1. Ano an kaipuhan na padagos na gibuhon kan bawtisadong mga Kristiyano?

BAWTISADO ka na daw? Kun iyo, hayagan mo nang ipinahiling na nagtutubod ka ki Jehova asin andam kang maglingkod sa saiya kaiba kan saiyang organisasyon. * Siyempre, kaipuhan na padagos na kumusog an pagtubod mo ki Jehova. Asin kaipuhan mong padagos na pakusugon an saimong pagtitiwala na ginagamit ni Jehova an saiyang organisasyon ngunyan.

2-3. Paano ginigiyahan ni Jehova an saiyang organisasyon ngunyan? Magtao nin mga halimbawa.

² Ngunyan, ginigiyahan ni Jehova an saiyang organisasyon sa paaging nahihiling an saiyang personalidad, katuyuhan, asin mga pamantayan. Pag-ulayan ta an tulo sa mga kuwalidad ni Jehova na mahihiling sa saiyang organisasyon.

³ Inot, “an Diyos mayong pinapalain.” (Gibo 10:34) Huli sa pagkamuot ni Jehova, itinao niya an saiyang Aki bilang “pantubos para sa gabos.” (1 Tim. 2:6; Juan 3:16) Ginagamit ni Jehova an saiyang mga lingkod para ihulit an maugmang bareta sa gabos na gustong magdangog, asin paagi kaiyan natatabangan an pinakadakul na tawong posible na makinabang sa pantubos. Ikaduwa, si Jehova sarong Diyos nin pagigin areglado asin nin katuninungan. (1 Cor. 14:33, 40) Kaya asahan niyato na an mga parasamba niya naglilingkod sa saiya bilang areglado asin matuninong na grupo. Ikatulo, si Jehova an “Kahuruhalangkawing Instruktor.” (Isa. 30:20, 21, NWT) Huli kaini, nakapokus an saiyang organisasyon sa pagtukdo kan saiyang ipinasabong na Tataramon, sa kongregasyon man o sa ministeryo sa publiko. Paano risang-risa sa inot na Kristiyanong kongregasyon an tulong aspektong iyan kan personalidad  ni Jehova? Paano man iyan hiling-hiling sa presenteng panahon? Asin paano ka matatabangan kan banal na espiritu mantang naglilingkod ka kaiba kan organisasyon ni Jehova ngunyan?

4. Uyon sa Gibo 1:8, ano an ipinagbuot ni Jesus sa saiyang mga parasunod, asin anong tabang an aakuon ninda?

⁴ Kan inot na siglo. An mensahe na ihinulit ni Jesus nagtao nin paglaom sa gabos na tawo. (Luc. 4:43) Ipinagbuot niya sa saiyang mga parasunod na ipadagos an gibuhon na pinunan niya, na magpatotoo sagkod “sa pinakaharayong parte kan daga.” (Basahon an Gibo 1:8.) Siyempre kun sa sadiri sana ninda, dai ninda magigibo ini. Kakaipuhanon ninda an banal na espiritu—“an paratabang” na ipinangako sainda ni Jesus.—Juan 14:26; Zac. 4:6.

5-6. Sa anong mga paagi tinabangan kan banal na espiritu an mga parasunod ni Jesus?

⁵ Nag-ako kan banal na espiritu an mga parasunod ni Jesus kan Pentecostes 33 C.E. Sa tabang kan espiritung iyan, nagpuon tulos sindang maghulit, asin sa halipot na panahon, rinibo an nag-ako kan maugmang bareta. (Gibo 2:41; 4:4) Kan magkaigwa nin pagkontra, imbes na magpadaog sa takot an mga disipulo, naghagad sinda nin tabang sa Diyos. Namibi sinda: “Tabangan mo an saimong mga uripon na padagos na ipahayag an saimong tataramon na may kusog nin buot.” Dangan napano sinda kan banal na espiritu asin padagos na ‘nagpahayag kan tataramon nin Diyos na may kusog nin buot.’—Gibo 4:18-20, 29, 31.

⁶ Napaatubang man sa iba pang mga kadipisilan an mga disipulo ni Jesus. Halimbawa, dikit sana an kopya kan Kasuratan. Mayo nin mga pantabang sa pag-adal arog kan igwa kita ngunyan. Asin an mga disipulo kaipuhan na maghulit sa mga tawo sa manlain-lain na lengguwahe. Sa ibong kan gabos na kadipisilan na iyan, nagibo kan maigot na mga disipulo an garo baga imposible—sa laog sana nin pirang dekada, naihulit ninda an maugmang bareta sa “gabos na linalang sa irarom nin langit.”—Col. 1:6, 23.

