1. Kii mut a nlama ke ni bisu i boñ i mbus sôble yé?

BAA u yé nsôblege? Ibale hala, wee i kel u bi sôblana u bi unda i bisu bi bôt le u nhémle Yéhôva ni le u yé bebee i sal ni ntôñ wé. * Ñ, u nlama kônde lédés hémle yoñ. U nlama ki boñ biliya le i bôdôl u gwé le Yéhôva a ngwélél ntôñ wé len inyu gwel nson wé, u kônde hol.

2-3. Lelaa libak li Yéhôva li nene mu kii a ñéga ntôñ wé i len ini? Ti dihéga.

² I len ini, Yéhôva a ñéga ntôñ wé i nya i nyelel libak jé, bitééne gwé ni matiñ mé. Di béñge bilem bi Yéhôva baa bi bi nene mu kii a ñéga ntôñ wé.

³ Lem i bisu, “Nyambe a ntodol bé mut.” (Minson mi baôma 10:34) Gwéha yon i bi tinde Yéhôva i ti Man wé kiki “binoñ inyu bôt bobasôna.” (1 Timôtéô 2:6; Yôhanes 3:16) Yéhôva a ñep bagwélél bé i tééne ba bobasôna ba ngwés emble, ñañ nlam. Ni i njel i, a nhôla bôt bobasôna ba ngwés ôt nseñ ni binoñ i kôs tohi. Lem i nyônôs iba, Yéhôva a yé Nyambe nu nsañ ni oda. (1 Korintô 14:33, 40) Jon di kôli hoñol le ntôñ u bagwélél bé u nlama sal ikété oda ni nsañ. Lem i nyônôs aa, Yéhôva a yé “Nniiga Nunkeñi.” (Yésaya 30:20, 21, MN.) Inyu hala nyen ntôñ wé u nyoñ ngéda i niiga bôt Bibel ni njel makoda ni likalô. Lelaa ba bé tehe bilem baa bi Yéhôva bini mu ntôn bikristen u hiai bisu? Lelaa bi nene i  ngéda yés? Ni lelaa mbuu mpubi u nla hôla we i sal ni ntôñ Yéhôva i len ini?

4. Kiki kaat Minson mi baôma 1:8 i ñunda, imbe oda Yésu a bi ti banigil, ni mambe mahôla ba bé lama kôs?

⁴ I hiai bisu. I nwin Yésu a ba legel, u bé ti bôt ba binam bobasôna botñem. (Lukas 4:43) A bi ti banigil bé oda le ba kena nson a bi bôdôl ni bisu, le ba bok mbôgi “letee ni masuk ma hisi.” (Añ Minson mi baôma 1:8.) I yé ntiik le, ba bé bé le ba gwel nson u ni ngui yap bomede. Ba bééna ngôñ ni mbuu mpubi, i “nhôla” Yésu a bi bôn bo.​—Yôhanes 14:26; Sakaria 4:6.

5-6. Lelaa mbuu mpubi u bi hôla banigil ba Yésu?

⁵ Banigil ba Yésu ba bi kôs mbuu mpubi i Pentékôt nwii 33 N.Y. Kunda yada, ni mahôla ma mbuu mpubi ba bôdôl añal ñañ nlam, kayéle i mbus ndék ngéda, dikôô di bôt di bi neebe ñañ nlam. (Minson mi baôma 2:41; 4:4) Ngéda ngolba i bi bôdôl, banigil ba bi nwaa bé añal ñañ nlam, ndi ba bi bat Yéhôva Nyambe mahôla. Ba bi soohe le: “Ti yak minkol nwoñ ngui i kônde añal Bañga yoñ ni makénd momasôna.” I mbus masoohe ma, ba bi ba nyonok ni mbuu mpubi kayéle ba “ba podok Bañga i Nyambe ni makénd.”​—Minson mi baôma 4:18-20, 29, 31.

⁶ Banigil ba Yésu ba bi boma mandutu mape. Kiki ’héga, Bitilna bi bé tôl bé ngandak ha ngéda i. To bikaat inyu toñol Bibel bi bé bé kiki len. Ni ki le, i bôt banigil ba bé tééne likalô ba bé pot ngandak dilémb. Tolakii ba bi boma mandutu mana momasôna, banigil ba makénd bana ba bi boñ hélha jam, i mbus jam kiki bo môm maa ma nwii ndigi, ba bé ba ma añle “bihégél gwobisôna hana nkoñ ’isi ñañ nlam.”​—Kôlôsé 1:6, 23.

