1. ¿Kunsa bautisata cristianonakajj luraskakiñasa?

 JIWASATÏ bautisatäjjstanjja, Jehová Diosar taqe chuym confiyatasa, Jupar serviñ munataswa uñachtʼaytanjja. * Ukampis Diosar jukʼamp confiyaskakiñasawa, Jupaw munañap phoqañatakejj markapar yanaptʼaskaki sasaw confiyañasaraki.

2, 3. Jehová Diosajj kunjamtï markapar yanaptʼki ukanjja, ¿kunjam Diosätapas amuyasi?

² Jehová Diosajj kunjam Diosasa, kunas amtapasa, leyinakapasa ukanakajja, kunjamsa Diosajj jichhürunakan markapar yanaptʼaski ukanwa qhan uñjasi. Jichhajja, Jehová Diosajj kunjam Diosasa ukanakat kimsa uñjañäni.

³ Maya, “Diosajj janiw khitirus yaqhachkiti” (Hech. 10:34). Jupajj munasiñatwa taqe jaqenakar salvañatak Yoqapar khitanïna (Juan 3:16; 1 Tim. 2:6). Jehová Diosajja, markap toqew istʼañ munirinakarojj salvasipjjañapatak suma yatiyäwinak yatiyaski. Paya, Diosajj sumankañ utjayiriwa, taqe kunsa suma ordentʼat luraraki (1 Cor. 14:33, 40). Ukhamajja, markapajj sum apasisa suma organistʼataw serviñapa. Kimsa, Jehová Diosajj Jachʼa Yatichiriwa (Is. 30:20, 21). Ukatwa markapajj tantachäwinakansa, predickasas Bibliampi yatichapjje. ¿Diosan jan yaqhachasirïtapasa sumankañ utjayirïtapasa Jachʼa Yatichirïtapas kunjamsa nayrïr cristianonak taypin uñjasïna? ¿Kunjamsa jichha tiempon uñjasiraki? ¿Kunjamsa espíritu santojj markapamp chika servirinakarojj yanaptʼistu?

4. Hechos 1:8 textorjamajja, ¿kun lurapjjañapsa Jesusajj discipulonakapar mayïna, kunas uk phoqañatakejj yanaptʼaspäna?

⁴ Nayrïr cristianonak tiempona. Jesusajj kuntï yatichkäna ukajja, jaqenakajj kuntï jutïrin katoqapkani ukar confiyapjjañapatakiw yanaptʼäna (Luc. 4:43). Jesusajj kuna lurañtï qalltawaykäna ukanak lurasipkakiñapatakiw discipulonakapar mayïna, uksti ‘aka oraqpachanwa’ yatiyapjjañapäna (Hechos 1:8 liytʼañataki). Jupanakajj janiw chʼamapampikejj uk lurapkaspänti, jan ukasti Jesusajj apayanipjjämaw siskäna uka espíritu santon yanaptʼapampikiw phoqapjjaspäna (Juan 14:26; Zac. 4:6).

5, 6. ¿Kunjamanakatsa espíritu santojj Jesusan discipulonakapar yanaptʼäna?

⁵ Jesusan discipulonakapajja, 33 maran Pentecostés urunwa espíritu santo katoqapjjäna. Ukan yanaptʼapampejj jankʼakiw predicañ qalltapjjäna, mä jukʼa tiemponakwa walja jaqenakajj uka suma yatiyäwinak taqe chuyma katoqasipjjäna (Hech. 2:41; 4:4). Arknaqata uñjasipkäna ukhasa, Jesusan discipulonakapajj janiw ajjsarayasipkänti. Antisas akham sasaw orasipjjäna: “Esclavonakamarus yanaptʼam, ukhamat arunakamat jan ajjsaras parlasipkakiñapataki” sasa. Ukatsti, taqeniw espíritu santomp phoqtʼatäpjjäna, “jan ajjsarasarakiw Diosan arunakapat parlapjjäna” (Hech. 4:18-20, 29, 31).

⁶ Jesusan discipulonakapajj yaqha jan walinakanwa uñjasipjjarakïna. Sañäni, uka tiemponjja Diosan Arupat jukʼa copianakakiw utjäna, janiw jichha tiemponjam Bibliat yatjjatañataki yanaptʼanakas utjkänti. Ukatjja kunayman arutwa yatiyapjjañaparakïna. Ukhamäkchïnsa, kunatï jan lurañjamäkäna ukwa lurapjjäna, mä 30 maranakanakwa ‘oraqpachan yatiyapjjäna’ (Col. 1:6, 23).

7. Pasïr patak maranakanjja, ¿Jehová Diosajj kuntï lurapjjañap munkäna uk kunjamatsa Diosan servirinakapajj yatipjjäna, ukat kunsa jupanakajj lurapjjäna?

