1. Ikor no micada kita to paputisem papadotoc midemak to maanan hani?

MAHAREKAYTO kiso micada to paputisem han? Ano hatiraay i, pakapapotalay kiso paihkal to pakasoˈlin ci Yihofaan, makahi mikapot to likakawa Ningra. * Mankora, ikor no micadato kiso to paputisem papadotoc palahad to pakasoˈlin ci Yihofaan, wa mitongal ko pakasoˈlin to misaka dademakan ni Yihofa koniya likakawa palaˈosi to araaw Ningra.

2-3. O pakayraan ni Yihofa mikayat to likakawa Ningra paihkalay to manan tolo a capeling ningra hani?

² O pakayraan ni Yihofa mikayat to likakawa Ningra paihkalay to capeling ningra, araaw ato paliniyan. Nengnengen ita, samanay ko likakawa no Kawas paihkal to tolo a mikiriwiˈay capeling.

³ Saka 1, ‘cowa pisakakinih ko Kawas.’ (Dmak 10:34) Tangongolay ko olah Ningra to tamdaw, miocor to wawa Ningra ‘milidong to polong a tamdaw.’ (1 Timoti 2:6; Yohani 3:16) Miocorayho ci Yihofa to finawlan Ningra pasayra i polong a tamdaw milasil to ngaˈayay lihaf, mihaen o makahiyay mitengil a tamdaw iraay ko toki pakayni sapatefoc a malidong. Saka 2, masieroday ko demak ni Yihofa, micowatay to rihaday. (1  Korinto 14:33, 40 ato roma pihongyak) Mihaenay, malikakawaay ko midokoay Cingranan a tamdaw, rihaday a malacecy. Saka 3, o ‘kasapaan a singsi’ ci Yihofa. (Isaya 30:20, 21) Mihaenay, o likakawa Ningra pakayniay saˈopo ato mitosilay a demak pasifanaˈ to tamdaw to Fangcalay Cudad. Oniya lalakaw wa milengo, saka 1 hahekalan a kasakopang no Krisciyang samanay paihkal toniya tolo capeling  ni Yihofa? Samanay ko aniniyay a Krisciyang? Anini, matayal kita i likakawa no Kawas, wa ngaˈay mitiˈer to fangcalay saocor samaan ko pidemak?

4. Itini Dmak 1:8, palimoˈotan ni Yis ko nisawawaan samaan ko pidemak hani? Wa milifok ko nisawawa to manan a sapadama?

⁴ O patenakan ni Yis a lihaf i saka 1 hahekalan pairaay to hatokel no polong a tamdaw. (Luka 4:43) Palimoˈotan ningra ko nisawawaan padotoc a mitosil, ‘tahira i samaraayay a pala.’ (ˈOsien ko Dmak 1:8.) Cowa ko mamitiˈer ko nisawawaan to ˈicel no niyah a milaheci toniya ˈinorong. Misaaliay cangra to fangcalay saocor, oya misowalan ni Yis a “padamaay,” ngaˈ malaheci ko mitosilay a tayal.—Yohani 14:26; Cikariya 4:6.

5-6. O fangcalay saocor padamaay to saka 1 hahekalan a Krisciyang maremoay ko maanan pasangaray hani?

⁵ Itini 33 miheca kocinsic, milifokay ko nisawawaan to fangcalay saocor, tangsolay misatapang mitosil, kalikiyay ira ko pinacaˈol a tamdaw micadaay to ngaˈayay lihaf. (Dmak 2:41; 4:4) Ikor, micadaay to sapalak ko nisawawaan ni Yis, kawra cowa ka pakayni katalaw a sawad sato mitosil. Mingitangitay to sadama no Kawas, sanay mitolon: ‘Nanay . . . pafelien ko koli to timolo, ho ngaˈay kami padotoc a milasil to sowal Iso.’ Ikor, matomesay to fangcalay saocor cangra, padotocay ‘timolo milasil to sowal no Kawas.’—Dmak 4:18-20, 29, 31.

⁶ Misiˈayawayho ko nisawawaan ni Yis to roma sapalifet, tinakoen, cowa ka ˈaloman ko mitatiliday to Fangcalay Cudad itiya, cowa ka lecad anini adihayay ko sapitadtad to Fangcalay Cudad a mitepangan. Roma i, pasayraay i cowa kalecad ko sowal a tamdaw mitosil. Soˈlin mahaen, oniya fanekfekay a mitosilay madangaray nangra ko pasangaray a demak. Itini pina poloˈ miheca, o ngaˈayay lihaf ‘mapatenakto i polong no tamdamdaw.’—Kolosay 1:6, 23.

