1. Aha do na ikkon torus diulahon sahalak Kristen na tardidi?

NUNGNGA tardidi hamu? Tikki tardidi hamu, dipatuduhon hamu ma tu akka halak na porsea do hamu tu Jahowa jala lomo do rohamu manomba Ibana di organisasina. * Alai ikkon torus do dipatogu hamu haporseaonmuna tu Jahowa, jala ikkon pos do rohamu Jahowa do na mangatur organisasina saonari.

2-3. Songon dia do parange ni Jahowa tarida sian carana mangatur organisasina saonari?

² Sian cara ni Jahowa mangatur organisasina boi ma taboto songon dia parangena, aha na dihalomohon rohana, dohot standarna. Taulas ma tolu parange ni Jahowa na tarida sian organisasina.

³ Na parjolo, ‘dang marimbar jolma di jolo ni Debata’. (Ul. 10:34) Alani holong ni Jahowa, dilehon Ibana do anakna gabe “tobusan tu saluhut jolma”. (1 Tim. 2:6; Joh. 3:16) Dipakke Jahowa do naposona lao pasahatton barita na uli tu akka jolma na olo manangihon. Ujungna gabe boi ma dapot ni nasida laba sian tobusan ni Jesus. Na paduahon, Debata na taratur do Jahowa jala dame. (1 Kor. 14:33, 40) Alani i, taratur jala dame do akka halak na manomba Ibana. Na patoluhon, lomo do roha ni Jahowa mangajari. (Jes. 30:20, 21) Alani i, marsitutu do organisasina mangajarhon Hata ni Debata di huria dohot di ulaon marbarita. Songon dia do huria Kristen di abad na parjolo maniru tolu parange ni Jahowa i? Songon dia do naposo ni Jahowa saonari maniru akka parange i? Jala songon dia do tondi parbadia mangurupi hamu mandukung organisasi ni Jahowa saonari?

4. Songon na didok di Ulaon ni Apostel 1:8, paretta aha do na dilehon Jesus tu akka siseanna, jala aha do na mangurupi nasida?

⁴ Di abad na parjolo. Sude do halak boi mandapot harapan alani barita na uli na dipaboa Jesus. (Luk. 4:43) Diparettahon Jesus ma akka siseanna asa pasahatton barita na uli on “sahat tu ujung ni tano on”. (Jaha Ulaon ni Apostel 1:8.) Alai dang boi diulahon nasida i molo holan mangasahon gogona sandiri. Porlu do diurupi tondi parbadia nasida, songon naung dijanjihon Jesus tu nasida.​—Joh. 14:26; Sak. 4:6.

5-6. Songon dia do tondi parbadia mangurupi sisean ni Jesus?

⁵ Dijalo sisean ni Jesus do tondi parbadia i tikki Pentakosta 33 M. Ala diurupi tondi parbadia, mulai ma nasida marbarita. Jala di bagasan sadari i, adong marribu halak na manjalo barita na uli. (Ul. 2:41; 4:4) Nang pe dianiaya dang gabe mabiar nasida, torus do nasida marbarita na uli. Sai martangiang do nasida asa diurupi Debata. Didok nasida di tangiangna i, “Lehon ma habaranion tu angka naposom on, asa boi tongtong paboahon hatami.” Ujungna diurupi tondi parbadia ma nasida jala “gabe barani ma nasida mangkatahon hata ni Debata”.​—Ul. 4:18-20, 29, 31.

⁶ Adong do muse tantangan na diadopi sisean ni Jesus. Di tikki i, dang adong dope Bibel jala otik do Gulungan. Dang adong akka bukku na patorakkon isi ni Bibel songon di tikkinta saonari. Jala ikkon marbarita do nasida tu akka halak na marasing-asing bahasana. Alani godang ni tantangan, hira na so mungkin do diulahon nasida i. Alai boi do nasida marhasil. Buktina di bagasan 30 taon, dibaritahon nasida do barita na uli i “tu sude tompaan na di tano on”.​—Kol. 1:6, 23.

7. Lobi sian 100 taon naung salpu, boha do naposo ni Jahowa mamboto aha na dihalomohon Debata, jala songon dia do nasida mangulahon i?

⁷ Di jaman modern. Torus do ditogu-togu Jahowa naposona. Jala dilehon do gogo asa boi mangulahon lomo ni rohana. Dilehon Jahowa do tudu-tudu sian Bibel, na disurat marhite pangurupion ni tondi parbadia. Disurat do di Bibel songon dia Jesus marbarita, dohot paretta na dilehon ibana tu siseanna asa torus marbarita. (Mat. 28:19, 20) Majalah The Watchtower Juli 1881 mandok, “Dang dipillit manang dilantik Jahowa hita asa pasangappon diritta manang asa mamora. Alai ikkon tapakke do ngolutta lao mambaritahon barita na uli.” Brosur na dicetak taon 1919 na marjudul To Whom the Work Is Entrusted mandok, “Massai godang do ulaonta, alai ala ulaon ni Tuan do on pos do rohatta pasti diurupi do hita mangulahon i.” Songon halak Kristen di abad na parjolo, kerja keras jala barani do akka donganta on. Ala pos do roha ni nasida, diurupi tondi parbadia do nasida marbarita na uli. Pos do rohatta urupan ni tondi parbadia do tong hita saonari.