⁷ Jichha tiempona. Jehová Diosajja, markaparojj ukhamarakiw jichhajj yanaptʼaski. Ukjja, jilapartejj Biblia toqew katoqtanjja. Ukanwa kuntï Jesusajj aka oraqenkkasajj lurkäna, kun lurañtï qalltkäna ukanakajj qellqata (Mat. 28:19, 20). Julio, 1881 maranjja, Yatiyañataki revistan akham sänwa: “Janiw jiwasarojj jachʼañchasiñasatakisa ni qollqe thaqañasatakis ajllkistuti, jan ukasti kunatï utjkistu ukampi suma yatiyäwinak predicañasatakiw ajllistu” sasa. Ukatjja, 1919 maran mistkäna uka folleton akham sarakïnwa: “Uk lurañajj chʼamjamäkchisa, Tatitunkiwa, jupan yanaptʼapampejj lurañäniwa” sasa (To Whom the Work Is Entrusted). Jupanakajja, nayra cristianonakjamarakiw jan ajjsarasa Diosan arunakap yatiyapjjäna, ‘espíritu santow yanaptʼistani’ sasin confiyasaw jan qarjtasa yatiyapjjäna. Jiwasajj ukhamarakiw espíritu santow yanaptʼistani sasin taqe chuyma confiytanjja.

8, 9. ¿Kuna yanaptʼanakampis Diosan markapajj predicapjjäna?

⁸ Predicañatakejja, Diosan markapajj kunayman suma yanaptʼanakampiw yanaptʼayasipjjäna. Sañäni, qellqatanakampi, gramofononakampi, parlanten autonakampi, “Foto-Drama de la Creación” sat peliculampi, radio toqes yatiyapjjarakïnwa. Jichhasa ukhamarakiw Internetampi yanaptʼayasipjje. Ukhamarusa, walja arunakaruw videonaksa qellqatanaksa tradustanjja, janipuniw kuna organizacionas ukham lurkiti. ¿Kunatsa ukham lurtanjja? Walja jaqenakan Diosan arunakap pachpa arupat istʼapjjañapatakiw ukham lurtanjja. Jehová Diosajj jan yaqhachasir Diosawa. Jupajj akham sänwa: ‘Taqe markankirinakaru, tribunkirinakaru, kunayman parlani jaqenakaru, kunayman  kasta jaqenakaruw predicasini’ sasa (Apoc. 14:6, 7). Diosajj Reinon suma yatiyäwinakap taqe jaqenakan istʼapjjañapwa muni.

⁹ Jachʼa edificionakan jakapki jan ukajj jan puriñjam lugaranakan jakapki uka jaqenakarojj ¿kunjamsa predicaraktanjja? Jupanakaru yatiyañatakejja, Jehová Diosajj mesanakampi carritonakampi predicapjjañapatakiw markapar yanaptʼi. Sañäni, 2001 maranjja, Oraqpachan Jilïr Irpirinakajj Francia markan carritonakampi mesanakampi yatiyapjjañapatakiw aprobapjjäna. Ukajj walpun yanaptʼawayi. 2011 maransti, kawkjanakantï walja jaqenakajj utjki ukan carritonakampi (predicación pública) yatiyañaw Nueva York (Estados Unidos) markan qalltasïna. Ukham yatiyasiñ qalltkäna uka nayrïr maranjja, 102.129 libronaka, 68.911 revistanakaw churasïna, 4.701 jaqenakarakiw Bibliat yatichayasiñatak qellqayasipjjäna. Taqe ukanakajj espíritu santon yanaptʼapampiw lurasïna. Ukatwa Oraqpachan Jilïr Irpirinakajj taqe markanakan carritonakamp yatiyasiñapatak amtawayapjjäna.

10. ¿Kunsa Diosan arunakap sum yatiyañatakejj lursna?

¹⁰ Kunsa jiwasajj luraraksna. Jehová Diosajj tantachäwinakanwa predicañ yatichistu. Ukhamajja, ukarjam predicañatakiw chʼamachasiñasa. Yatiyirejj gruposampiw sarañasaraki, ukhamatwa gruposankirinakajj kunjamsa jukʼamp sum yatiysna uk amuytʼayistani, jupanakan suma luratanakapas chʼamañchtʼarakistaniwa. Jan walinakan uñjaskasasa predicaskakiñasawa. Cheqas Diosan munañapjja, janiw chʼamasampikejj lurksnati, jan ukasti Diosan espiritupampikiw phoqsna, ukwa aka yatichäwitak ajllit textojj amtayistu (Zac. 4:6). Kuntï lurasktan ukajj Diosankiwa, ukhamajj Jupaw uk phoqañatakejj yanaptʼistani.

