1. Ukwayu Jakristu m’ulimo batizo umedere nitimo ang’o?

NYO idaru limo batizo? Ka eyo, eno idaru nyutho kamaleng’ i wang’ dhanu mange nia itie ku yioyic i Yehova man itie ayika nitimo ire karacelo ku dilo pare. * Yioyic m’itie ko i Yehova ucikere nidoko tek. Bende, kwayu imediri nibedo ku genogen ma lee nia Yehova ubetio ku dilo pare tin eni.

2-3. Kite pa Yehova ma kani m’ubenen kamaleng’ i dilo pare tin eni?

² Tin, ayi ma Yehova ubetelo ko wi dilo pare ubenyutho kite pare ma beco, lembakeca pare, man cik mi kurajo m’ebemito walubi. Wakenenu kite pa Yehova adek m’ubenen kamaleng’ i dilo pare.

³ Mi kwong’o, Yehova mbe kud akoyakoya. (Tic. 10:34) Mer pa Yehova ucwale nimio Wode “ni jamgony ni dhanu ceke.” (1 Tim. 2:6; Yoh. 3:16) Yehova ubetio ku dhanu pare pi nirweyo lembanyong’a ni ng’atu moko ci m’utie ayika niwinjo. Kumeno re m’ebekonyo dhanu ceke m’umaru ninwang’u bero mi jamgony kara gibothi. Mir ario, Yehova maru lembe m’upangere cuu man ku kwiocwiny. (1 Kor. 14:33, 40) Pieno, wang’ei nia jutic pare gibetimo ire i ungu m’upangere cuu, man gitie ku kwiocwiny i kindgi. Mir adek, Yehova tie Japonjo ma dit. (Isa. 30:20, 21) Pi thelembe maeno re ma dilo pare timo kero niponjo dhanu ku Biblia ma tie Lembe pare, nik’ebed i cokiri kunoke i tic mi rweyo lembanyong’a. Jukristu mi cokiri mi rundi ma kwong’a ginyutho kite pa Yehova adek maeno nenedi? I rundi ma tin ke dhanu pa Yehova ubenyutho kite maeno nenedi?  Tin tipo maleng’ copo konyi nenedi kinde m’ibetimo karacelo ku dilo pa Yehova?

4. Nimakere ku Tic mi Jukwenda 1:8, Yesu ung’olo ni julub pare nia gitim ang’o, man ang’o ma bikonyogi?

⁴ I rundi ma kwong’a. Rwonglembe ma Yesu ubed urweyo uketho dhanu dupa gibedo ku genogen. (Lk. 4:43) Eng’olo ni julub pare nia gimediri ku tic maeno m’ecaku dhoge, niwacu gimii lembatuca “cil i tung’ ng’om.” (Som Tic mi Jukwenda 1:8.) I andha, gicopo timo ngo tic maeno ku tego migi gigi. Yesu ung’olo nia ebimio igi jakony, ma tie tipo maleng’; gibino ku yeny mi kony maeno.​—Yoh. 14:26; Zek. 4:6.

5-6. Tipo maleng’ ukonyo julub pa Yesu nenedi?

⁵ Julub pa Yesu ginwang’u tipo ma leng’ i ceng’ mi Pentekoste i oro 33 R.M. Tipo maleng’ne ukonyogi nicaku rweyo lembanyong’a ndhundhu; e i ng’ei saa ma nok kende ci, dhanu ma dupa giyio lembanyong’a. (Tic. 2:41; 4:4) Kinde ma dhanu caku nyayu ragedo i kumgi, giweko ngo lworo ucergi nirweyo, ento gikwayu kony i bang’ Mungu. Girwo kumae: “Dong’ imi ni jumiru peri ya giyer lembe peri ku tegocwiny kwa.” E i ng’ei rwo maeno, tipo maleng’ uromogi, man gimediri ‘niyero lembe pa Mungu ku tegocwiny.’​—Tic. 4:18-20, 29, 31.

⁶ Julub pa Yesu ginwang’iri ku peko mange bende. Ku lapor, wend kitabu m’adola ubino nok. Gibino mbe ku buku m’ukoro i Lembagora calu ma watie ko tin eni. Bende, ugam ukwayu julub girwei ni dhanu ma weco dhok ma tung’ tung’. Kadok gibino ku peko maeno de, re ginyutho amora ma lee dit, man gitimo lembe ma nwang’u copo nen nia ve timere ngo. Pi oro ma romo 30, nwang’u dong’ girweyo lembanyong’a “i giracwia pa Mungu ceke the polo.”​—Kol. 1:6, 23.