7. ˈAyaw no 100 miheca, mikicowaay ko finawlan ni Yihofa milifok to sakayat no Kawas? Ikor samanay ko demak nangra?

⁷ Anini lintad. Padotocay ci Yihofa mikayat to finawlan Ningra, pafeli to ˈicel cangranan midemak to tayal Ningra. Anini, sakakaay sakayat no Kawas mikitiniay Fangcalay Cudad. O Fangcalay Cudad pakaynian no Kawas i fangcalay saocor mikayat ko tamdaw a mitilid, itini Fangcalay Cudad maasipay ita ko mitosilay a tayal ni Yis ato limoˈot ningra to nisawawaan. Palimoˈotan ni Yis ko nisawawaan padotoc a mitosil. (Matay 28:19, 20) Itini 1881 miheca 7 folad, somowalay ko Mikecolay: “Matahidang kita ato mapasimal cowa ko mamilifok to adihayay dafong, o mamisarocod a milasil to ngaˈayay lihaf.” 1919 miheca tepangen cima ko patoroden to tayal no tatapangan? (Padaka) kihpicay cudad sanay ko sowal: “Soˈlin pasangaray ko tayal, kawra o tayal no tatapangan konini, mitadiˈec to ˈicel Ningra, oha mamalaheci ita midemak.” Oniya salikaka malecaday to saka 1 hahekalan a nisawawaan timolo, fanekfek a mitosil, pakasoˈlin to papadama ko fangcalay saocor pasayra i masakenakenaay tamdaw a milasil to ngaˈayay lihaf. Anini, iraay ko malecaday a pakasoˈlin nomita.

8-9. Misaka dademakay ko likakawa ni Yihofa to maanan a pakayraan mitosil?

⁸ O likakawa ni Yihofa tano ciepocay a lalosidan milasil to ngaˈayay lihaf no Hongti Kitakit, oniya lalosidan mahawpay ko cudad, “Ika no Pisangaˈ to Hekal,” laciw, palapaan a tosiya, tingtay, ato tingnaw wanglo. Roma i, mihongyakan no likakawa no Kawas ko lalakaw malo adihayay sasowalen, o kaadihay no sowal awaayho i salakat, araaw i ngaˈay ko masakenaay tamdaw tano niyah a sowal mitengil to ngaˈayay lihaf. Cowa pisakakinih ci Yihofa, paˈayaway Cingra papatenaken ko ngaˈayay lihaf i ‘kasakitakit, ngasaw, sowal ato  finacadan a tamdaw.’ (Paˈarawan 14:6, 7) Tokel Ningra matengil no polong a tamdaw ko lihaf no Hongti Kitakit.

⁹ O kitiraan no roma tamdaw cowa ka ngaˈay micomod ko potalay tamdaw, hato pasangaray kita mitosil cangranan. Sapadamaaw to mahaenay tamdaw, mikayatan no Kawas ko likakawa Ningra tano masakenaay a pakayraan a kaˈalomanan a pisawacay. Tinakoen, 2001 miheca mihaydaay ko Malohemay Malitengay i Congpo to itiniay Frans a salikaka tano sapisawacay a paliding ato sapaˈaraw a lalosidan. Ikor, roma pala a salikaka misatapangay misaka dademak toni faelohay pakayraan mitosil, tada ciepocay. 2011 miheca, itini Padaka Niwyok misatapangay kami to cecay faelohay pakayraan mitosil, saka cecay miheca mapalilamay ko 102,129 a cudad ato 68,911 a casi, 4,701 ko tamdaw panganganay minanam to Fangcalay Cudad. Mahapinangay, misaka dademakan ni Yihofa ko fangcalay saocor midama toniya demak. Mihaenay, ikorto mihaydaay ko Malohemay Malitengay i Congpo to icowacowaay a salikaka tano sapisawacay a paliding ato roma sapaˈaraw a lalosidan mitosil to tamdaw.

10. Sapacakataw to inaneng mitosil, sasamaan ko hademak ita hani?

¹⁰ Sasamaan ko demak iso. Saka dademaken ko mananamay i saˈopo a inaneng mitosil, miceridho kalacafay to kasakapot iso a mitosil. O salikaka i kasakapot papadama tisowanan malo ngaˈayay a mitosilay, o taˈarawan nangra wa ngaˈay pakalalok tisowanan. Ano o mananto a pasangaray ko malifaay, aka a misawad mitosil. Malecad o lalangian a sinael, ngaˈay kita midemak to araaw no Kawas, cowa ko ˈicel no niyah ko mitiˈeran, o fangcalay saocor Ningra ko mitiˈeran. (Cikariya 4:6) O tayal no Kawas konini, oha papadama Cingra kitaanan.