11. Apostolonakampi jilïr irpirinakampejj ¿kunjamsa Diosan markapan organisatäñapatak yanaptʼapjjäna?

¹¹ Nayrïr cristianonak tiempona. Jerusalenankir apostolonakampi jilïr irpirinakampejja, Diosan markapan sumankaña utjañapatakisa, taqe kun suma organistʼat lurañatakisa, mayachtʼataw trabajipjjerïna (Hech. 2:42). Sañäni, circuncisión toqet 49 maran mä jan waltʼäwejj utjkäna ukhajja, apostolonakampi jilïr irpirinakampejj espíritu santon yanaptʼapampiw  uk askichapjjäna. Congregacionatï tʼaqjjtatäskakïspäna ukhajja, janiw sum predicjjapjjaspänti. Apostolonakampi jilïr irpirinakampejj judiöpkchïnsa, janiw costumbrenakampisa ni kuntï yaqhanakajj yatichapkäna ukampis apayasipkänti. Jan ukasti, Diosan Arupanwa yanaptʼa thaqapjjäna, espíritu santompiw yanaptʼayasipjjarakïna (Hech. 15:1, 2, 5-20, 28). Jehová Diosasti kuna amtarutï puripkäna ukarojj bendisïnwa. Ukatwa congregación taypin sumankañasa, mayachtʼat jakasiñas utjaskakïna. Diosan arunakapsa predicasipkakïnwa (Hech. 15:30, 31; 16:4, 5).

12. ¿Kunatsa Diosan markapan sumankañaw utji wali organistʼatarakiwa sasajj sissna?

¹² Jichha tiempona. Jehová Diosan markapajja, sumankaña utjañapataki, taqe kunas organistʼat lurasiñapatakiw chʼamachasi. Yatiyañataki 15 de noviembre, 1895 revistanjja, 1 Corintios 14:40 textorjam qellqat mä yatichäwiw inglés arut mistüna. Pʼeqeñchäwipajj “Taqe kunsa wali suma yäparu lurapjjam” satänwa. Uka revistajj akham sänwa: ‘Apostolonakajja, nayrïr congregacionarojj organisatäpjjañapatakiw walja kuti ewjjtʼäna. Kunanakatï nayrajj qellqaskäna ukanakajja, jiwasar yatichañatakiw qellqasiwayi, ukhamajj ukarjam luraskakiñasawa’ sasa (Rom. 15:4). Jichhasa ukhamarakiw Diosan markapajj mayachtʼatäñapataki taqe kunas organistʼat lurasiñapatak chʼamachasi. Sañäni, Yatiyañataki Revistat Yatjjatañataki sat tantachäwir yaqha congregacionar sarsna, jan ukajj yaqha markan uka tantachäwir sarsna ukhajja, kunjamsa revistat yatjjatasini, kuna yatichäwitsa yatjjatasini uk yatjjsnawa. Congregacionasanksnasa ukhamwa amuyassna. Cheqas espíritu santon yanaptʼapampikiw Diosan markapajj ukham mayachtʼatäspa (Sof. 3:9).

13. Santiago 3:17 textorjamajja, ¿kunanaksa jisktʼasiñasa?

¹³ Kunsa jiwasajj luraraksna. ‘Espíritu santojj mayachtʼat jakasiñ churkistu ukarjam sarnaqañatak wal chʼamachassna, sumankañan jakasiraksna’ ukwa Diosajj muni (Efes. 4:1-3). Ukatwa akham jisktʼasiñasa: “¿Congregacionan sumankañ utjañapatakisa mayachtʼatäñapatakis yanaptʼasktti? ¿Congregación pʼeqtʼirinakarojj taqe chuymat istʼasktjja? ¿Mayninakajj nayar confiyapjjaspati? ¿Privilegionakanïst ukhajj  confiykayätti? ¿Horasaparut lurañanak phoqtjja, mayninakar yanaptʼañatakis jankʼakïtti?” sasa (Santiago 3:17 liytʼañataki). Ukanakan inas jukʼamp sum lurañatak chʼamachasiñasajj wakischi, ukhamächi ukhajja Jehová Diosaruw espíritu santop mayisiñasa. Jiwasatï suma jaqëñataki espíritu santompi yanaptʼayasiñäni, taqe luratasansa espíritu santompi irpayasiñäni ukhajja, jilat kullakanakajj wal munasipjjestani, wali valoranitwa uñjapjjarakistani.

14. Colosenses 1:9, 10 textorjamajja, ¿kunjamsa Jehová Diosajj ‘munañap sum uñtʼapjjañapatakejj’ nayrïr cristianonakar yatichäna?