7. I oro 1881, ang’o m’ukonyo jutic pa Yehova ning’eyo gin m’ekwayu i bang’gi, man gitimo ang’o?

⁷ I rundi ma tin. Yehova ubemedere asu nitelo wi dhanu pare, man ebemio igi kero ma gitim ko yeny pare. Asagane ebemio igi telowic nikadhu kud i Biblia, ma tipo pare maleng’ re m’utelo wi dhanu m’ukiewe. I Biblia re ma jukiewo pi tic pa Yesu, man wanwang’u bende lembang’ola m’emio ni julub pare nia gimediri ku tic m’ecaku dhoge. (Mat. 28:19, 20) Con i Wang’e i dwi mir 7, oro 1881, Otkur ma Wiw ular uyero nia, “Yehova ung’iowa ngo kara wanwang’ yung i wang’ dhanu man walony, ento kara watii ku gin ceke ma watie ko pi nirweyo lembanyong’a.” Nyathibuku moko ma juwodho i oro 1919, ma thiwie bino, Ni ju ma jumio tic i korgi, uyero kumae: “Tic tie lee m’ukwayu jutim, ento etie tic pa Rwoth, man en re m’ebimio iwa tego mi timo tije.” Calu Jukristu mi rundi ma kwong’a, umego maeno de ginyutho amora man girweyo ku kero migi ceke pilembe ging’eyo nia tipo maleng’ bikonyogi nirweyo ni dhanu mi kite ceke. Tin wan bende watie ku genogen nia tipo maleng’ bikonyowa.

8-9. Dilo pa Yehova utio ku bodho ma kani ma tung’ tung’ pi nimewo lembanyong’a?

⁸ Dilo pa Yehova ugam utio ku jamtic ma tung’ tung’ pi nimewo lembanyong’a. I oro ma con, jubed jutio ku girasoma ma juwodho iwi karatasi, Foto-dram mi cwic, fonograf ma jubed juriwo korolembe i wie, mutukari ma jutwio uparle i wie, jubed julubo bende korolembe i radio, jubed jutio ku ordinater, man Internet. Bende, dilo pa Yehova ubetimo kero niloko piny i dhok dupa nikadhu m’i wang’e zoo. Pirang’o? Kara dhanu mi kwonde ceke giwinj lembanyong’a i dhok migi. Yehova umbe kud akoyakoya; elar ewacu nia jubirweyo lembanyong’a “ni thek ceke ku suru ku dhok man dhanu.” (Nyu. 14:6, 7) Ebemito dhanu ceke giwinj rwonglembe mi Ker.

 ⁹ Ka dong’ dhanu ma nwang’u tie tek, calu ve ju ma gikwo i ot mir etaj ma dongo ma dhugang’ne bedo atwiya kunoke jukuro akura ke? Kara dhanu maeno ma pol giwinj rwonglembe mi Ker, Yehova ukonyo dilo pare nicaku tio kud ayi ma tung’ tung’ mi rweyo lembanyong’a. Ku lapor, i oro 2001, Guriri m’utelowic uyio nia umego ku nyimego mi ng’om mi France gicak tio ku prezantwar man ku jamtic mange ma jukpero buku i wie. I ng’eye, umego mi kabedo mange bende gicaku rweyo i ayi maeno. Bodhone umio adwogi ma ber. I oro 2011, jucaku ayi mange ma nyen mi rweyo lembanyong’a i adhura ma dongo. Jutime wang’ ma kwong’a i ng’om mir États-Unis, i adhura mi New York City ma tie kaka ma dhanu bepong’ lee i ie. I orone ma kwong’a, jumio buku 102 129 ku gazeti 68 911 ni dhanu. Man dhanu ma wendgi 4 701 gikwayu ponji mi Biblia! Ubenen kamaleng’ nia Yehova utio ku tipo pare maleng’ pi nikonyo ticne. Pieno Guriri m’utelowic uyio nia umego ku nyimego mi ng’om zoo gicak tio ku prezantwar man jamtic mange mi kpero buku.

10. Wacopo timo ang’o kara wadok jubodho i tic mi rweyo lembanyong’a man i ponji?

¹⁰ Lembe m’icopo timo. Yehova ponjowa nikadhu kud i coko mwa mi Jukristu; dong’ tii ku lembe m’icukuponjo i cokone. Bed irwei wang’ ma pol kud ungu peri mi rweyo lembanyong’a. Umego ku nyimego mir ungu peri gicopo konyi kara ibed jabodho mi rweyo lembanyong’a man mi ponjo dhanu; lapor migi ma ber copo mio bende amora i kumi. Mediri asu nirweyo kadok inweng’iri ku peko. Calu ma giragora ma thiwiwec maeni ucungo i wie uwacu, wabetimo yeny pa Mungu ku tego mwa giwa ngo, ento tipo maleng’ re m’ubemio iwa tego. (Zek. 4:6) Wabed ku genogen nia Mungu bimio iwa tego ma watie ku yenyne pilembe wabetimo tic pare.