8-9. Akka cara aha do na dipakke organisasi ni Jahowa lao pasahatton barita na uli?

⁸ Diparade organisasi ni Jahowa do akka alat lao mangurupi hita pasahatton barita na uli. Akka alat i, i ma publikasi tercetak, “Drama-Foto Penciptaan”, fonograf, mobil berpengeras suara, siaran radio, dohot na tapakke saonari, i ma internet. Diterjemahon organisasi ni Jahowa do akka informasi tu godang bahasa. Boasa? Asa saluhut jolma mambege barita na uli di bahasa ni nasida sandiri.  Dang marimbar jolma di jolo ni Jahowa. Jadi lomo do rohana asa barita na uli i dipasahat “tu saluhut bangso, marga dohot bahasa”.​—Pgk. 14:6, 7.

⁹ Boha do pasahatton barita na uli tu akka halak na tinggal di jabu manang apartemen na ketat pengamananna? Asa boi sahat barita na uli tu nasida, dibahen organisasi ni Jahowa ma pengaturan marbarita di inganan na ribur. Misalna di taon 2001, disetujui Punguan na Mangaradoti Organisasi do asa dibahen akka donganta gerai publikasi di Prancis. Dung i mulai ma akka donganta di luat na asing marbarita mamakke cara sisongon i. Mantap do hasilna. Di taon 2011, dicoba ma cara na baru on di New York, kota paling sibuk di Amerika Serikat. Di taon i, adong 102.129 bukku dohot 68.911 majalah na ditempatton. Jala 4.701 halak mangido parsiajaran Bibel. Takkas ma, diurupi tondi parbadia ni Jahowa do ulaon on. Jadi disetujui Punguan na Mangaradoti Organisasi ma asa dibahen gerai publikasi di sude liat portibi on.

10. Aha do na porlu taulahon asa lam malo hita marbarita dohot mangajari?

¹⁰ Aha na boi diulahon hamu. Pakke ma pelatihan na dilehon Jahowa marhite parpunguan. Taratur ma hamu marbarita rap dohot kelompok dinasmuna. Boi do akka dongan di kelompok dinasmuna mangurupi hamu asa malo marbarita dohot mangajari. Jala boi do hamu dipatogu sian sitiruon na dibahen nasida. Toktong ma hamu marbarita nang pe adong tantangan. Songon na dipaboa di ayat tema ni parsiajaran on, boi do hita marhasil mangulahon lomo ni roha ni Debata, dang alani gogotta sandiri alai ala diurupi tondi parbadia. (Sak. 4:6) Pos do rohatta pasti urupanna do hita, ala ulaon ni Debata do on.

11. Songon dia do punguan na manguluhon huria Kristen di abad na parjolo marsitutu mambahen huria marsada?

¹¹ Di abad na parjolo. Punguan na manguluhon huria Kristen di Jerusalem,  marsitutu do mambahen asa taratur jala dame akka huria di tikki i. (Ul. 2:42) Misalna, tikki adong masalah sunat taon 49 M, diurupi tondi parbadia do punguan na manguluhon huria Kristen di tikki i mambahen keputusan. Molo dang marsada huria alani masalah i, tottu gabe maol ma nasida marbarita. Nang pe halak Jahudi akka apostel dohot akka sintua, alai dang gabe terpengaruh nasida tu tradisi ni halak Jahudi, nang tu akka halak na mandukung ajaran i. Alai dibahen nasida do keputusan i, hombar tu Hata ni Debata dohot pangurupion ni tondi parbadia. (Ul. 15:1, 2, 5-20, 28) Aha do hasilna? Dipasu-pasu Jahowa do keputusan i. Gabe marsada jala dame ma huria, jala boi ma nasida toktong marbarita na uli.​—Ul. 15:30, 31; 16:4, 5.

12. Aha do na patuduhon marsada jala dame do organisasi ni Jahowa saonari?

¹² Di jaman modern. Marsitutu do organisasi ni Jahowa mambahen naposo ni Jahowa taratur jala dame. Majalah Zion’s Watch Tower and Herald of Christ’s Presence terbitan 15 November 1895 paboahon artikel na marjudul, “Decently and in Order”, na dibuat sian 1 Korint 14:40. Didok do di artikel i, “Di suratna tu huria Kristen di abad na parjolo, dipaboa akka apostel do songon dia carana asa taratur . . . Ikkon torus do taulahon i, ala ‘nasa na tarsurat hian, disurat do i laho mangajari hita’.” (Rom 15:4) Saonari pe, marsitutu do organisasi ni Jahowa mangurupi huria Kristen asa taratur jala dame. Misalna, tu huria dia pe hita lao, manang di negara dia pe i, taboto do artikel Joujou Paboahon na diulas dohot cara mangulas artikel i. Takkas ma, holan tondi parbadia ni Debata do na boi mambahen hita marsada!​—Sep. 3:9.