¹⁴ Nayrïr cristianonak tiempona. Diosarojj markapar yatichañajj wal gusti (Sal. 32:8). Munat wawanakapajj Jupar uñtʼapjjaspa, munasipjjaspa, wiñay jakasipjjarakispa ukwa muni. Ukatwa Jehová Diosajj yatichistu (Juan 17:3). Nayrïr cristianonakarojj congregación toqew yatichäna (Colosenses 1:9, 10 liytʼañataki). Jilapartejja, Diosajj espíritu santop toqew yatichäna, uka espiritutjja Jesusajj akham sänwa: ‘Diosasti yaqha yanapir churapjjätam’ sasa (Juan 14:16). Uka espirituw discipulonakarojj Diosan Arup amuyañatakejj yanaptʼäna, kuntï Jesusajj siskäna, lurkäna uk amtapjjañapatakis yanaptʼarakïna. Qhepatsti taqe ukanakajj Mateo, Marcos, Lucas, Juan libronakan qellqatäjjarakïnwa. Ukanakat yatjjatañaw nayrïr cristianonakarojj Diosar jukʼamp confiyapjjañapatak yanaptʼäna. Ukarakiw jupanakarojj Diosaru, Yoqaparu, jilat kullakanakar munasiñapatak yanaptʼäna.

15. ¿Kunjamsa Isaías 2:2, 3 textojj jichhürunakan phoqasiski?

¹⁵ Jichha tiempona. Diosan arsutaparjamajja, ‘qhepa urunakan’ taqe markanakaw Diosan qolluparu makatapjjañapäna, ukhamat Jupampi yatichatäñataki (Isaías 2:2, 3 liytʼañataki). Jichha tiemponwa uka profeciajj phoqasiski. Kʼari religionanakat sipansa cheqa  religionaw wali jilanki ukajj qhana amuykayawa. Jehová Diosajj walja yatichäwinakwa churistu (Is. 25:6). ‘Suma phoqeri amuyasir esclavo’ toqew jilarkir manqʼa churistu, mä arunjja kunayman qellqatanaka, discursonaka, videonaka ukat yaqha ukhamanak churistu (Mat. 24:45). Job chachan Elihú sat amigopajja, Diosat akham sänwa: “Janiw khiti yatichirisa jupjamajj utjkiti” sasa. Jiwasajj ukhamarakiw Diosat sissna (Job 36:22).

16. ¿Kunsa Diosar serviñan nayrar sartañatakejj lursna?

¹⁶ Kunsa jiwasajj luraraksna. Espíritu santow Bibliat kuntï liytʼkañäni yatjjatkañäni ukarjam sarnaqañasatak yanaptʼistani. Salmistjamaw Jehová Diosar akham sasin mayisiñasa: “Tatay, thakimay uñachtʼayita, jan saraqtas arkañajjataki. Chuymajjarusti sutim [jachʼañchir] tukuyam” sasa (Sal. 86:11). Ukhamasti, Diosan Arupsa, kuntï Diosajj markap toqe churkistu uka qellqatanaksa liyiskakiñasawa, yatjjataskakiñasawa. Ukampis janiw aleqak yatjjatañasäkiti, jan ukasti chuymasaruw katoqañasa, ukatsti ukarjamaw sarnaqañasaraki. Uk lurañatakejj Diosan espiritupaw yanaptʼistani. Jilat kullakanakarus chʼamañchtʼañasarakiwa, jupanakaw Diosar serviñan familiasajja (Heb. 10:24, 25). Tantachäwinakan taqe chuyma arstʼañatakisa, mä asignación sum phoqañatakisa Jehová Diosaruw espíritu santop mayisiñasa. Jiwasatï ukham lurañäni ukhajja, Jehová Diosampin Jesusampin ovejanakapar munasitaswa uñachtʼayañäni (Juan 21:15-17).

17. ¿Kunjamsa Jehová Diosan markapar taqe chuyma yanaptʼatas uñachtʼaysna?

¹⁷ Mä jukʼa tiempotjja, Jehová Diosan espíritu santopampi irpata markakiw aka oraqen jiltʼjjani. Ukhamajja, Diosan markapampi taqe chuyma trabajiñäni. Jehová Diosat yateqasisa munasiñampi jan khitir yaqhachasa suma yatiyäwinak taqe jaqenakar yatiyapjjañäni. Congregacionan mayachtʼatäñapatakisa sumankañ utjañapatakisa Jehová Diosat yateqasipjjarakiñäni. Jachʼa Yatichirisarusa kunanaktï yatichkistu ukanakarus istʼapjjarakiñäni. Ukhamtï lurañäni ukhajja, Supayan apnaqat akapachajj tukjatäkani ukhajj janiw ajjsarkañäniti. Jan ukasti Jehová Diosar jan jitheqtas servipki uka marka taypinkañäniwa.