11. Guriri m’utelowic mi rundi ma kwong’a gidiko cing’gi nenedi pi niketho dhanu pa Mungu gitim tic i kite m’upangere cuu?

¹¹ I rundi ma kwong’a. Guriri m’utelowic m’ubino i Yerusalem gitimo tic i acel pi niketho lembe uwoth i ayi m’upangere cuu, man  kara dhanu pa Mungu gikwo ku kwiocwiny i kindgi. (Tic. 2:42) Ku lapor, i kum oro 49, Jukristu ma dupa gibino ku paru m’ukoc iwi lembe m’uneno timo yaa; jumoko ubed unwang’u nia kara ng’atini utim ni Yehova, ukwayu jutim yaa i kume. Pieno, tipo maleng’ utelo wi Guriri m’utelowic kara ging’ii i lembene. Ka nwang’u cokiri umedere nibedo ku nen m’ukoc iwi lembe maeno, nwang’u tic mi rweyo lembanyong’a utimere cuu ngo. Kadok nwang’u jukwenda ku judongo ma gitimo karacelo kugi gibino Juyahudi de, re giweko ngo lembsuru man ju m’umoko i kum surune ucergi. Ento giyenyo i Lembe pa Mungu man gikwayu tipo maleng’ utel wigi kara gimak yub ma cuu. (Tic. 15:1, 2, 5-20, 28) Lembuno ukelo adwogi ma kani? Yehova upoko mugisa iwi yub ma gimaku, uketho cokiri umedere nibedo i acel ku kwiocwiny, man gimediri asu nirweyo lembanyong’a.​—Tic. 15:30, 31; 16:4, 5.

12. Tin lembang’o m’unyutho nia lembe mi dilo pa Yehova upangere cuu man etie ku kwiocwiny?

¹² I rundi ma tin. Dilo pa Yehova ukonyo dhanu pa Mungu kara lembe migi upangere cuu, man kara gibed ku kwiocwiny. I oro 1895, gazeti Otkur ma Wiw mi Sayuni man Jayer pi bino pa Kristu mi nindo 15 mi dwi mir 11 ubino ku thiwiwec moko ma juwodho kud i 1 Jukorinto 14:40, m’uyero nia ‘Cu man kakare.’ Thiwiwecne ukoro kumae: “Jukwenda gikiewo lembe dupa ni cokiri mi rundi ma kwong’a iwi kite m’ukwayu jupang ko lembe cuu . . . Etie lembe ma pire tek lee nia wawor lembe ceke ‘ma yang’ ugore pi ponji mwa.’” (Rum. 15:4) Andha, tin dilo pa Yehova ubetimo tic ma tek pi niketho lembe uwoth i ayi m’upangere cuu i cokiri man kara kwiocwiny ubed unuti tap calu m’ubino i rundi ma kwong’a. Wakemak lapor moko: kan icidho i cokiri mange kunoke i ng’om mange pi nilubo ponji mi Otkur ma Wiw, ibinwang’u jubetelo wi ponjine i ayi ma rom man jubeponjo thiwiwec de m’urombo. Wang’ acel ibinweng’iri ve ini cokiri peri! Tipo maleng’ pa Mungu kende re ma copo ketho dhanu ubed i acel i ayi ma kumeno​—Zef. 3:9.

13. Wec ma nwang’ere i Yakobo 3:17 ubecwaluwa nipenjara ku penji ma kani?

¹³ Lembe m’icopo timo. Yehova ubemito  dhanu pare gibed i ‘acel i tipo kud amora i twic mi kwiocwiny.’ (Ef. 4:1-3) Pieno, kepenjiri kumae: ‘Nyo abed aii niketho kwiocwiny man bedo i acel i cokiri? Nyo abed aworo ju m’ubetelo wiwa? Nyo jumange gicopo bino i bang’a yot yot, akecane kan atie ku rwom i cokiri? Nyo abed aworo saa man atie ayika nikonyo jumange?’ (Som Yakobo 3:17.) Tek inwang’u nia kaka moko tie m’icopo yiko, kwai tipo maleng’ ukonyi. Kan ibeweko tipo maleng’ ukonyi niloko kura man timo peri, umego ku nyimego gibimeri lee man piri bibedo tek i igi.

14. Nimakere ku Jukolosai 1:9, 10, Yehova utio kud ang’o pi nikonyo dhanu pare mi rundi ma kwong’a kara ginyang’ i “ng’eyong’ec mi yeny ma ie yenyo?”