13. Songon prinsip na adong di Jakobus 3:17, aha do na porlu tasukkun tu diritta?

¹³ Aha na boi diulahon hamu. Lomo do roha ni Jahowa asa naposona “marsada jala mardame songon na nilehon ni tondi parbadia”. (Eps. 4:1-3) Jadi tasukkun ma diritta, ‘Marsitutu do au mangurupi huria asa marsada jala mardame? Unduk do  au tu akka dongan na manguluhon? Molo adong tanggung jawabhu di huria, boi do pos roha ni akka dongan tu au? Tepat waktu do au, jala sai rade do au mangurupi na asing?’ (Jaha Jakobus 3:17.) Molo adong dope na porlu dipadenggan sian diritta, pangido ma tondi parbadia mangurupi hamu. Molo tapaloas tondi parbadia padenggatton parangetta, lam diargai jala dihaholongi akka dongan di huria ma hita.

14. Songon na dipaboa di Kolosse 1:9, 10, songon dia do cara ni Jahowa mangajari naposona di abad na parjolo?

¹⁴ Di abad na parjolo. Lomo do roha ni Jahowa mangajari naposona. (Ps. 32:8) Diajari Ibana do hita asa boi tatanda Ibana, tahaholongi, jala mandapot hangoluan saleleng ni lelengna. (Joh. 17:3) Dipakke Jahowa do huria Kristen di abad na parjolo mangajari naposona. (Jaha Kolosse 1:9, 10.) Songon naung dijanjihon Jesus, diurupi tondi parbadia do akka siseanna. (Joh. 14:16) Tondi parbadia do muse na mangurupi nasida mangattusi Hata ni Debata. Boi ma diingot akka siseanna aha na didok dohot na diulahon Jesus jala disuratton ma i di bukku Injil. Parbinotoan i ma na mambahen togu haporseaon ni akka halak Kristen di abad na parjolo. Lam holong ma roha ni nasida tu Debata, tu Jesus, dohot tu akka dongan.

15. Sian dia do taboto nungnga digohi Jahowa janjina di Jesaya 2:2, 3?

¹⁵ Di jaman modern. Nungnga disurirangkon Jahowa “di ujung ni angka ari”, marroan ma halak sian sude bangso lao nakkok tu dolok ni Jahowa asa diajari akka dalanna. (Jaha Jesaya 2:2, 3.) Saonari, nungnga taida surirang i digohi. Boi ma taida dao do undenggan agama na sittong, sian sude agama na so sittong. Jala diparade Jahowa do godang  informasi sian Bibel tu akka naposona. (Jes. 25:6) Dipakke Jahowa do “naposo haposan jala na marbisuk” paradehon informasi on marhite maragam cara. Misalna diparade do akka artikel, jamita, video animasi, dohot akka video na asing. (Mat. 24:45) Sarupa ma pakkilalaanta songon si Elihu na mandok, “Tung ise ma Pangajari tudoshon [Debata]?”​—Job 36:22.

16. Songon dia do hita mandapot laba sian na diajarhon Jahowa tu hita?

¹⁶ Aha na boi diulahon hamu. Diurupi tondi parbadia do hamu mangulahon aha na dijaha jala diparsiajari hamu sian Bibel. Martangiang ma hamu songon tangiang ni panurat Psalmen na mandok, “Sai ajarhon ma tu ahu, ale Jahowa, dalanmu, asa marpangalaho ahu di bagasan hasintonganmi; sai pasada ma rohangku mangkabiari goarmu.” (Ps. 86:11) Jadi, torus ma jaha jala parsiajari Bibel dohot akka publikasi na diparade organisasi ni Jahowa. Alai, unang ma holan manambai parbinotoanmuna. Ikkon hona do hasittongan i tu rohamuna, asa boi diulahon hamu i di parngoluanmuna. Diurupi tondi parbadia do hamu mangulahon i. Porlu do tong hamu patoguhon akka dongan di huria. (Heb. 10:24, 25) Boasa? Ala keluargamuna do nasida. Martangiang ma asa diurupi tondi parbadia hamu mangalehon komentar sian ias ni rohamuna, jala mambahen na dumenggan tikki mandapot tugas di parpunguan. Molo diulahon hamu i, dipatudu hamu ma tu Jahowa dohot tu Jesus na dihaholongi hamu do ‘biru-biruna’.​—Joh. 21:15-17.

17. Songon dia do caratta patuduhon na setia do hita mandukung organisasi ni Jahowa?

¹⁷ Satokkin nai, holan organisasi na ditogu-togu tondi parbadia nama na adong di tano on. Jadi torus ma semangat hamu mandukung organisasi ni Jahowa. Songon Debata, patudu ma na holong do rohamuna tu sude jolma, marhite marbarita na uli tu nasida. Ala lomo do roha ni Jahowa asa sude taratur jala dame, ikkon marsada do hita dohot akka dongan di huria. Taparsiajari jala tapakke ma sude informasi na diparade Debata lao mangajari hita. Dang mabiar hita, nang pe taboto na lao salpu nama portibi na dirajai Sibolis on. Gariada, gabe barani ma hita rap dohot akka dongan na setia di organisasi ni Jahowa.