7. Kii bagwélél ba Yéhôva ba len, ba bi nok nano a yé 100 nwii, ni kii ba bi boñ?

⁷ I len ini. Yéhôva a ngi kenek ni bisu i éga bagwélél bé ni i ti bo ngui i boñ sômbôl yé. A ñéga bo ni njel Bañga yé le Bibel, i mbuu mpubi u bi tinde bôt i tila. Mu Bibel nyen di ñañ i bôlô yosôna Yésu a bi boñ hana ’isi, ni i oda a bi ti banigil bé le ba kena nson u ni bisu. (Matéô 28:19, 20) Ibôdôl yaga i sôñ Njéba i nwii 1881, Nkum Ntat a bé kal le: “Yéhôva a bi pohol bé bés, to téé bés i nson wé inyu boñ le di kôs lingwañ to lipém, ndi inyu boñ le di gwélél kii yosôna di nla bana inyu añal ñañ nlam.” I man kaat nunu le ‘À qui l’œuvre est confiée,’ nu a bi pam i nwii 1919 a bé kal le: “Nson u yé nkeñi, ndi nson Nwet u, a ga ti bés ngui i gwel wo.” Ñ, kiki bikristen bi hiai hi bisu, bilôk bikéé bini bi bi ti ngui yap yosôna inyu gwel nson u, ba bak nkwoog nkaa le mbuu Djob u bé lama hôla bo i tééne mintén mi bôt nwominsôna likalô. Yak bés i len ini, di gwé bôdôl le mbuu Djob u ga hôla bés i yônôs nson u.

8-9. Mambe manjel ntôñ u Yéhôva u ngwélél i len ini inyu tjam ñañ nlam?

⁸ Ntôñ u Yéhôva u ngwélél bisélél bilam kiyaga inyu tjam ñañ nlam. Mu manjel ma di nla sima bikaat, ini sinima le “Photo-Drame de la Création,” bifônôgraf, matôa ma nkuu mahop, nkuu mahop womede, ni internet i dilo dini. Ntôñ u Yéhôva u mpémés biniigana ikété ngandak dilémb kiki hala a mah bôña bé i ngéda kôba. Inyuki? Inyu boñ le mintén mi bôt nwominsôna mi pam i  nok ñañ nlam ikété hilémb hiap. Yéhôva a ta bé ntodol bôt; a bi bôk a legel le ñañ nlam w’a añlana “ikété hiki loñ, ni hiki litén, ni hiki hilémb ni hiki lihaa.” (Masoola 14:6, 7) Ngôñ yé i yé le nwin u Ane u tihba mintén mi bôt nwominsôna.

⁹ Ndi ba mboñ lelaa ni bôt ba ba nyééne i mandap i het di nla bé jôp inyu tééne bo likalô? Inyu tihba i bôt ba, ntôñ u Yéhôva u bi gwélél likalô li mbamba. Kiki ’héga, i nwii 2001, Juu li bakena ntôñ li bi ti bilôk bikéé bi Pulasi kunde i gwélél kak bikaat ni manjel mape inyu téé likalô i mbamba. Hala a bi num matam malam. I nwii 2011, bitelbene bi bi yôña inyu boñ le ba noode likalô li kak bikaat i bitison bikeñi i New York City, i Amérika. I mbus nwii wada, ba bi pémés 102 129 bikaat ni 68 911 mimbamble. Ni ki le 4 701 bôt di bi bat yigil Bibel! Ibabé pééna, Yéhôva a bé gwélél mbuu mpubi wé inyu nit i nson u. Jon Juu li bakena ntôñ li bi ti kunde le ba gwélél i njel i inyu téé likalô i bitison bi nkoñ ’isi wonsô.

10. Kii di nla boñ inyu lémés nson wés likalô?

¹⁰ I jam di nla boñ. Di ôt nseñ ni biniigana Yéhôva a nti bés ni njel makoda. Di bana lem i sal ni bilôk bikéé bi juu jés li likalô. Ni i njel i, bilôk bikéé bi bôda ni bi bôlôm bi gwé pôla i hôla bés i yila batéé likalô ba makeñge ni bôt ba nyi niiga, di nla yak ôt nseñ ni ndémbél yap ilam. Di kee ni bisu i téé likalô to ibale di mboma mandutu. Kiki nlôñ kaat u ñéga i yigil ini u nhôñlaha bés, di mpam bé i boñ sômbôl i Djob ni ngui yés bésbomede, ndi ni ngui i mbuu mpubi. (Sakaria 4:6) Ibabé nkaa, nson Djob won di ngwel.