¹⁴ I rundi ma kwong’a. Yehova umaru niponjo dhanu pare. (Zab. 32:8) Emito ging’eye, gimare man gikwo nja calu nyithindhe ma jumer. Lembe maeno ceke copere ngo ka nwang’u eponjogi ngo. (Yoh. 17:3) I rundi ma kwong’a, Yehova utio ku cokiri mi Jukristu pi niponjo dhanu pare. (Som Jukolosai 1:9, 10.) Gin mange m’etio ko ubino tipo maleng’ ma tie “jajuk,” niwacu jakony ma Yesu ung’olo pire igi. (Yoh. 14:16) Tipo maleng’ uketho ginyang’ i Lembe pa Mungu, man ukonyogi nipoi pi lembe ceke ma Yesu uyero man m’etimo, ma i ng’eye judok jukiewo i buku mir Injili. Ng’eyong’ec maeno utielo yioyic mi Jukristu mi rundi ma kwong’a, man uketho mer ma gimaru ko Mungu, Wode man ma gimariri ko i kindgi umedere.

15. Ineno nia Yehova ubepong’o lembang’ola pare ma nwang’ere i Isaya 2:2, 3 nenedi?

¹⁵ I rundi ma tin. Yehova ular uewo nia “i nindo ma cen,” niwacu i nindo mi kajik, dhanu mi thek ceke gibicidho ba “got pare,” niwacu gibidikiri ku jutic pare mandha, kara eponjgi ku yo pare. (Som Isaya 2:2, 3.) Wabeneno kamaleng’ kite ma lembila maeno ubepong’o ko.  Tin ubenen terere nia thier mandha ukoc bor ku kit thier moko ci mi ndra. Bende, Yehova ubemio ponji lee dit m’ujengere iwi Biblia ni dhanu pare! (Isa. 25:6) Nikadhu kud i bang’ ‘jamiru mandha man ma riek,’ Yehova ubemio iwa cam mi tipo i kadhiri ma lee dit, man ebimie i ayi ma tung’ tung’. Ku lapor, wacopo somo thiwiwec dupa, waromo winjo korolembe, man wacopo neno video. (Mat. 24:45) Watie ku nen ma rom ku pa Elihu ma jarimb Yob m’uyero kumae: “Ng’a ma japonji ma calu [Mungu]?”​—Yob 36:22.

16. Icopo timo ang’o kara inwang’ bero mi ponji pa Yehova?

¹⁶ Lembe m’icopo timo. Tipo pa Mungu bikonyi nitio ku lembe m’ibesomo man m’ibeponjo i Biblia i kwo peri. Pieno, rwo calu jagor Zaburi m’urwo kumae: “Ponja ku yo peri, E Yehova; abiwotho ku lemandha peri: rib adundena kum lworo nyingi.” (Zab. 86:11) Bende, mediri nicamu cam mi tipo ma Yehova umio iwa nikadhu kud i Biblia man dilo pare. I andha, lembakeca peri utie ngo kende kende ninwang’u ng’eyong’ec, ento ibemito lemandha umond i adundeni, man itii kude i kwo peri. Tipo pa Yehova romo konyi nitimo kumeno. M’umedo maeno, ibemito iketh cwiny umego ku nyimego peri. (Ebr. 10:24, 25) Pirang’o? Pilembe gitie wedi peri mi tipo. Dong’ kwai tipo maleng’ pa Mungu ukonyi idwok jibu m’uai kud i adundeni i coko; man kan itie ku theng ponji moko, miyiri zoo pi nitime. I yo maeno re m’ibinyutho ni Yehova giku Wode nia imaru “rombe” migi ma pigi tek i igi.​—Yoh. 21:15-17.

17. Icopo nyutho nenedi nia imoko kikiki i kum dilo pa Yehova?

¹⁷ Ceng’ini eni, dilo ma bidong’ iwi ng’om utie ma tipo pa Yehova ubetelo wie kende. Pieno, tim tic kud amora karacelo ku dilone. Calu Yehova, nyuth mer m’umbe akoyakoya nwang’u iberweyo lembanyong’a ni dhanu ceke. Mar lembe m’upangere cuu man mar kwiocwiny calu Mungu, ma nwang’u ibeketho ko cokiri ubed i acel man ku kwiocwiny. Winj Japonji peri ma dit nwang’u ibecamu cam mi tipo m’ebemio iri. Tek itimo kumeno, ibibedo mbe ku lworo kinde ma ng’om pa Sitani bitundo i ajikine. Ento ibicungo ku tegocwinyi i kind dhanu m’ubetimo ni Yehova ku bedopwe i dilo pare.