11. Saka 1 hahekalan a malohemay malitengay i Yirusalim samanay padama to finawlan no Kawas padotoc a makelc a rihaday?

¹¹ Saka 1 hahekalan. Malohemay malitengay i Yirusalim malacafayay a matayal, padama to finawlan no Kawas makelec a rihaday. (Dmak 2:42) Tinakoen, madeng itini 49 miheca, o roma Krisciyang macacoliay to mikeritay a demak. Ano eca ka saysayen koniya demak,  o mamaliwasak ko kasakopang, o mamacara ko mitosilay a demak. Orato, itini sakayat no fangcalay saocor malalengoay ko malohemay malitengay toniya demak. O malohemay malitengay i Yirusalim soˈlin o Yutaya tamdaw maemin, kawra cowa ka fiyor no pinangan no Yutaya anca miowingay to mamikerit a tamdaw, ao pasayraay i Sowal no Kawas ato fangcalay saocor micangacang to sakayat. (Dmak 15:1, 2, 5-20, 28) Telocto, o misaˈosiyan nangra milifokay to sapalemed ni Yihofa, padotocay makelec a rihaday ko kasakopang, ngaˈayho padotoc fanekfek a mitosil.—Dmak 15:30, 31; 16:4, 5.

12. Hano mafanaˈ kita to masieroday ko demak no likakawa no Kawas anini, micowatay to rihaday?

¹² Aniniyay lintad. Likakawa no Kawas adihayay ko limasmas, padama to finawlan no Kawas rihaday malacecay. 1895 miheca 11 folad 15 romiˈad Cion a Mikecolay ato Kairaan ni Kristo (Padaka) misalalangiay to saka 1 Korinto 14:40 mitilid to cecay lalakaw, lalangian i “Sakarikec ato Kasarayray,” masowalay no lalakaw “pakayni . . . kasarayray, adihayay ko milengoan no tarokos to salakatay a kiyokay . . . tooren ita ko ‘pakayniay sapasifanaˈ kitaanan a tiliden’ a sowal midemak, o sarihadayay a pakayraan.” (Loma 15:4) Anini, masieroday ko limasmas no likakawa no Kawas, misarocod palecad to finawlan no Kawas to saka 1 hahekalan a Krisciyang mitafo to makelecay a rihaday. Tinakoen, ano tayra kiso i roma kasakopang, anca tayra i roma kitakit mirienag to picekiw to Mikecolay, cowa ko mamafahal kiso, wa ira ko rihadayay, samanen ihkalay ko kafanaˈ iso to pakayraan no saˈopo, mafanaˈay to o manan a lalakaw ko cacekiwen. Edengan ko fangcalay saocor no Kawas ko palaˈosiyay to mahaenay a demak.—Cifaniya 3:9 ato roma pihongyak.

13. Pakayni Yakop 3:17, ngaˈayay miharateng kita to maanan a salicay?

¹³ Sasamaan ko demak iso. Mitokelay ci Yihofa to finawlan Ningra ‘pakayni rihaday a makelec, mitadiˈec to fangcalay saocor a malacecay.’ (Ifiso 4:1-3) Mihaenay, haratengen ko laenoay salicay: ‘Itini kasakopang micowatay kako to makelecay, mararihaday to tao han? Makahiyay kako midofdof to mikeriday a tamdaw han? Miharateng ko salikaka o ngaˈayay pakasoˈlinen a tamdaw kako han? Ano ira ko ˈinorong ako, madimadiay kako a midemak han?  Mitooray kako to toki, makahi a padama to tamdaw hokira?’ (ˈOsien ko Yakop 3:17.) Ano mahapinang iso iraay ko sasalofen no niyah, cangacangen ko Kawas pafeli to fangcalay saocor. Midofdof kiso to fangcalay saocor misalof to capeling no niyah, wa matongal ko olah ato pikangodo no salikaka tisowanan.