7. Labing 100 na taon na an nakaagi, paano naaraman kan mga lingkod ni Jehova kun ano an hinahagad sa sainda nin Diyos, asin ano an ginibo ninda?

⁷ Sa presenteng panahon. Padagos na ginigiyahan asin pinapakusog ni Jehova an saiyang mga lingkod. Siyempre, an paggiya panginot nang hali sa Tataramon nin Diyos na ipinasabong kan banal na espiritu. Mababasa ta diyan an manungod sa ministeryo ni Jesus asin an pagbuot niya sa saiyang mga parasunod na ipadagos an gibuhon na pinunan niya. (Mat. 28:19, 20) Kaidto pang Hulyo 1881, sinabi na kan magasin na ini: “Dai kita inapod, ni linahidan para mag-ako nin onra asin magtipon nin kayamanan kundi tanganing magtao asin magsakripisyo, saka maghulit kan maugmang bareta.” An To Whom the Work Is Entrusted, sarong buklet na ipinublikar kan 1919, nagsabi: “Garo baga dakulaon an gibuhon, pero gibuhon iyan kan Kagurangnan, asin paagi sa saiyang kusog magigibo ta iyan.” Iyo, arog kan inot na mga Kristiyano, kusog-buot na nagmaigot sa gibuhon an mga tugang na ini, na nagtitiwalang tatabangan sinda kan banal na espiritu na maghulit sa gabos na klase nin tawo. Igwa man kita ngunyan kan arog kaiyan na pagtitiwala.

8-9. Anong mga pamamaagi an ginamit kan organisasyon ni Jehova tanganing pahiwason pa an gibuhon na paghuhulit?

⁸ Ginamit kan organisasyon ni Jehova an pinakamarahay na kasangkapan na igwa tanganing ipalakop an maugmang bareta. Kaiba sa mga kasangkapan na ini an imprentadong mga publikasyon, an “Photo-Drama of Creation,” mga ponograpo, sound car, radio broadcast, asin sa dai pa sana nahahaloy, an mga kompyuter asin Internet. Isinasagibo man kan organisasyon nin Diyos an pinakadakulang gibuhon na pagtradusir sa kasaysayan! Taano? Tanganing madangog kan gabos na klase nin tawo an maugmang bareta sa sadiri nindang lengguwahe. Si Jehova mayong pinapalain; ihinula niya na an maugmang bareta ipapahayag “sa gabos na nasyon asin tribo asin  lengguwahe saka banwaan.” (Kap. 14:6, 7) Gusto niyang ipaabot sa gabos na tawo an mensahe kan Kahadian.

⁹ Kumusta man an mga masakit mapaabutan, tibaad dahil nakaistar sinda sa guwardiyadong marhay na mga apartment? Tanganing mapaabutan an mga arog ninda, pinahiro ni Jehova an saiyang organisasyon na maggamit nin manlain-lain na pamamaagi sa pagpapatotoo sa publiko. Halimbawa, kan 2001, inaprubaran kan Namamahalang Grupo an paggamit nin mga literature cart asin iba pang displey sa Pransia asin paghaloy-haloy sa iba pang mga lugar. Magayon an nagin resulta. Kan 2011, pinunan sa Estados Unidos an sarong bagong programa sa saro sa pinakamatawong lugar sa New York City. Sa inot na taon, 102,129 libro asin 68,911 magasin an naipasakamot. Asin 4,701 katawo an nag-request nin pag-adal sa Bibliya! Malinaw na yaon an tabang kan banal na espiritu sa gibuhon na ini. Kaya inaprubaran kan Namamahalang Grupo na gamiton kan mga tugang sa bilog na kinaban an mga literature cart asin iba pang displey nin literatura.

10. Ano an puwede tang gibuhon tanganing magin mas epektibo sa satong ministeryo?

¹⁰ An puwede mong gibuhon. Lubos na aprobetsaran an pagsasanay na itinatao ni Jehova sa Kristiyanong mga pagtiripon. Regular na maghulit kaiba kan saimong grupo sa paglilingkod sa langtad. Matatabangan ka kan mga kagrupo mo na magin mas epektibo sa paghuhulit asin pagtutukdo, saka mapapakusog ka man kan saindang marahayon na halimbawa. Padagos na maghulit dawa may mga kadipisilan. Arog kan ipinapagirumdom sa sato kan pinakatemang teksto, isinasagibo ta an kabutan nin Diyos, bako sa sadiri tang kusog, kundi sa tabang kan banal na espiritu. (Zac. 4:6) Tutal, gibuhon nin Diyos an ginigibo ta.