11. Lelaa juu li bakena ntôñ li hiai bisu li bé sal ikété adna inyu tééda oda ikété likoda?

¹¹ I hiai bisu. Juu li bakena ntôñ li Yérusalem li bé sal ikété adna inyu boñ le bagwélél ba Djob ba sal ikété oda ni nsañ. (Minson mi baôma 2:42) Kiki ’héga, bebee le i nwii 49 N.Y., i ngéda  ndañ u bi kwo inyu jam li likwee, mbuu mpubi u bi hôla juu li bakena ntôñ i wan i jam li. Ibale likoda li ke ni bisu i ba mbaglaga mu jam li, ki nson likalô u bi telep. Tolakii baôma ni mini mimañ mimpe mi bé sal i juu li bakena ntôñ, ba bé bon ba Lôk Yuda, ba bi nwas bé le bilem bi loñ, tole biniigana bi bet ba bé niiga bilem bi bi yémbél bo. Maselna ni la, ba bi wan Bañga i Djob, ba bat ki mahôla ma mbuu mpubi inyu yoñ makidik malam. (Minson mi baôma 15:1, 2, 5-20, 28) Mam ma bi sôk lelaa? Yéhôva a bi sayap makidik map kayéle likoda li tééda nsañ ni adna yé, yak nson likalô u bi ke ni bisu.​—Minson mi baôma 15:30, 31; 16:4, 5.

12. Kii i ñunda le nsañ ni oda bi yé toi i ntôñ Yéhôva i len ini?

¹² I len ini. Ntôñ u Yéhôva u nsal ni ngui inyu hôla bagwélél bé i sal ikété oda ni nsañ. Ibôdôl yaga i nwii 1895, mbamble unu le Phare de la Tour de Sion. Messager de la Présence de Christ nu dilo 15 nu sôñ Maye sép, a bééna ño nkwel wada le “Avec bienséance et ordre.” Nlôñ kaat u bé nit i yigil i, u bé 1 Korintô 14:40. I yigil i i bé kal le: “Baôma ba bi lôôha pôdôs bilôk bikéé bi hiai bisu inyu nseñ i tééda oda . . . Kinje loñge jam i wan ‘mabéhna . . . ma ma bi tilba i ngéda bisu inyu niiga bés.’” (Rôma 15:4) Ñ, di ntehe i len ini le ntôñ u Yéhôva u nlôôha boñ biliya inyu hôla bikristen i sal ikété oda ni nsañ, kiki i ngéda bikristen bi hiai bisu. Kiki ’héga, ibale u nlama tégbaha yigil i Nkum Ntat i likoda lipe, tole i loñ ipe, w’a tibil yi lelaa yigil i ga tagbe ni umbe ño nkwel ni ga wan. To ibale likoda joñ bé li, jam jo ki jo li ga nene bé we nkén, a’ ba ndik wee u yé likoda joñ! Jam jo ki jo lipe li nla bé hôla bés i tééda i adna i, ndik mbuu Djob.​—Sôfônia 3:9.

13. Inoñnaga ni kaat Yakôbô 3:17, mambe mambadga di nlama badba?

¹³ I jam di nla boñ. Yéhôva a nsômbôl le bagwélél bé ba “tééda adna i mbuu mpubi ikété maada ma nsañ.” (Éfésô 4:1-3) Jon badba le: ‘Baa me nhôlôs nsañ ni adna ikété likoda? Baa me nôgôl i bet  ba ñéga bés? Baa lôk kéé ipe i mbôdôl me ñem, téntén ibale me ngwel ngim minson ikété likoda? Baa me noñ ngeñ, baa me yé bebee i lôl bôt i mahôla?’ (Añ Yakôbô 3:17.) Mu kii u nwanba, ibale u nléba le u gwé ngim jam i sal, soohe inyu bana mahôla ma mbuu mpubi. Kiki w’a ke ni bisu i nwas le mbuu mpubi u sal i ngii yoñ, hala nyen lôk kéé i bôda ni i bôlôm i ga ke ni bisu i gwés we, i ti ki we mayéga inyu bôlô u nsal ikété likoda.