14. Itini saka 1 hahekalan, samanay ci Yihofa padama to finawlan ningra milifok to ‘matatodongay a sifanaˈ?’ (Kolosay 1:9, 10)

¹⁴ Saka 1 hahekalan. Maolahay ci Yihofa pasifanaˈ to finawlan Ningra. (ˈOlic 32:8) Mitokelay Cingra mafanaˈ cangra Cingranan, maolah Cingranan, hanaca malo wawa Ningra, ngaˈay tahadaˈoc a maˈorip. Oniya kihecod wa pakayni sapasifanaˈ ni Yihofa a malaˈosi. (Yohani 17:3) Itini saka 1 hahekalan, pakayniyan ni Yihofa a kasakopang no Krisciyang pasifanaˈ to finawlan Ningra. (ˈOsien ko Kolosay 1:9, 10.) O fangcalay saocor, oya mikiˈokan ni Yis sapafeli a ‘padamaay,’ taˈangayay ko sapadama. (Yohani 14:16) Padamaan no fangcalay saocor ko nisawawaan cipinang to Fangcalay Cudad, padamaho cangranan miharateng to nanosowal ato demak ni Yis. O sasowalen ato nano demak ni Yis matiliday i ratoh a cudad. Oniya sifanaˈ paˈicelay to pakasoˈlin no saka 1 hahekalan a Krisciyang, mitongalay to olah nangra to Kawas, ci Yisan ato salikaka.

15. Samanay ci Yihofa palaˈosi to sapairasol i Isaya 2:2, 3 hani?

¹⁵ Aniniyay lintad. Paˈayaway ci Yihofa ‘itini salikoray lintad,’ kasafinacadan no kalowa kitakit wa tayra i lotok Ningra, mikapot to matatodongay a pihakelongan, micada to sapasifanaˈ Ningra. (ˈOsien ko Isaya 2:2, 3.) Anini, malaˈosiyay to koniya sapairasol. O matatodongay pihakelongan makiˈayaway ko mararaway a pihakelongan. Kadofahay ko sapatahka ni Yihofa to finawlan Ningra. (Isaya 25:6) Pakayniyan Ningra i ‘madimadiyay citanengay a koli’ mihadak to adihayay sapahaled to pakasoˈlin a  ‘kakaenen,’ mahawpay ko lalakaw, kimad, ika ato tatemikay mangka. (Matay 24:45) O harateng ita malecaday o widang ni Yopu ci Ilihoan, sanay cingra: ‘Cima ko malecaday to Kawas mihaen a pasifanaˈ to tamdaw hani?.’—Yopu 36:22.

16. Itini i sapasifanaˈ ni Yihofa samaan ko pidemak iso ngaˈ padotoc macakat hani?

¹⁶ Wa samaan ko demak iso.  Wa padama ko fangcalay saocor no Kawas tisowanan misaka dademak to mananamay a sifanaˈ. Malecad to mitiliday to ˈOlic a mitolon: ‘Yihofaaw, nanay pasifanaˈen Iso kako to lalan Iso, wa doedoen ako ko soˈlinay kimad Iso a midemak. Nanay padamaen Iso kako misarocod mikangodo to fangcalay ngangan Iso.’ (ˈOlic 86:11) Wa misaˈicel kiso micada to pakayniyan ni Yihofa i sowal Ningra ato mihadakan no likakawa sapahaled to pakasoˈlin no falocoˈ a ‘kakaenen.’ Kawra, o patosokan iso cowa ko pilifok aca to sifanaˈ, pakasoˈlinen ko mananamay iso a kimad, saka dademaken i nokaˈorip. O fangcalay saocor ni Yihofa wa padama kisowanan miremo toniya demak. Roma i, pakalaloken ko salikaka, samanen o paro no lomaˈ iso cangra. (Hipray 10:24, 25) Ngaˈayay cangacangen ko Kawas pafeli to fangcalay saocor, padama tisowanan itini saˈopo mihadak to mikifalocoˈay a sapacaˈof. Ano ciˈinorongay kiso to kimad i saˈopo, ngaˈayay cangacangen ko Kawas padama tisowanan misarocod a midemak. Mihaen ko demak iso paihkalay to tangongolay ko olah to salikaka, o kalimlaan a ‘lopayˈay siri’ ni Yihofa aci Yis cangra.—Yohani 21:15-17.

17. Sasamaan ko hademak iso o madimadiay midama to likakawa ni Yihofa hani?

¹⁷ Cato ka halafin, dengan o makayatay no fangcalay saocor no Kawas a likakawa ko materekay, mansa itini kita mikayatan ni Yihofa a likakawa fanekfek a matayal. Malecad ci Yihofaan cowa pisakakinih, misarocod pasayra kahacecay tamdaw mitenak to ngaˈayay lihaf, mitodong ci Yihofaan micowat to rihaday, itini kasakopang malacecay to salikaka, pasayra i kasapaan a singsi a minanam, misaka dademak to masakenaay a sapasifanaˈ a limasmas Ningra. Mihaen, ano malaˈafoto ko hekal ni Satan i, cowa ko mamatalaw kita. Itini likakawa ni Yihofa wa malacafay kita to madimadiay midoko Cingranan a tamdaw a malidong!