11. Paano may pagkasararong nagtinarabangan an namamahalang grupo kan inot na siglo tanganing mapagdanay an areglo sa banwaan nin Diyos?

¹¹ Kan inot na siglo. An namamahalang grupo sa Jerusalem may pagkasararong nagtinarabangan tanganing mapagdanay an areglo asin katuninungan kan mga lingkod nin Diyos. (Gibo 2:42) Halimbawa, kan maglataw an isyu manungod sa pagturi kan mga 49 C.E., pinag-ulayan iyan kan namamahalang grupo sa paggiya kan banal na espiritu. Kun nagdanay na nagkakabaranga an kongregasyon sa isyung ini, naapektaran  kuta an paghuhulit. Dawa ngani Judio an mga apostol asin kamagurangan na lalaki, dai sinda nagpaimpluwensiya sa Judiong tradisyon o sa mga maigot na nagsusuportar diyan. Imbes, nagpagiya sinda sa Tataramon nin Diyos asin sa banal na espiritu. (Gibo 15:1, 2, 5-20, 28) An resulta? Binendisyunan ni Jehova an saindang desisyon, napagdanay an katuninungan asin pagkasararo, saka nagpadagos an gibuhon na paghuhulit.—Gibo 15:30, 31; 16:4, 5.

12. Ano an nagpapahiling na areglado asin may katuninungan an organisasyon ni Jehova ngunyan?

¹² Sa presenteng panahon. Nagmamaigot an organisasyon ni Jehova na mapagdanay an areglo asin katuninungan kan mga lingkod ni Jehova. Kaidto pang 1895, an Zion’s Watch Tower and Herald of Christ’s Presence kan Nobyembre 15 igwa nin artikulo na may titulong “Kagalang-galang Asin Areglado” na basado sa 1 Corinto 14:40. Sinabi kan artikulo: “Kadakul kan isinurat kan mga apostol para sa inot na mga kongregasyon manungod sa pagigin areglado . . . Marahay na padagos na maingat nanggad na sunudon ‘an mga bagay na isinurat kaidto para sa pagtukdo sa sato.’” (Roma 15:4) Iyo, hiling-hiling sa organisasyon ni Jehova ngunyan an iyo man sanang pagmawot kan inot na mga Kristiyano na mapagdanay an areglo asin katuninungan. Halimbawa, kun maatender ka nin Pag-adal sa Torrengbantayan sa ibang kongregasyon—o sa ibang nasyon pa ngani—aram mo kun paano iyan isasagibo asin kun arin na artikulo an pag-uulayan. Dai ka nanggad maninibago! An espiritu sana nin Diyos an makakapagpagin posible kan siring na pagkasararo.—Sof. 3:9.

13. Nasa isip an Santiago 3:17, ano an mga dapat niyatong ihapot sa satong sadiri?

¹³ An puwede mong gibuhon. Gusto ni Jehova na “mapagdanay [kan saiyang mga lingkod] an pagkasararong itinatao kan espiritu sa irarom nin katuninungan na nagbubugkos sa [sainda].” (Efe. 4:1-3) Kaya haputon an sadiri: ‘Hinihinguwa ko daw na makakontribwir sa pagkasararo asin katuninungan sa kongregasyon? Masinunod daw ako sa mga nanginginot? Maaasahan daw ako, lalo na kun may mga paninimbagan ako sa kongregasyon? Nasa oras daw ako pirmi, matinabang, saka andam na maglingkod?’ (Basahon an Santiago 3:17.) Kun may marisa kang kaipuhan na pauswagon, mamibi para sa banal na espiritu. Mantang mas tinutugutan mong moldehon kaiyan an saimong personalidad asin paggawi, mas mamumutan asin papahalagahan ka kan mga tugang.

14. Paano tinabangan ni Jehova an saiyang mga lingkod kan inot na siglo na magkaigwa nin “tamang kaaraman mapadapit sa saiyang kabutan”? (Colosas 1:9, 10)