14. Inoñnaga ni kaat Kôlôsé 1:9, 10, lelaa Yéhôva a bi niiga bagwélél bé ba hiai bisu?

¹⁴ I hiai bisu. Yéhôva a nlôôha gwés niiga bagwélél bé. (Tjémbi 32:8) Kiki bon a ngwés, a nsômbôl le ba yi nye, ba gwés nye, ba niñ ki i boga ni boga. Hala a nla bé bôña ibale a niiga bé bés. (Yôhanes 17:3) I hiai bisu, Yéhôva a bi gwélél likoda jé inyu niiga bagwélél bé. (Añ Kôlôsé 1:9, 10.) Mbuu mpubi, hala wee “nhôla” Yésu a bi bôn, won u bi hôla bo. (Yôhanes 14:16) Won u bi hôla banigil i nok Bañga i Djob, i bigda i mam Yésu a bi kal ni m’a a bi boñ. I mbus ngéda, u bi hôla bo i tila i mam ma yé ikété bikaat bi Matéô, Markô, Lukas ni Yôhanes. I yi i yon i bi lédés hémle i bikristen bi bisu, i kéñbaha gwéha yap inyu Yéhôva ni Man wé, ni i gwéha ba bééna inyu wada ni nuu.

15. Lelaa we u ntehe Yéhôva a nyônôs mbônga wé u u yé i kaat Yésaya 2:2, 3?

¹⁵ I len ini. Yéhôva a bi legel bisu bi ngéda le “dilo di nsôk,” bôt ba matén momasôna ba bé lama bet i hikôa hié, inyu boñ le a niiga bo manjel mé. (Añ Yésaya 2:2, 3.) Di ntehe mbañ i i nyon i len ini. Di ntehe toi le bañga base i nloo bikwéha bi base gwobisôna huum! Kinje soso ngand i mbuu Yéhôva a nkôôbana bés i len ini! (Yésaya 25:6) Bijek bi  mbuu a nti bés ni njel “nkol u maliga ni u pék,” bi ta ndik bé ngandak, ndi bi yé mintén mintén, kiki bo bikaat di nla añ, minkwel, bividéô ni bititii bi nweghe. (Matéô 24:45) Hala a ntinde bés i nôgda kiki Élihu, liwanda li Hiôb li li kal le: “Njee a yé malét kiki [Nyambe]?”​—Hiôb 36:22.

16. Kii u nla boñ inyu hol i pes mbuu?

¹⁶ I jam u nla boñ. Mbuu Djob u ga hôla we i ha i yom u nigil ikété Bañga i Djob bisélél. U nla soohe kiki ntôp tjémbi nu a kal le: “Niiga me njel yoñ, a Yéhôva; m’a hiumul mu maliga moñ; at ñem wem i kon jôl joñ woñi.” (Tjémbi 86:11) Jon kee ni bisu i añ ni i nigil Bibel ni bikaat ntôñ Yéhôva u mpémés. I yé maliga le, njômbi yoñ i ta ndik bé le u bana yi, ndi u nlama ba nkwoog nkaa le i yom u nigil i yé maliga, u bii ki yo bibôñôl mu niñ yoñ. Ni mahôla ma mbuu Djob, u nla pam i boñ hala. U nlama yak ti lôk kéé yoñ i bôda ni i bôlôm makénd. (Lôk Héber 10:24, 25) Inyuki? Inyule lihaa joñ li mbuu li. Bat Yéhôva mbuu wé u u ga hôla we i ti madimbhe ma nlôl i ñem i ngéda u yé i makoda, ni i tégbaha minkwel minlam inyu lédés lôk kéé yoñ. I ngéda u mboñ i mam ma momasô, u ñunda Yéhôva bo Man wé le u ngwés “mintômba” nwap ngandak.​—Yôhanes 21:15-17.

17. Mambe manjel u nla gwélél inyu unda le u nit ntôñ Yéhôva ni ñem woñ wonsô?

¹⁷ Ndék ngéda, ndik ntôñ Yéhôva a ñéga ni mbuu mpubi won w’a yégle hana ’isi. Jon di boñ biliya gwés gwobisô inyu sal ni ntôñ u. Kiki Nyambe nu a ntodol bé mut, yak we añle i bôt bobasô u mboma, ñañ nlam. Boñ biliya i hôlôs adna ikété likoda inyu unda le u ngwés oda ni nsañ kiki Nyambe. Emble Nniiga woñ Nunkeñi mu kii u nyoñ ngéda i nigil kii yosôna ntôñ wé u mpémés. Ni i njel i, i ngéda ngeñ i ga kola le nkoñ ’isi u Satan u tjiba, w’a kon bé woñi. Maselna ni hala, ni lôs yosôna, w’a ba i pes i ba bobasôna ba nit ntôñ Yéhôva ni ñem wap wonsôna.