn amem mọ ayira. AZihova aghaạph mọ “ekunha asiḍio phọ ipẹ phọ,” awe areelhe kirokirọ kokpiphaany ni otu siẹn eeḅarạph phọ aZihova dị odị katughemhị bidị ilọ areten phọ odị. (Bạl Isaiah 2:2, 3.) Yira romiịn ni dị imiịn phọ ipẹ phọ remunughan. Igey iiseeny mephoph epelheghiom oomo odọ kirokirọ iiḅereghị okpẹ. P’eeghe itughemhị aBaibul dị aZihova rungọ ghan iyira! (Isa. 25:6) Dị eego esi “ebenhẹ phọ asụ bọ olhoghi phọ aḅilhẹ akpẹ oḍuomolhoghi,” odị mupheremhị iyira oboom olhegheri iyaạr phọ odị, dị eego esi arumhuoghaạph r’araghaạph dị edi olhoghi intanẹt r’asividio. (Mat. 24:45) Yira olhoghoma aani ipẹ oyaghirị phọ aJob Elihu alhoghoma bọ, kụ aḅẹm bọ mọ: “Oghẹn otomoghiom kụ aaleeny [Enhaạn]?”—Job 36:22.

16. Nạ kaḍighi ika kụ atue amooghọm aani suọ itughemhị phọ aZihova?

 ¹⁶ Idị ewạ mọ ḍighi aani. Uwaloor iigbia phọ Enhaạn kalhoghonhaạn ni nyinhạ ḍighaạgh orue osighẹ oḍighinhom ipẹ nạ aạl bọ siphẹ Ekpo Onhụ phọ Enhaạn. Kụ iḍighi kụ ḅeeḅereghị alhọm aani idiphọ okọ suọr phọ aaḅereghị bọ mọ: “Utughemhị imhị, Sey Zihova, ilọ eten phọ anạ. Mị katelhe ni siphẹ igey phọ anạ. Ḅophoghị ekpom mọ amhị orue oghiilhaan aḍien phọ anạ.” (Ps. 86:11) Kụ iḍighi kụ, kiọm ghisigh abạl ghan kụ atuughạ ghan Baibul phọ r’arinyạ phọ aZihova mamiteom bọ dị eego esi ookpomhoghan phọ odị. Ii, aḍiigbu phọ anạ ki/ḍighi omhoọgh olhegheri iyaạr bịn. Kuolọ kuphom owol igey phọ siphẹ ekpom mọ anạ kụ atuụgh adaphạn siphẹ aghuḍum mọ anạ. Uwaloor iigbia phọ aZihova kalhoghonhaạn ni nyinhạ ḍighaạgh oḍighi idiphọ phọ. Ewạ mọ loghonhaạn aani kẹn ḍighaạgh bumor r’abumarani phọ. (Hib. 10:24, 25) Eeghe kụ iḍighi? Loor esi dị oomo phọ anyinha eniin phọ eghunotu phọ. Ḅeeḅereghị alhọm aZihova ongọ anạ uwaloor iigbia phọ dị kalhoghonhaạn ghan nyinhạ ḍighaạgh ophagharanhaạn ghan aḍipuru dị eḍuạ k’ekpom mem dị oghị ituughạ ḅilhẹ r’orue oḍighi ghan agey asiamẹnt dị ongọ nyinhạ. Nạ aḍighi ghan iduọn phọ pọ nạ raḅenhị ghan aZihova r’Oọny phọ odị mọ nạ akạr kụ apomhoghiạn “iyool” phọ odị omhạn bọ maạr.—Jọn 21:15-17.

17. Ighẹn areten kụ edị nạ katue aḍeenhaan mọ nạ abakị ni ookpomhoghan phọ aZihova?

¹⁷ Moọny amem, ogina ookpomhoghan phọ ophọn uwaloor phọ Enhaạn kụ raaḅakị bọ bịn kụ kasugha siẹn ade phọ. Kụ iḍighi kụ kiọm ghisigh aḅophoghạn akumuan r’ookpomhoghan phọ aZihova. Ghiighironhaan ephomhoghiạn phọ Enhaạn re/lọgh ghan bọ oye iiseẹny, esi ogbeelhom iiḅi iinhaghạn phọ oḅenhị atorobọ oye dị nạ aazuanhaan. Tuughaạny eephọ phọ r’omhaạr oḅoonhomhị ghan araraạr phọ odị, esi ophophe ghan amuḅọph siẹn ookpomhoghan phọ. Kụ alher ghan rurụ angọ Ogbogh Otomoghiom mọ anạ esi omhooghọm aani asuọ oomo aroopoogh itughemhị phọ odị amiteom bọ. Bịn ghalhamọ aḅirinhi phọ aSetan rasi eekunha rodon, nạ ka/moọgh iyaạr oghiilhaan. Kparipẹ ghụn, r’akpọ oḅio nạ kameerạ aani ni agạ abuẹn oḅạr bọ, oḅilhẹ rokumuan r’ookpomhoghan phọ aZihova.