¹⁴ Kan inot na siglo. Nauugma si Jehova na tukduan an saiyang mga lingkod. (Sal. 32:8) Gusto niya na mamidbid saka mamutan ninda siya, asin na mabuhay sinda nin daing katapusan bilang saiyang namumutan na mga aki. Gabos ini dai magigin posible kun mayo an pagtutukdo niya. (Juan 17:3) Ginamit ni Jehova an Kristiyanong kongregasyon kan inot na siglo para tukduan an saiyang mga lingkod. (Basahon an Colosas 1:9, 10.) Dakula an nagin papel diyan kan banal na espiritu—an “paratabang” na ipinangako ni Jesus. (Juan 14:16) Tinabangan kaiyan an mga disipulo na magkaigwa nin mas malinaw na pakasabot sa Tataramon nin Diyos, asin ipinagirumdom kaiyan sa sainda an dakul na bagay na sinabi asin ginibo ni Jesus. An dakul sa mga detalyeng ini isinurat sa Mga Ebanghelyo pag-abot nin panahon. Napakusog kan kaaraman na ini an pagtubod kan inot na mga Kristiyano pati man an pagkamuot ninda sa Diyos, sa saiyang Aki, asin sa lambang saro.

15. Sa anong mga paagi mo nahihiling an kautuban kan panuga ni Jehova na nasa Isaias 2:2, 3?

¹⁵ Sa presenteng panahon. Ihinula ni Jehova na “sa huring kabtang kan mga aldaw,” an mga tawo hali sa gabos na nasyon maburunyog sa saiyang piguratibong bukid para tukduan kan saiyang mga dalan. (Basahon an Isaias 2:2, 3.) * Nahihiling na niyato an kautuban kan propesiyang ini. An tunay na pagsamba ilinangkaw nin mas halangkaw pa kisa sa gabos na klase nin maating pagsamba. Asin abunda nanggad na bangkete nin espirituwal na kakanon an itinatao ni Jehova! (Isa. 25:6) Paagi sa “maimbod asin mapagmansay na uripon,” tinatawan niya kita nin espirituwal  na kakanon na bako lang abunda kundi manlain-lain man na marhay—magpuon sa mga artikulo asin mga pahayag sagkod sa mga digital animation asin video. (Mat. 24:45) Namamatian ta an arog kan sa amigo ni Job na si Elihu, na angay nanggad na nagsabi: ‘Siisay na paratukdo an kabaing nin Diyos?’—Job 36:22.

16. Ano an puwede mong gibuhon tanganing umuswag sa espirituwal?

¹⁶ An puwede mong gibuhon. Tatabangan ka kan espiritu nin Diyos na maiaplikar sa praktikal na paagi an binabasa asin pinag-aadalan mo sa Tataramon nin Diyos. Mamibi arog kan salmista na nagsabi: ‘Tukduan sa sako, O Jehova an saimong dalan. Maglalakaw ako sa saimong katotoohan. [Tawan mo ako nin dai nababangang] puso tanganing [magkaigwa] ako nin pagkatakot sa saimong pangaran.’ (Sal. 86:11) Kaya padagos na magkakan kan espirituwal na kakanon na itinatao ni Jehova paagi kan saiyang Tataramon asin organisasyon. Siyempre, bako lang magkaigwa nin kaaraman an pasuhan mo. Gusto mong isapuso an katotoohan asin isabuhay iyan. Matatabangan ka kan espiritu ni Jehova na magibo iyan. Gusto mo man na pakusugon an saimong mga tugang. (Heb. 10:24, 25) Taano? Huling sinda an saimong espirituwal na pamilya. Mamibi na tabangan ka kan espiritu nin Diyos na makatao nin udok sa pusong mga komento sa Kristiyanong mga pagtiripon asin na magibo mo an saimong pinakamakakaya pag may kabtang ka. Sa arog kaining mga paagi maipapahiling mo ki Jehova asin sa saiyang Aki na namumutan mo an saindang mahalagang marhay na mga “karnero.”—Juan 21:15-17.

17. Sa anong mga paagi mo maipapahiling na maimbod mong sinusuportaran an organisasyon ni Jehova?

¹⁷ Dai na mahahaloy, an organisasyon sana na ginigiyahan kan espiritu nin Diyos an matatada digdi sa daga. Kaya maigot na makipagtabangan sa organisasyon ni Jehova. Ipahiling an mayong pinapalain na pagkamuot nin Diyos sa mga tawo paagi sa pagbalangibog kan maugmang bareta sa gabos na nakakaulay mo. Arugon an pagkamuot ni Jehova sa pagigin areglado asin sa katuninungan paagi sa pagkontribwir sa pagkasararo sa kongregasyon. Asin magdangog sa saimong Kahuruhalangkawing Instruktor paagi sa lubos na pag-aprobetsar sa itinatao niyang espirituwal na bangkete. Dangan pag nag-abot na an katapusan kan kinaban ni Satanas, dai ka matatakot. Imbes, saro ka sa mga makusog an buot asin maimbod na mga naglilingkod kaiba kan organisasyon ni Jehova.